Тамхи их татах нь амьсгалын замыг гэмтээж коронавирусийн халдварт өртөмтгий болгодог талаар Эрүүл мэндийн яамнаас мэдээлсээр байгаа билээ. 

Тамхинаас шалтгаалсан өвчний улмаас жил бүр дэлхий нийтэд 8 сая хүн нас бардаг аж. Тамхи татдаг хүмүүс КОВИД-19 халдвараар хүндэрч, амь эрсдэх магадлал өндөр байгаа нь олон сая хүнд тамхинаас гарах хүслийг төрүүлж байна. Цар тахлын улмаас үүссэн нийгэм, эдийн засгийн хямралаас болж тамхинаас гарах нь хэцүү байж болох ч тамхинаас гарах олон шалтгаан бий. 

 

Тамхинаас гарсан даруйд хүний биед өөрчлөлт гарч эхэлдэг. Тодруулбал, тамхинаас гарсан 20 минутаас эхлэн зүрхний цохилт хэвийн болж, 12 цагийн дотор тамхин дахь маш хортой бодисын нэг цусан дахь нүүрстөрөгчийн ислийн хэмжээ хэвийн хэмжээнд очно.

 

Мөн 1-2 долоо хоногийн дотор цусны эргэлт, уушигны үйл ажиллагаа сайжирч, 1-9 долоо хоногт ханиалгах, амьсгаадах шинж тэмдэг багасдаг байна.