Ерөнхий сайд Н.Учрал, Зам, тээвэр хөгжлийн сайд Б.Дэлгэрсайхан болон бусад сайд, албаны хүмүүс Дорноговь аймгийн Алтанширээ сумын нутагт баригдаж буй Газрын тос боловсруулах үйлдвэрийн бүтээн байгуулалтай танилцлаа.

Газрын тос боловсруулах үйлдвэрийн ажлыг УИХ, Засгийн газар аль болох богино хугацаанд ашиглалтад оруулахаар ажиллаж байна. Үүний дагуу Ерөнхий сайд Н.Учрал, Зам, тээвэр хөгжлийн сайд Б.Дэлгэрсайхан нар ирснээр газар дээр нь олон ажлыг шийдэж байгаа нь онцлог байв.

Энэ үеэр Зам, тээвэр хөгжлийн сайд Б.Дэлгэрсайхан “Газрын тос боловсруулах үйлдвэрийн шавийг тавьж байхаас эхлэн, олон удаа ирж ажил байдалтай танилцаж, ажлыг урагшлуулах тал дээр анхаарч байна. Одоо сүүлийн үед баригдаж байгаа хамгийн том үйлдвэрээ Аж үйлдвэрийн парк болгон зарлахгүй бол татварын дарамтад орж байна. Ерөнхий сайд салбар салбарт үүрэг өглөө, энэ утгаараа Зам тээвэр, хөгжлийн яам үүргээ биелүүлж ажиллана. Газрын тосны үйлдвэрийг хүн бүр дэмжиж байж цааш явна. Мэдээж үйлдвэрийн ажлыг гацааж дургүйцэж байгаа хүмүүс бий. Цаашдаа монголчууд гадны хараат биш тавиас дээш хувиа дотоодоосоо хангадаг байхгүй бол болохгүй. Энэ л бидний асуудал болсон. Өнөөдөр мөнгө төгрөг болон янз бүрийн асуудал байхгүй, бүгдийг нь шийдсэн учраас ажил гацахгүй цааш явна” хэмээлээ.

Энэ үеэр үйлдвэрийн санхүүгийн дарамтыг бууруулах, Аж үйлдвэрийн парк болгохыг Аж үйлдвэр, эрдэс баялгийн сайд Г.Дамдинням, Сангийн сайд З.Мэндсайхан, “Чингис хаан баялгийн сан нэгдэл” компанийн Гүйцэтгэх захирал Б.Даваадалай нарт, түүхий тосны хайгуулыг эрчимжүүлэхийг Аж үйлдвэр, эрдэс баялгийн сайд Г.Дамдинням, Ашигт малтмал, газрын тосны газрын дарга П.Баянбаатар, Дорноговь аймгийн Засаг дарга О.Батжаргал нарт гэх зэргээр үүрэг даалгавар өглөө.

Мөн үеэр Зам тээвэр, хөгжлийн сайд Б.Дэлгэрсайханы хувьд нутагтаа баригдаж байгаа Газрын тосны үйлдвэрийн ажилд онцгойлон анхаарч байгаа хүмүүсийн нэг хэмээн үйлдвэрийн алба хаагчид, ажилчид хэлж байлаа.

Tumen.mn