Төрийн албаны халаа сэлгээ нь өнөөдөр төрийг өөрийг нь сулруулж, Үндэсний аюулгүй байдлыг хөндсөн томоохон асуудал болж буйд судлаачид, зарим иргэд бухимдалтай яваа аж. УИХ-ын Өргөдлийн байнгын хороонд  ажлаас үндэслэлгүйгээр халагдсан 149 хүний гомдол иржээ. Эдгээрээс Хөдөлмөрийн яамтай холбоотой 64, БОНХАЖЯ-ных 66, ЭМСЯ-ны  11, ХХААЯ-ны 14. БХБЯ-ны 5, БСШУЯ-ны 8 гомдол байгаа аж. Үүнтэй холбогдуулан Өргөдлийн байнгын хорооноос өчигдөр зохион байгуулсан  нээлттэй хэлэлцүүлгийн үеэр учир утгагүй халаа сэлгээний талаар хариуцлага үүрэх хүн харин олдсонгүй. Тэр бүү хэл , ЭМСЯ-нд хоёр Төрийн нарийн бичгийн дарга чихэлдэх болчихоод байгаа нь шинэ маягийн “онигоо” гэлтэй юм болжээ. Тус яамны Төрийн нарийн бичгийн даргаар ахиллаж байсан Ж.Хатанбаатар нь Н.Алтанхуягийн Засгийн газрын үед халагдаж, шүүхээр явсаар эцэст нь ажилдаа эргэж орохоор болжээ. Гэтэл түүний дараа  Төрийн нарийн бичгийн дарга хийж байгаад халагдсан А.Эрдэнэтуяа нь ч бас шүүхдэлцэн ялж, буцаад ажилдаа очихоор болсон байна. Харамсалтай  нь Төрийн албаны  зөвлөлөөс тэдний  асуудлыг одоо болтол шийдүүлж чадаагүй байгаа ажээ. Сонгон шалгаруулалт ч зарлаагүй байна. Энэ мэт маргаантай олон зүйлийн талаар хэлэлцүүлгийн  үеэр ярилцлаа. Эцсийн дүнд  эдгээр нь улс төрийн намын харъяаллаар томилдог, шахааны хүмүүсээ төрд шургуулахыг оролдсоор ирсэнтэй холбоотой гэдэг дээр санал нэгдэв.

Б.Баяр 

Эх сурвалж: Tumen.mn