Урд хөрш энэ оны эхний хагасын статистик дүн мэдээлээ танилцуулжээ. 

Коронавирусийн нөлөөгөөр уналтад орсон эдийн засгаа сэргээхийн тулд, гадаад худалдаа мөн үйлдвэрлэлээ эрчимжүүлснийг харж болохоор байна. 

Энэ боломжийг томоохон тоглогчид ч алдахыг хүссэнгүй. Австрали, Индонези, ОХУ-ын Хятадад нийлүүлсэн нүүрсний хэмжээ тус бүр өсөлттэй гарсан байна. 
Тухайлбал, манай гол өрсөлдөгч гэгддэг Австрали 55 хувь, ОХУ 2.3 хувь өсчээ. Эсрэгээрээ Монгол Улсын нийлүүлсэн хэмжээ 2019 оны 18.1 сая тонноос даруй 2 дахин буурч, 8.5 сая тонн болсон байна.

Энэ буурсан шалтгааныг дэд бүтэцтэй холбож тайлбарлахаас өөр аргагүй. Австрали л гэхэд хүний оролцоогүй бүрэн автомат төмөр замаар далай хүртэл тээвэрлэлтээ хийдэг. Далайн тээвэр эрсдэл бага, зардал хямд учир Австрали, Индонезийн нийлүүлэлт нэмэгджээ. Нөгөө талдаа, хойд хөршийнхөн маань өөрсдөө нүүрсний экспортоо Хятад, Ази руу бүрэн чиглүүлж, нарийн царигтай төмөр замаар Монголыг тойруулж хийсээр байна. 

Одоогоос хэдхэн жилийн өмнө гэхэд кокжих нүүрсний нийлүүлэлтээр Монгол Улс Австралийг хол хаях боломжтой талаар олон улс шуугиж, ОХУ Хятадын коксжих нүүрсний зах зээлд сураггүй шахам байв. Гэтэл 10 жилийн дараа гэхэд манай улс бахь байдгаараа, автомашинаар очерлосон хэвээр. Харин бизнесийн ухаан сайтай Австрали, геополитик сайтай ОХУ хоёр Хятадын зах зээлийг эзэлсэн нь нэгэнт үнэн болжээ.