Ороо бусгаа, ээдрээтэй нийгэм цаг үеийн хүндхэн шалгуурт зарим эрчүүдийн ноён нуруу хугарсаар байна. Бүх эрчүүд бус ч сүүлийн үед харгис хэрцгий зан авир гаргаж, үр хүүхэд гэр бүл болон ойр дотны эмэгтэйчүүдээ зовоосон эрчүүдийн тухай мэдээлэл нэлээд гарах боллоо.
Заримаас нь цухасхан дурдахад ажлын газрын найз бүсгүйгээ ёс бус аргаар хүчирхийлж, ухаан алдтал нь зодлоо, өөрийн төрсөн хүүгээ заазуурджээ, охиноо хойд эхтэй нь нийлж зодож, амь насанд нь хүрлээ, эхнэрээ хөнөөлөө зэрэг ноцтой хэргүүд гарсаар байна. Тэдний зарим нь шүүх хяналтын байгууллагаар шүүгдэж ял зэмээ хүртээд явж байгаа.
Хэрэг хийсэн, хийгээгүй ч хийх магадлалтай харгис эрчүүд ирээдүйд засрах уу. Үүнийг хэн, хэрхэн яаж өөрчлөх вэ. Сэтгэлзүйчдийн судалгаанаас үзэхэд эрчүүд эмэгтэчүүдийг бодвол сэтгэлийн тэнхээгүй, зовлон гунигаа бусдад илэрхийлж хэлдэггүй, уур хилэнгээ барих чадваргүй, тэвчээргүй, тэвчээртэй байлаа гэхэд дотогшоогоо шаналдаг нийтлэг зан араншинтай гэсэн байна.
Энэ нь тэдний эрүүл мэндэд хүртэл хор хөнөөлтэй аж. Өөрөөр хэлбэл монгол эрчүүдийн дундаж наслалт 64 бол эмэгтэйчүүдийнх 72 байна. Амиа хорлох, үхэх тухай эмэгтэйчүүд эрчүүдээс илүү их боддог ч энэ тухайгаа бусдад маш сайн хэлж гадагшлуулдаг учир энэ бодол нь аажмаар үгүй болдог аж. Гэтэл эрчүүд үхэх тухай боддог ч үүнийг хүнд хэлэх хэрэггүй гэж үздэг байна. Тиймээс өөрийгөө егүүтгэсэн хүмүүсийн 60 гаруй хувь нь эрчүүд байгаа юм. Гэвч тэд зам тээврийн осол хийх магадлал эмэгтэйчүүдийнхээс тав дахин бага атал мөрийтэй тоглоомонд донтож, эдийн засгаа хянах чадваргүй болоод энэ байдлаас гарч чадахгүй байх магадлал эсрэг хүйстэнээс гурав дахин их. Товчхоноор хэлбэл эрчүүд маш богино хугацаанд эвдэрч өөрийгөө амархан сүйтгэж чаддаг гэнэ.
Эрчүүд яагаад өөрийгөө хороож чадаж байхад эмэгтэйчүүд яагаад энэ тухайгаа ярьж чадаж байна вэ? Яагаад гэвэл эмэгтэйчүүд эрчүүдээс “тэвчээртэй, гүндүүгүй /сэтгэл хөдлөлгүй/ эрч хүчтэй, манлайлагч байхыг шаарддаг. Үүнээс л болж тэд өөрсдийгөө хөнөөгөөд байна. Тодрулбал эмэгтэйчүүд тэднийг сэтгэл хөдлөлөө илэрхийлэхийг хүлээн зөвшөөрдөггүй. Уйлж, сэтгэлзүйгээ чөлөөтэй илэрхийлдэг эрчүүдийг болохоор эр хүний тооноос бараг хасчихдаг. Мөн эцэг эхчүүд хүүхдээ бага байхаас нь эмзэглэх, гуниглах, бусдаас тусламж хүсэх боломжийг дарж, хатуужилтай хийморьлог байх ёстой гэж сургадаг. Гэтэл төлөвшиж, нийгэмтэй бүрэн танилцаагүй хүүхэд өөрийнхөөрөө, чөлөөтэй байж чаддаггүй. Ингээд тэд ийм байх ёстой, тийм харагдах хэрэгтэй гэдэг ойлголтыг автоматаар авч өөртөө хана хэрэм босгож, дотогшоогоо болдог байна. Ингээд л эрэгтэй хүүхэд өөрийн эрхгүй эр зоригийн баг зүүж зоригтой, хүчтэй болох гэж жүжиглэж эхэлдэг аж. Тиймээс айсан, шаналсан, эргэлзсэн мэдрэмжүүдээ хүчээр дарна. Тэгэхээр ямар ч хүний сэтгэл хөдлөлөө илэрхийлэх арга, биеэ авч явах байдлыг эрэгтэйлэг эмэгтэйлэг гэж шүүмжлэхээ больсон цагт л тэд айдасгүйгээр багаа хуулж, өөрсдийгөө чөлөөлж чадна. Тэгэхээр эрчүүдээс, ялангуяа хөвгүүдээс бид ихийг шаардаж, баг зүүлгэх хэрэгтэй гэж үү. Хожим тэр баг хуулагдаад ирэхийн цагт зарим эмэгтэйчүүд зугтдаг. Зугтахаас аргагүй байдлыг эрчүүд гаргадаг байна.
Гэхдээ эрчүүд бүгд ийм биш. Өөрийг нь өөрөөр нь зөв үлгэрлэн зааж, сурган хүмүүжүүлсэн ухаантай эцэг эхчүүдийн зөв сайхан хөвгүүд үүнээс олон бий. Эмэгтэйчүүдийг ээж шигээ хайрладаг, гэр бүл үр хүүхдээ дээдэлж, амьдралаа уран жолоодож буй эрчүүдийн ард мөн л сайн хань байдаг тухай бараг үлгэр болтол бид ярьцгаадаг. Тэгвэл муу муухай зан авиртай “хэцүү” хүмүүсийн ард эсвэл урд хэн байна вэ. Хэн ч хэнээсээ хамааралгүй нийгэм гэж байна уу. Аав ээжүүд охиддоо илүү анхаарал халамж, тавьж эрдэм номд сургахыг шамддагч хөвгүүдээ хайхралгүй орхидог тал бий. Тэд ч ирээдүйд яг таны охин шиг эмэгтэйн хань болно гэдгийг хатуу ойлгох хэрэгтэй. Явж явж эмэгтэйчүүд эрчүүдийг харгис болоход нөлөөлөөд байгаа юм биш биз.
Н.Ганчимэг
Эх сурвалж: Доргио.мн
