Оюу толгой, Таван толгойг эдийн засгийн эргэлтэнд оруулахаар боллоо хэмээн Ерөнхий сайд Ч.Сайханбилэг мэдэгдсэн. Энэ бол сүүлийн жилүүдэд сонсогдоогүй хамгийн сайн мэдээ болов уу. Оюу толгойн гэрээг хууль бус, ашиггүй гэрээ болсон гэдгийг монголчууд бүгд мэдэж буй. Гэхдээ алдааг явц дунд нь засах гэж Засгийн газраас багагүй чармайлт гаргасан. Үүний үр дүнд 100 хувь сайжруулж чадаагүй ч гэсэн далд уурхайн хөрөнгө  оруулалтыг татах гэж байгаа бол сайн хэрэг. Таван толгойд ч мөн ялгаагүй хэл ам ихтэй байлаа.  Тэндэхийн төрийн мэдлийн Эрдэнэс Таван толгой компанийн гүйцэтгэх захирал асан Я.Батсуурь “Ганц худаг”-ийн мөрдөнд сууж байна. Монголчууд Таван толгойгоос 1072 ширхэг хувьцаагаа авах бололцоотой эсэх нь эрэгзээтэй хэдий ч Ч.Сайханбилэг зориг шулуудан хөрөнгө оруулагчидтай эцсийн шатны хэлэлцээрийг хийж дуусгах гэж байгаа ажээ. Гэтэл УИХ-ын дарга, дэд нар түүнд саяхан албан бичиг илгээж “Таван толгойн асуудлыг УИХ-аар хэлэлцүүлж шийдэх нь зүйтэй” гэлээ. Уг бичигт “...Засгийн газрын үйл ажиллагааны хөтөлбөрт Таван толгойн ордыг зөвхөн олборлохтой холбоотой үйл ажиллагаа явуулахаар заажээ. Гэтэл Таван Толгойн ордыг ашиглах санал өгсөн консорциум нь хөрөнгө оруулалт, төслийн удирдлага, дэд бүтэц, олборлолт, үйлдвэрлэл, тээвэрлэлт, борлуулалт хийх эрхийг авахаар  санал болгож байна. Үүнээс харахад энэ консорциум нь зөвхөн олборлолт хийхээр санал өгч байгаа компани биш байна. ...ММС болон “Шенхуа” нь Монгол улсад бүртгэлтэй хуулийн этгээд биш бөгөөд тодоодын хөрөнгө оруулагчид биш...” гэсэн байна. Үүнээс үзэхэд Таван толгойн асуудал УИХ дээр дахиад  баахан цаг үрсэн маргаан дагуулахаар болж буй ажээ.

Б.Отгон 

Эх сурвалж: Tumen.mn