УИХ-ын намрын чуулган энэ сарын 10-нд дуусна. Хэлэлцэх асуудлууд хугацаандаа багтах эсэх нь эргэлзээтэй байна. Өнгөрсөн хаврын чуулганы төгсгөлд баахан хууль бөөндөж шүүмжлэлд өртсөн. Энэ удаа ч мөн иргэдийн зүгээс дуугүй суухгүй бололтой.

Хэлэлцүүлгийн шатанд байгаа хууль, УИХ-ын бусад шийдвэрийн төслүүдээс нэлээд  маргаан дагуулах төслүүд цөөнгүй. Ашигт малтмалын тухай хууль эмзэг сэдэв хэвээрээ байгаа. Монгол Улсын Үндсэн хуульд нэмэлт, өөрчлөлт оруулах тухай асуудал бүрч их анхаарал татаж буй. Хүний хөгжил сангийн тухай хуульд нэмэлт оруулах тухай хуулийн төсөл, Хүний хөгжил сангийн тухай хуулийг хэрэгжүүлэх зарим арга хэмжээний тухай болон Эхчүүдэд урамшуулал олгох тухай хуулийн төслүүд ч нийгмийн шууд ядууралтай холбоотой тул нухацтай шийдэхгүй бол болохгүй.

УИХ-д өргөн мэдүүлсэн ч хэлэлцэж эхлээгүй төслүүд олон байна. Аж ахуйн нэгжийн орлогын албан татварын тухай хуульд нэмэлт оруулах тухай, Хувь хүний орлогын албан татварын тухай хуульд нэмэлт оруулах тухай, Гаалийн тариф, гаалийн татварын тухай хуульд нэмэлт, өөрчлөлт оруулах тухай, Нэмэгдсэн өртгийн албан татварын тухай хуульд нэмэлт оруулах тухай хуулийн төслүүд, Онцгой албан татварын тухай хуульд нэмэлт, өөрчлөлт оруулах тухай хуулийн төсөл, Баянмонгол “Эрдэнэс Монгол” компанийн тухай, Хүний хөгжил сангийн тухай хуульд өөрчлөлт оруулах тухай, Зарим бараанд ногдуулах экспортын гаалийн татварын хэмжээ тогтоох тухай хуульд нэмэлт оруулах тухай, Эрүүгийн байцаан шийтгэх хуульд өөрчлөлт оруулах тухай зэрэг хуулийн төслүүд хугацаандаа багтсан ч бөөндөх замаар чанаргүйтүүлж болзошгүй ажээ.

Б.Баяр

Эх сурвалж: Tumen.mn