Хэрэглэгчид “Хамгийн анх үүссэн, хамгийн олон хэрэглэгчтэй компани байж үнэ, ханшаа буулгахгүй юм” гэж “Мобиком”-ийг шүүмжилдэг. Тэгвэл сүүлийн үед “Скайтел”, “Жи-мобайл”, “Юнител”, “Мобиком” гэсэн үүрэн холбооны дөрвөн компанийг хүнээр зүйрлэсэн талаар фэйсбүүк хуудаст гарсан байна. Тухайлбал, “Мобиком” бол 50 орчим насны шуналтай, заргач, бүдүүн, алт мөнгө зүүсэн, чинээлэг, яравгар авгай гэж бичжээ. Энэ нь нэг талаараа инээдтэй сонсогдох боловч нөгөө талаараа хэрэглэгчид голыг нь олоод дүрсэлсэн байж болох юм. Тиймээс “Мобиком” корпорацийн Хууль эрхзүйн бодлого зохицуулалтын газрын захирал Ц.Энхбаттай хэрэглэгчдийн сонирхсон асуудлаар ярилцлаа.
 

 -Хэрэглэгчид барьж буй дугаартайгаа бусад үүрэн холбоо руу шилжиж болох талаар нэлээд ярилаа. Энэ ажил одоо ямар шатандаа явна. Энэ жилдээ багтаж хэрэгжүүлэх үү? 
 

-Энэ ондоо амжихгүй. Өнгөрсөн жилийн нэгдүгээр сараас үүрэн холбооны компаниуд үүнийг бодлогын хүрээнд ярьж, ХХЗХ-той хамтран судалгаа хийж байна. Нэгээс нөгөө рүү шилжихэд их энгийн юм шиг хэрнээ техник, технологийн хувьд шийдэхэд маш хэцүү л дээ. Учир нь, тус тусдаа тооцоотой компаниуд байгаа юм. Өөрөөр хэлбэл, технологийн системийг нь анхнаасаа тусад нь хийсэн гэсэн үг. Гэтэл одоо нэг төвтэй болж, хэрэглэгчид дугаартайгаа хүссэн үүрэн холбоо руугаа шилжих талаар ярьж байна. Ийм болоход хамгийн багадаа 2-3 жил шаардлагатай. Энэ бол дэлхийн жишиг. Үүнээс ч их цаг хугацаа шаардаж магадгүй. Одоогоор анхан шатны схем зургийг нь гаргасан. Цаашид хэрэгжүүлэхэд хугацаа хэрэгтэй. Судалгаанаас үзэхэд хэрэглэгчид нэг үүрэн холбооноос нөгөө рүү 100 хувь шилждэггүй. Зөвхөн 25 хувь нь шилждэг юм билээ. 
 

-Зах зээлд танай компани монополь гэдэг үүднээсээ олон ч хэрэглэгчидтэй. Гэтэл бусад үүрэн холбооны компаниудтай харьцуулахад ярианы үнэ тариф харьцангуй өндөр байдаг. Цаашид бууруулах боломж бий юү?
 

 -Үнэ буурах бололцоо бүрэн бий. Бид буулгах талаар маш олон жил ярьсан. Тухайлбал, өнгөрсөн жил бид Rooming үйлчилгээний үнийг 40 хувь, мессеж, ярианы үнийг 30 хувиар буурсан. Яагаад өндөр үнэтэй байдаг гэхээр тухайн үнийг “Мобиком” корпораци тогтоодоггүй. Давамгайлагч аж ахуйн нэгж гэдэг үүднээс Харилцаа холбооны зохицуулах хороо / ХХЗХ/-ноос үнийн доод хэмжээг тогтоодог. Хэрэв тус газраас зөвшөөрөл өгвөл өнөөдрөөс ч үнийг бууруулахад бэлэн байна. 
 

-Яагаад ХХЗХ-ноос үнийн доод хэмжээг тогтоодог юм бол. Хэрэглэгчдээ алдахгүйн тулд үнээ бууруулах нь зөв сонголт биш гэж үү? 
 

-Манай корпораци үнийг бололцоот хэмжээгээр буулгасан тохиолдолд бага үнээр ажиллаж буй үүрэн холбооны компаниуд ашиггүй ажиллах нөхцөл бүрдэж, дампуурна гэсэн үг. Тиймээс үндэсний компаниудаа бод логоороо дэмжиж, манай корпорацийн үнийг барьж байгаа юм. Хэрэв манай үнэ “Юнител” компаниас бага болсон тохиолдолд манайхаас шилжсэн хэрэглэгчид эргэж ирнэ. Хэрэглэгч аль хямдхан үнэтэй үүрэн холбоог л сонгодог. 
 

-УИХ-ын гишүүдийн дугаараас хэрэглэгчдэд мессеж очсон хэрэг саяхан гарсан. Тухайн үед олон таамаг дэвшүүлж байлаа. Тэгвэл энэ асуудалд танай корпорацийн зүгээс ямар тайлбар хийх вэ?
 

 -Бид хэрэглэгчдийн мэдээллийн нууцад маш хариуцлагатай ханддаг. Гишүүдийн утаснаас мессеж илгээсэн асуудлыг судалж үзэхэд техникийн хөгжилтэй холбоотой байсан. Жишээлбэл, бид e-mail хүлээн авдаг. Түүн дотор spam folder гэж байдаг. Энд чухал биш борлуулалтын зорилгоор ч юм уу ирсэн хэрэггүй e-mail -үүд байдаг. Яг үүнтэй адилхан. Бид гар утсанд ирж буй бүх мессежид итгэх бололцоо байхгүй. 
 

-Дээрх асуудлыг хэсэг ярьж байгаад шийдвэрлэж чадалгүй намжих шиг боллоо. Танай корпорацид ямар нэгэн хариуцлага тооцсон уу? 
 

-Хяналтын бүх байгууллагаар шалгуулсан. Бидэнд хариуцлага тооцох үндэслэл байхгүй. Яагаад гэвэл ганцхан “Мобиком”-ийн хэрэглэгчдэд тэрхүү мессеж очоогүй. “Юнител”-ийнхэнд ч очсон гэсэн. ХХЗХ, Тагнуулын ерөнхий газраас “Үүрэн холбооны компаниудтай огт холбоогүй. Технологийн дэвшлийг буруугаар ашигладаг хүмүүс байна. Тэднийг хянах бололцоо байхгүй” гэсэн дүгнэлт гарсан. 
 

-Барьцаа шаардахгүйгээр ухаалаг гар утсыг худалдаалж, хэрэглэгчид ч нааштай хүлээж авсан. Гэтэл яагаад гэнэт барьцаа авахаар болсон бэ? 
 

-Гар утас худалдаалахад барьцаа авч байна. Энэ нь шударга өрсөлдөөнтэй холбоотой маш хэцүү асуудал. Яагаад гэвэл санхүүгийн хариуцлага. Жишээлбэл, өнгөрсөн жил ухаалаг гар утсыг барьцаа мөнгөгүйгээр хэрэглэгчдэд худалдаалсан. Гэтэл энэ жилийн байдлаар манай корпораци хэрэглэгчдээс бараг тэрбум гаруй төгрөгийн авлага авахаар байна. Учир нь, хэрэглэгчдэд итгээд “Та сар бүр тэдэн төгрөг төлөөрэй” гээд утсаа зарсан. Гэтэл тэд төлбөрөө хийхгүй байна. Энэ нь эргээд эдийн засгийн асуудал үүсгэж байгаа юм. Тухайлбал, байр, автомашин авахад сар бүр мөнгө төлнө гээд л авдаггүй. Барьцаа хөрөнгө шаарддаг. Тэгвэл гар утас ч гэсэн үүнтэй яг адил. Ийм асуудал байдаг учир барьцаа авахаас өөр аргагүй. 
 

-Дараа төлбөрт дугаартай хэрэглэгчид суурь хураамж төлөх зайлшгүй шаардлагатай юу? 
 

-Суурь хураамж авч буй багцаасаа хамаарч харилцан адилгүй байдаг. Хэрэв хэрэглэгч 350 мянган төгрөгийн багц үйлчилгээ авах гэж байгаа тохиолдолд тэр хэмжээний суурь хураамж төлөх ёстой. Жишээлбэл нэг орц байлаа гэж бодоход түүн рүү хүмүүс 24 цагийн турш орж гарах ёстой. Түүний тулд гэрлийг нь асааж, халуун дулааныг нь өгч, үүдэнд нь харуул хамгаалалт гаргах хэрэгтэй. Ингээд тухайн орц руу хэн ч, хэзээ ч, хэдэн ч удаа орж, гарч болно. Энэ бол суурь хураамжийн төлбөр гэсэн үг. Хэрэв хэрэглэгч суурь хураамж төлөхгүй гэсэн тохиолдолд үнэ төлбөргүй гурван сар хадгалуулж болно Тэгвэл тухайн орцны гэрлийг унтрааж, хаалгыг нь хаана л гэсэн үг. Энэ тохиолдолд бидэнд зардал гарахгүй. Зарим хүн “Мобикомийг ашигладаггүй. Зүгээр барьдаг” гэдэг. Ингэж болно. Энэ нь 24 цагийн үйлчилгээ авдаггүй гэсэн үг. Суурь хураамжаас ашиг олох ямар ч боломжгүй.
 

 -Сүүлийн үед үүрэн холбооны компаниуд хэрэглэгчдэд зориулсан төрөл бүрийн үйлчилгээг нэвтрүүлж, түүгээрээ өрсөлдөж байна. Танай корпорацийн хувьд ямар шинэлэг зүйл хийхээр төлөвлөж байна вэ?
 

 -Сүүлийн үед интернэт “Дата” хэрэглээ маш их өсч байна. Өмнө нь бид гол төлөв мессеж, ярианы борлуулалтаас орлого олдог байсан. Харин сүүлийн нэг жилд интернэтийн хэрэглээ хоёр дахин өслөө. Тиймээс манай корпорацийн зүгээс “Дата” хэрэглээг маш түргэн, хурдтай болгох чиглэлийг барьж байна. Бид 4G системийг нэвтрүүлэх бүх бэлтгэлээ хангасан. Одоо харин төр, засгаас зөвшөөрлийг нь хүсч байна. Төр зөвхөн зөвшөөрлийг нь өгөх хэрэгтэй. Тэгвэл бид хөрөнгө мөнгөө гаргаж, ажлаа хийхэд бэлэн. Ингэснээр “Дата” хэрэглэгчдийн хэрэглээ хоёр дахин хурдтай болно. 
 

-Тухайн системийг нэвтрүүлэх нь хэр оновчтой шийдэл вэ. Интернэтийн хурдыг хэд дахин нэмнэ гэсэн үг үү? 
 

-Тухайн системийг нэвтрүүлс- нээр www.youtube.com-ooс 20 дахин илүү хурдтайгаар дуу бичлэг татах боломжтой. Жишээл бэл, нэг кино татахад доод тал нь 20-30 минут зарцуулдаг байсан бол нэгээс хоёр минутанд л татна гэсэн үг. Энэ хэмжээгээр цаг хугацаа, хөрөнгө мөнгө хэмнэх боломжтой. Хэрэглэгчийн тоо нэмэгдэж, “Дата” ихсэх тусам үнэ буурна. 
 

-Шинэ үйлчилгээ нэвтрүүлэхэд үүрэн холбооны компаниудад тулгамдаж буй зүйл нь тусгай зөвшөөрөл гэсэн Үүнд тодорхой тайлбар өгнө үү? 
 

-Тусгай зөвшөөрөл. Энэ бол зөвхөн “Мобиком” корпорацийн асуудал биш. Төртэй хамтарч ажиллаж байгаа хувийн хэвшлийн бүх байгууллагад тулгамдаж байна. Манайх 20-50 тэрбум төгрөгийн хөрөнгө оруулалт хийхээр төлөвлөгөөг бэлддэг. Тэгээд батлуулаад хийх гэхээр тусгай зөвшөөрөл олгодоггүй. Дөрвөн жил тусгай зөвшөөрөл хүссэн. Уг нь бол тусгай зөвшөөрлийн эрх байдаг. Телевизээр дамжуулж, өндөр хурдтай интернэтийн үйлчилгээ үзүүлэх зөвшөөрөл. Үүнийг хязгаарлах шаардлага байхгүй. 2000 оны үед баталсан Төрөөс баримтлах бодлого гэж байдаг. Үүгээр нийслэлд дөрвөн IBТV байх ёстой. Энэ тендерт нь оролцохоор манай корпорацийн урдуур орж лицензийг нь авдаг. Үүнд ямар тайлбар өгдөг вэ гэхээр “Танайх хоёр, гуравхан оноогоор дутлаа. Лиценз авсан компанитай хамтраад ажилла” гэдэг. Үүнийг бид лицензийн наймаа гэж бодож байна. Тиймээс бид энэ асуудлаар шүүхэд хандана. Хэрэв манай корпорациас илүү туршлагатай, хөрөнгийн чадвартай, мэргэжлийн боловсон хүчинтэй IBТV явуулах компани байдаг бол бид хүлээн зөвшөөрнө. Хамгийн гол нь шударга зарчимтай л байх хэрэгтэй.

Эх сурвалж: Unen.mn