У.Хүрэлсүхийн замд ширхэг чулуу үлдээлгүй арчиж цэвэрлэх ажиллагаа төгс болж байна. Хууль тогтоох дээд байгууллага ч их цэвэрлэгээнд дайчлагдав.

Ерөнхийлөгч Х.Баттулгыг Цэцийн хаалга мөргүүлсэн гол зүйл Үндсэн хуулийн нэмэлт өөрчлөлт. Хэрэгжих хугацаа. Гэхдээ Х.Баттулга өнөөдрийн нөхцөл байдалдаа өөрөө л буруутай. Түүнд бүгдийг зөв болгох дөрвийн дөрвөн жил байв. Анхнаасаа өөрийн биш нөхдөд итгэн шадарлаж, зөвлөх нэрт “зовлого”-уудаар хүрээлүүлсэн гор нь түүнийх.

“Зовлого”-уудын нь гараар эрх баригчид эрхэм Ерөнхийлөгчийн өдөр өдрийн зурхайг, өнөөдрийн зурлагатай нь хамт зуруулж байхад хэт хайрцаглагдан вакумжигдсан тэрбээр юу хийж байсан юм бэ.

Ядаж байхад талбай дээр өрөөстэй хэдэн “бидон”-ууд нь балга ус нэхэлдэн төрийн ордонд халаасандаа гар хийн таахалзаж, итгэж найдсан Ц.Туваан нь хэдэн адсага цагдаа нартай булаацалдан “манжин”-дахаас хэтрэхгүй байх нь хөөрхийлөлтэй.

Тэднийг цэцэрлэг ясли болон эсгий шидэлцэх хойгуур Ерөнхийлөгчийн сонгуулийн тухай хуульд МАН ганц өдрийн дотор өөрчлөлт оруулчихаж байна. Өдрийн хугаст оруулсан өөрчлөлтөө тэр даруй дагаж мөрдөхөөр батлав.

Ерөнхийлөгчийн сонгуулийн тухай хуулийн 3 дугаар зүйлийн 3.1.2 дахь заалт:

Өмнө нь: 3.1.2.“нэр дэвшигч” гэж 50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын Үндсэн хууль болон энэ хуульд заасны дагуу Монгол Улсын Ерөнхийлөгчид нэр дэвшин бүртгүүлж, нэр дэвшигчийн үнэмлэх авсан Монгол Улсын уугуул иргэнийг;

Өөрчлөлт: “3.1.2.“нэр дэвшигч” гэж Монгол Улсын Үндсэн хуулийн Гучдугаар зүйлийн 2 дахь хэсэг, энэ хуульд заасан шаардлагыг хангаж Монгол Улсын Ерөнхийлөгчид нэр дэвшин бүртгүүлж, нэр дэвшигчийн үнэмлэх авсан Монгол Улсын иргэнийг

5 дугаар зүйлийн 5.4 дэх хэсэг:

Өмнө нь: 5.4. 50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын Үндсэн хууль, энэ хуульд заасан бусад шаардлагыг хангасан Монгол Улсын уугуул иргэн Ерөнхийлөгчөөр сонгогдох эрхтэй.

Өөрчлөлт: 5.4. Энэ хуулийн 3.1.2-т заасан шаардлага хангасан, Ерөнхийлөгчөөр сонгогдон ажиллаагүй Монгол Улсын уугуул иргэн зөвхөн нэг удаа Ерөнхийлөгчөөр сонгогдох эрхтэй.

… Сүүлийн 5 жил Монголд оршин суусан гэх заалтад нь бүдрэх байсан У.Хүрэлсүхэд зориулсан гэж хардахад буруутахгүй энэ өөрчлөлтийг Ерөнхийлөгчийн хоригтой хамтатган УИХ-д яаралтай горимоор хүч түрэн оруулаад гаргачихлаа.

Ердийн үед орондоо “засчихаж” болох заалт ч гэлээ яг энэ цаг үед ийнхүү ёс төдий оруулж, протоколд тэмдэглүүлсэн болгоод гаргах нь зөв үү.

Энэ хуулийг бүрэн гүйцэд гүйлгэж харвал 81.1-т нь Монгол Улсын Ерөнхийлөгчийн ээлжит сонгуулийн санал авах өдрөөс өмнөх нэг жилийн хугацаанд Монгол Улсын Ерөнхийлөгчийн сонгуулийн тухай хууль батлах, түүнд өөрчлөлт оруулахыг хориглоно гэж бий. Харамсалтай нь энэ заалт эрх баригчдад үйлчилсэнгүй.

Талбай дээр өлсөж суугаа хэд ч өлгөөд тэмцчихээ мэдэхгүй хууль тогтоогч нэрт таар шуудайнууд юм.

Нэгэнт хууль зөрчин Ерөнхийлөгчийн сонгуулийн тухай хуульд хугас өдрийн дотор өөрчлөлт оруулж болж байгаа бол Х.Баттулгад ч боломжийг нь өгөөд шударга өрсөлдчихөд яагаад болохгүй гэж. 1992 онд шинэ Үндсэн хуульд оруулсан өөрчлөлт батлагдсан ч П.Очирбат дахин нэр дэвших боломжоор хангагдаж байсантай ижил шүү дээ угтаа.

Хэрэв ийм боломж өгөхгүй бол өдрийн дотор өөрсдөдөө нийцүүлэн хуульд гар дүрсэн эрх баригчдын эсрэг эрхэм Монгол Улсын Ерөнхийлөгч Х.Баттулга та гарцаагүй мад хийж мэдэх ганц нүүдэл зоригтойхон хийчихээч!!!

Ерөнхийлөгчийн тамгаа хэзээ мөдгүй хүлээлгэн өгөхийн өмнө хоёр ч боломж байна. Тэртэй тэргүй хэтрүүлэн ашиглачихаад байгаа эрх мэдлээ тултал ашиглаад хорих ангид байгаа Сүүдрийн Засгийн газрын бүрэлдэхүүнийг өршөөхийг нь өршөөж, цагаатгахыг нь цагаатгаад гаргачихаач.

Угаасаа эрх баригч намынхантай нийлээд “түр далд хийчихсэн” хүмүүс биз дээ. Тэгвэл талбай дээр хэзээ хэрхэн, ямар үр дүн авчрах нь тодорхойгүй суугаа “бидон, шанага” хочит нөхдөөс хол илүү хоржоонтой зэвсэг болно.

Зэвийг өршөөхөд Чингис хаанд хэрхэн зүтгэлээ дээ. Өршөөгдсөн нөхөд Х.Баттулгад зүтгэдэггүй юм гэхэд хамаарах намуудаа зүгээр байлгахгүй. 

С.Баяр, С.Баярцогт, Ч.Сайханбилэг, М.Энхсайхан, Б.Болор, Д.Эрдэнэбат, Да.Ганболд, Б.Бямбасайхан, Б.Хурц, Г.Эрдэнэбат гээд хүний, өөрийн алагчлалгүй өршөөл үзүүлчих. Тэд өвөр түрий нь олдохоо байж, дүрэм журамгүй хутгалдан тоглож буй МАН, АН-ын одоогийн удирдлагуудыг эмхэнд оруулах түлхүүрүүд.

У.Хүрэлсүх, Д.Амарбаясгалан, С.Эрдэнэ вангууд эдгээр нөхдийг гарч ирэхээс үхтэл айж байгаа. Тиймээс ЖДҮХС-гийн хэргээр аавын хаалга татсан улстөрчдийг ч нэмээд суллачих.

Ерөнхийлөгчид олгогдсон бүрэн эрхээ улайстал ашиглаад ав. Хожим харамсч суухаар хийгээд л үз. Тэртэй тэргүй Үндсэн хуулийн өөрчлөлт, Цэцийн дүгнэлтээс дахин юу ч горьдох хэрэггүй болсон шүү дээ.

Ингэвэл утгаа алдаж, учир тоймоо олохоо больсон улс төр харин ч нэг сонирхолтой болно бий вий. Тараах гээд байгаа МАН чинь эвлэрэх биш эвдрэлцээд одоогийн байгаа АН-аас ч дор тавиланг туулна.

Мэнгэт сайд Б.Хурцын сургаар сураг алдарч, улстөрийн сийлбэрч С.Баяр титэм үг тэрлэж, тэмээн аян дагахгүй. Хүрз жоотуу, сүх сэлэм далайсан Сүүдрийн Засгийн газрынхан У.Хүрэлсүхийн эсрэг хамгийн хүчтэй акцыг өдөөнө. Гэрийн эздийг “эзгүйчилсэн” Н.Энхбаяр төрхөмдөө буцна. Дахиж ирэх ч үгүй.

Харин зөрүүлээд Д.Амарбаясгаланг “аавынд” хийчихэж бас болох юм. Адилхан л ЖДҮХС, 60 тэрбумтай нэр хутгалдсан генсэк биз дээ.

Ц.Элбэгдорж Н.Энхбаярыг хэрхэн гозолзууллаа даа. Одоогийн МАН, АН-ыг хогийн тантан болтол самарч буй гэгдэх тэрбээр Х.Баттулгын оронд байсан бол яг энэ хувилбараар сүүлийн нүүдлээ хийж мэдэх л кадр.

Тиймээс Х.Баттулга та, эрх мэдэл атгачихаад төв талбай тойрсон тоглолт төдийхөн хийхээ боль л доо. Дэндүү жул, дэндүү сүргүй юм.

С.Баярцогт ганцаараа С.Эрдэнэ зэргийг төвөггүйхэн “цэгцэлчихнэ”. Түүнд тэр хэмжээний хүрээ, хүртээмжтэй лидерүүд бий. Энэ нөхөд гараад ирвэл С.Эрдэнэ ван өөрөө нэрээ татаж мэднэ шүү. Ер нь нам намын уран тоглогчдыг торны цаана суулгасны гор чинь өнөөдрийн өнгө төрх. Тиймээс буухаасаа, явахаасаа өмнө алдаагаа засчих.

Эс чадвал Хүмүүн бичгийн хичээлээ хойш тавьж, У.Хүрэлсүхийн хилээр орж, гарсан өдрийг тэмдэглэн Хил, гаалиас лавлагаа аван “гоншигнож” нэг үзэхээс өөр хувилбар үгүй.

Тэгэхээр талбай дээрх тав арван “бидон сав”-аа тараагаад, төмөр торны цаадах Сүүдрийн Засгийн газарт “өршөөл” үзүүлэх хамгийн жинтэй, далайцтай, хэзээд үл мартагдах улстөрийн супер тоглолтыг хийгээд л үз..

Алдах юм харин ч байхгүй.