Дубайн гэрээ ид маргаан дагуулж буй энэ үед Монгол Улсын Ерөнхий сайдаар ажиллаж байсан Д.Бямбасүрэн гуай ‪”Дубайн‬ гэрээ биднийг олон сая ам. долларын өрөнд оруулж, Монголын орд газруудын хувь заяаг гадаад захирлуудын гал тогоонд шийддэг болголоо” хэмээсэн. Энэ үүднээс харвал Дубайд үзэглэсэн баримт бичиг үнэхээр Монголын эрх ашигт харшилсан юм биш биз гэх хардлагыг эрхгүй төрүүлж байгаа нь илт харагдаж байна. 

Нөгөө талаас, бас нэг шүүмжлэлийн бай болоод байгаа заалт нь энэ баримт бичгийн 4.4 дэх хэсэг. Үнэндээ Ч.Сайханбилэг сайд Дубайд айлчлах үеэрээ Оюутолгойн далд уурхайн бүтээн байгуулалтын ажлыг эхлүүлэхээр болоод ирсэн. Харин тэр актыг гэрээ гэх үү, төлөвлөгөө гэх үү гэдэг өнөөдөр ч эргэлзээтэй хэвээр байгаа юм. Хэдийгээр Ерөнхий сайд “Төлөвлөгөө” гэж онцолж байгаа ч Олон улсын арбитрын шүүхэд очиход албан ёсны гэрээ болж хувирах учиртайг учир мэдэх хүмүүс хэлж буй. 

Нөгөө нэг асуудал нь “Оюутолгой” компанийн санхүүгийн тайлантай холбоотой “хэрэггүй” заалт энэ төлөвлөгөөнд багтсан бололтой. Учир нь, Ч.Сайханбилэг сайдын баталгаажуулж ирсэн төлөвлөгөөний 4.4-т “Энэхүү төлөвлөгөөнд гарын үсэг зурсанаас хойш ажлын тав хоногийн дотор Сангийн Яам, “Оюутолгой” ХХК-ийн хүргүүлсэн 2010, 2011, 2012, 2013, 2014 оны санхүүгийн тайланг баталгаажуулна” гэж заасан байгаа. 

Нөгөөтэйгүүр, “Оюутолгой” компани яагаад бүтэн таван жилийн турш санхүүгийн тайлангаа гаргаж өгөлгүй явсан бэ гэдэг нь анхаарал татаж байгаа юм. Уг хуулиудад аливаа компани, аж ахуйн нэгж гурван улирал дараалан санхүүгийн тайлангаа гаргаж өгөөгүй бол зохих хариуцлага хүлээнэ гэх заалттай байдаг аж. Гэтэл “Оюутолгой” компани гурван улирал бүү хэл таван жилийн турш санхүүгийн тайлангаа гаргаж өгөлгүй манай улсад сул чөлөөтэй үйл ажиллагаа явуулсан гэсэн үг. Дээрх заалтын тухай бас нэг ойлгомжгүй зүйл байгаа нь “Ажлын тав хоногийн дотор хүлээж авч, Сангийн сайд баталгаажуулна” гэсэн заалт. Уг нь төлөвлөгөөнд ийм заалт орсон байтал Сангийн сайд “Би гарын үсэг зурах шаардлагагүй” гээд байгаа. Харин гишүүн С.Ганбаатарын хувьд “Сангийн сайд гарын үсэг зурчихвал дуусаа” гээд байдаг. 

Үүнээс үзвэл Сангийн сайд нь гарын үсэг зурж, баталгаажуулах шаардлагагүйг нь харвал “хэрэггүй” заалт мэт ч С.Ганбаатар гишүүний үзэж буйгаар “Сангийн сайд баталгаажуулчихвал бүх зүйл дуусаа” гэвэл хамгийн хэрэгтэй заалт ч юм шиг ийм нэг ойлгомжгүй байдал үүсээд байгаа аж. Эх сурвалж www.wikimon.mn