Х.МАНДАХБАЯР ХОЁР ЖИЛ МСНЭ-ИЙН ЕРӨНХИЙЛӨГЧ НЭРЭЭР МАНДАТ АВАХ БЭЛТГЭЛЭЭ ХАНГАВ
“Монголын сэтгүүлчдийн нэгдсэн эвлэл” /МСНЭ/ бол хэвлэл мэдээллийн салбарт ажиллаж буй хэн бүхнийг ерөнхий утгаараа төлөөлөх хамгийн том статус нь юм. Гэтэл эл байгууллагыг ердөө хоёр жилийн өмнө /2018.02.08/ бөөн хор найруулан байж удирдах эрхийг нь авсан Х.Мандахбаяр улс төрд орох шат гишүүгээрээ болгон ашиглав.
Анхлан “Аа, базар дарь минь, хэвлэлийг улс төрөөс ангид байлгана. Сэтгүүлчдийн ордон байгуулаад, тусгаар тогтнуулна. Би ч өөрөө ч МАН-ын Бага хурлын гишүүнээс татгалзсан. Улстөрд орохгүй” гэхчлэн олон сайхан үг унагаж байв.Түүнээс хойш Х.Мандахбаярын байр суурь хэдэнтээ өөрчлөгдөж, баахан төөрөгдөл үүсгэж бужигнуулсан.
Тэрбээр МСНЭ-ийг авсныхаа дараа гэнэт уул уурхайн салбарынхантай тулалддаг “Ардын баатар”-ын дүрд тоглож, Өмнөговь аймагт хэсэг бужигнуулсан. Энэ зуураа МСНЭ-ийн Ерөнхийлөгчөөс татгалзан, хэвлэлийн бага хурал хийн уйлж, “Сэтгүүлзүйн салбар худалдагдсан” хэмээн зарлаж байв. Хачин нь салбараа ингэж доромжилж, элдэвлэж байсан хүн нэг их удалгүй дахин МСНЭ-ийн Ерөнхийлөгчийн ажлаа авсан юм.
Өө, энэ мэтээр Х.Мандахбаярын дэглэсэн жүжиг ерөөсөө дуусахгүй. Хамгийн аймшигтай нь, тэр өнгөрсөн бүх хугацаанд “Би улс төрөөс ангид” гэж ярьсан мөртлөө хөшигний ард МАН-ын пиар ажлуудад зөвлөж, намтайгаа холбоогоо огт таслаагүй. Тэр утгаараа сонгуулиар хэвлэлийн салбарынхныг айлгах бүх хуулийн төслүүд баталж байхад ч юм дууграагүй. Бүр сэтгүүлчдийг ЭРҮҮЧЛЭН шалгахыг Х.Мандахбаяр өөрөө гарын зурж, зөвшөөрсөн баримт сошиалд бий.
СЭТГҮҮЛЧИЙГ ЭРҮҮЧЛЭН ШАЛГУУЛАХ ЗААЛТААРАА САЛБАР НЭГТНҮҮДДЭЭ ГОМДОЛ ГАРГАЖЭЭ
Зөрчлийн хуулин дахь “Гүтгэх” заалтыг Эрүүгийн хууль руу өнгийг нь хувирган оруулахыг МСНЭ-ийн Ерөнхийлөгч Х.Мандахбаяр зөвшөөрч, албан бичиг илгээснээр сэтгүүлчид дээр шууд Эрүүгийн хэрэг үүсдэг болов. Энэ талаар дэд сайд Б.Энхбаяр “Мэдэх эрх, хэвлэлийн эрх чөлөөг Эрүүгийн хуулиар айлгаж амыг нь барих улс төрчдийн санаархлыг хаасан хамгийн гол заалт тайлбарыг нь Сэтгүүлчдийн Ерөнхийлөгч нь санал гаргаж хасуулсан” гэж жиргэсэн байдаг.
Харин Х.Мандахбаяр дахиад л нөгөө матрын нулимс унагадаг аргаа ашиглаж “Гүтгэх заалтыг хасуулсан. Харин ч би үзэлцэж байж худал мэдээ тараах болгож, Эрүүгийн хууль руу оруулсан” гэж өөрийгөө өмгөөлөв. Улстөрчид бөөн баяр болж, баримтаар бичсэн байсан ч сэтгүүлчдийг айлгах зорилгоор Эрүүгийн хэрэгтнээр шалгуулдаг сайхан аргатай болов. Албан тушаалтнууд ЦЕГ дээр тусгай ажлын хэсэг байгуулж, өөрсдийг нь бичсэн хэвлэлийнхнийг шалгуулдаг болтлоо “оодров”.
Сэтгэлзүйн хувьд ч тэр, нийтийн эрх ашгийг хохироож буй буруу булхайг илчилж бичснийхээ төлөө сэтгүүлчид байсхийгээд л Эрүүгийн хэрэгтнээр дуудагдаж, цагдаагийн үүд сахиж сууна гэдэг яавч хүсэх зүйл биш. Сэтгүүлчдийг мохоож, хэрэг төвөг тарилгүй шиг мөлгөр байлгах замыг ингэж, МСНЭ-ийн Ерөнхийлөгч нь бий болгов. Цаашлаад сэтгүүлч шүүхээр буруутгагдвал намтарт нь Эрүүгийн хэргээр шийтгүүлж байсан гэх тодотгол үүсэх нь хорлонтой.
Ийм бараан зүйлийг салбартаа бий болгосон тэрбээр МАН-аас мандат өвөртөлж чадлаа. Тойргоо өчнөөн усалчихсан, судалгаагаар тэргүүлж байгаа мөртлөө У.Хүрэлсүхээс яаж мандатаа авъя даа гэж олон гишүүд санааширч байхад, Х.Мандбаяр ногоон гэрлээ мандат авсан. Бүр болоогүй тэр, намын даргаа эцсээ хүртэл өмөөрөхөө илэрхийлэнгээ өнөөх батлуулсан хуулиараа сэтгүүлч Б.Отгоныг Эрүүчлэн шалгуулахаар гомдол гаргаад буй. Энэ бол зөвхөн эхлэл. Улстөрд орвол өөр олон сэтгүүлчийг өөрийнхөө зөвшөөрч батлуулсан хуулиар тэр Эрүүчлэн шалгуулах биз ээ.
Эх сурвалж: Eguur.mn
