Өнгөрөгч баасан гаригт Ерөнхийлөгчийн санаачилгаар Хөвсгөл нуурыг хамгаалах цогц ажлын зөвлөлдөх хурал амжилттай болж өндөрлөсөн. Ерөнхийлөгчийн Тамгын газар, Ойн газар, Усны газар, Хөвсгөл аймгийн удирдлагууд, Хөвсгөл нуур орчмын таван сумын Засаг дарга, Тогтвортой аялал жуулчлалыг хөгжүүлэх төслийн багийнхан оролцсон хуралдаанаас Хөвсгөл нуурын ойн санг хамгаалах ажлыг эхлүүлэхээр шийдвэрлэсэн.

Уг ажлыг Ерөнхийлөгчийн Тамгын газрын Байгаль орчны төсөл хөтөлбөр хариуцсан алба хариуцан ажиллах бол Ажлын хэсгийг Ойн газрын дарга Б.Оюунсанаа ахлана гэдгийг Ерөнхийлөгчийн Тамгын газрын Байгаль орчны төсөл, хөтөлбөр хариуцсан албаны дарга О.Алтансаруул хэллээ.

Аливаа нуур болон мөрөн голыг тэтгэгч нь ойн сан байдаг учраас Хөвсгөл нуурын ойр орчмын ойн сан устаж үгүй болох аюулаас хамгаалах нь чухал ач холбогдолтой. Хөвсгөл нуурын орчим ойн сан насжилт өндөр бөгөөд нөгөө талаар хүмүүсийн буруутай үйл ажиллагаанаас үүдэлтэй эрсдэлд ороод байгааг мэргэжилтнүүд онцолж байсан. Энэхүү ажил нь Хөвсгөл нууранд живсэн машин техник татаж гаргахтай дүйхүйц том ажил учраас тэд яаравчлан ажилдаа орохоор бодлого боловсруулж байна. Хэрэв ойн санг яаравчлан хамгаалж, эрсдлээс аврахгүй бол 20 жилийн дараа устаж үгүй болохыг ч дурдсан юм.

Tumen.mn