УИХ-ын хаврын ээлжит чуулган өндөр үүдээ нээлээ. Шинэ тогтолцооны үр дүнд байгуулагдсан анхны 126 гишүүнтэй парламентын ууган Хаврын чуулган гэдгээрээ онцлогтой. Ямартай ч УИХ-ын даргаасаа эхлээд гишүүд завсарлагын хугацаанд иргэдтэй нүүр тулан уулзаж, байгууллагуудын нөхцөл байдалтай газар дээр нь танилцаж асуудлын гүн рүү орсон зэрэг нэлээд амьдралын бодит хөрсөн дээр ажилласан гэхэд болно. Ингэхдээ тэд зөвхөн албан байгууллага иргэд гээд яваагүй, ерөнхий боловсролын сургуулийн сурагчидтай хүртэл уулзсан нь энэ нийгмийн гүн рүү орж, үүнийг Төрийн эрх барих дээд байгууллагын хэмжээнд авчирч үзэх нь ажил хэрэг болно гэж үзэснийх болов уу. Мэдээж хэрэг, амьдралын гүн рүү орж судалсан энэ ажил хэрэг бол сайн хууль болох нь гарцаагүй.

Тиймдээ ч УИХ-ын дарга Д.Амарбаясгалан “Хот, хөдөөд амьдралын чанарын ялгаа орших ёсгүй. Хот, хөдөө хамтдаа хөгжих нь нийгмийн эрх тэгш, аюулгүй, тогтвортой байдлын суурь мөн. Гэвч эрүүл мэнд, боловсролын хүртээмж, худалдаа, дэд бүтэц, бизнес эрхлэх боломж, нөхцөл ялгаатай хэвээр байна. Тиймээс энэ асуудал хууль, төсвийн бодлогын эрэмбийн эхэнд байвал зохино” хэмээн Хаврын чуулганы нээлтийн индэр дээрээс мэдэгдэнэ лээ. УИХ-ын гишүүдийн хувьд ч орон нутгаас богц дүүрэн ирж Хаврын чуулганаа нээсэн учраас ажил чамгүй өрнөж таарна.

Ойрын жилүүдийн улсын нэгдсэн төсөв, хөгжлийн төлөвлөгөө, өрийн удирдлагын стратегийн баримт бичиг зэрэг нэн чухал асуудлуудыг хэлэлцэж, энэ дотор Засгийн газраас хэрэгжүүлэхээр зорьж буй мега төслүүдийг гараанаас гаргаж, хөдөлгөөнд оруулж, алхам урагшлуулан үйл ажиллагаа болгох стратеги, тактикийг боловсруулахын тулд УИХ-ын 126 гишүүн мэдлэг, чадвараа дайчлах цаг нь ирсэн гэдгээ ухамсарлаж байгаа болов уу.

Ерөнхийдөө олон төсөл хөтөлбөр хэрэгжүүлэх, олон бодлого хууль гаргах маш том хариуцлагагын өмнө Хаврын чуулган өндөр үүдээ нээсэн учраас гишүүнд маань ч ухамсартай, хариуцлагатай сайн ажиллахыг УИХ-ын дарга ч индэр дээрээс хэлнэ лээ. Өнгөрөгч нэгдүгээр сарын 17-ны өдөр УИХ-аас 15 тоот тогтоол гаргаж энэ хаврын чуулганаар хэлэлцэх асуудлыг төлөвлөсөн. Үүний дагуу энэ Хаврын чуулганы үйл ажиллагаа өрнөнө. Тухайлбал,

1.Монгол Улсын нэгдсэн төсвийн 2026 оны төсвийн хүрээний мэдэгдэл

2.2027-2028 оны төсвийн төсөөллийн тухай хуулийн төслийг хэлэлцэнэ.; Мөн "Монгол Улсын хөгжлийн 2026 оны төлөвлөгөө батлах тухай"

3.УИХ-ын тогтоолын төсөл, Монгол Улсын нэгдсэн төсвийн 2024 оны гүйцэтгэл,

4.Засгийн газрын санхүүгийн нэгтгэсэн тайлан болон "Монгол Улсын 2024 оны төсвийн гүйцэтгэл батлах тухай"

5.УИХ-ын тогтоолын төсөл, "Засгийн газрын өрийн удирдлагын 2026-2028 оны стратегийн баримт бичиг батлах тухай", УИХ-ын тогтоолын төсөл, Монгол Улсын Их Хурлын 2025 оны намрын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай" Монгол Улсын Их Хурлын тогтоолын төсөл;

6. "Монгол Улсын Их Хурлын 2025 оны намрын ээлжит чуулганаар хэлэлцэх асуудлын тухай" Монгол Улсын Их Хурлын тогтоолын төсөл зэргийг юуны өмнө хэлэлцэхээр товложээ.

Мөн Монгол Улсын Ерөнхийлөгч, УИХ-ын гишүүд, Засгийн газраас УИХ-д өргөн мэдүүлсэн энэ тогтоолын 1-д зааснаас бусад хууль, УИХ-ын бусад шийдвэрийн төслүүдийг 2025 оны хаврын ээлжит чуулганаар хэлэлцүүлэх эсэх асуудлыг тухай бүрд нь УИХ-ын чуулганы хуралдааны дэгийн тухай хуулийн тавдугаар зүйлийн 5.7 дахь хэсэгт заасны дагуу шийдвэрлэж байхаар тогтоосон байна.

Tumen.mn