Энэ мэдээ хуучирсан буюу 2021/06/10-нд нийтлэгдсэн мэдээ болно.

Т.Доржханд: У.Хүрэлсүх таньд баяр хүргэж, амжилт хүсэж байна

УИХ-ын гишүүн, ХҮН-ын дарга Т.Доржханд тэргүүтэй Хөдөлмөрийн Үндэсний Намын удирдлагууд Монгол Улсын Ерөнхийлөгчийн сонгуулийн үр дүнтэй холбоотойгоор мэдээлэл хийлээ.

Энэ үеэр Т.Доржханд : "Энэ удаагийн сонгууль өмнөх сонгуулиудаас маш их ялгаатай сонгууль боллоо. Ямар нэгэн байдлаар бие биенээ харлуулж гүтгэсэн үйлдэл хийгээгүй, мөн зардал багатай болсноороо онцлог.

Хамгийн олон санал авсан МАН-ын дарга У.Хүрэлсүх танд баяр хүргэж, амжилт хүсье. Монгол төрийн эрхэм хүндтэй энэхүү албыг 6 жил нэр төртэйгээр хашна гэдэгт итгэж байна. Мөн АН-ын дарга С.Эрдэнэ танд талархлаа илэрхийлж, цаашдын ажил амьдралд тань сайн сайхныг хүсье.

Нэр дэвшигч Д.Энхбат маань өнөөдөр харамсалтай нь эмнэлэгт байгаа учир бидний дунд байх боломжгүй байна.

Бидэнд итгэж саналаа өгсөн 246,955 сонгогчиддоо нэр дэвшигчийнхээ өмнөөс болон ХҮН, "Зөв ХҮН Электорат" эвслийнхээ нэрийн өмнөөс талархлаа илэрхийлж байна. УИХ-н 2020 оны сонгуульд оролцож байхад Хөдөлмөрийн Үндэсний Намд 209 мянган иргэн саналаа өгсөн бол нэг жилийн дараа 250 мянга болжээ. Өөрөөр хэлбэл бидний дэмжигчдийн тоо өссөн хэвээр байна.

Манай нэр дэвшигч нэлээд олон хэсэгт ялалт байгуулсан болохыг цохон тэмдэглэе. Ялангуяа гадаадад байгаа Монголчууд маань их идэвхтэй оролцлоо. Гадаадад байгаа Монголчуудын нийт өгсөн саналын 75.4% нь нэр дэвшигч Д.Энхбатад өгчээ. Манай эвсэл энэ сонгуульд 1.2 тэрбум төгрөгийн зардал гаргасан. Энэ бүх мөнгө хандиваар боссон бөгөөд дийлэнхийг нь гадаадад байгаа Монголчууд шилжүүлсэн.

Д.Энхбат сарын өмнө Ерөнхийлөгчийн сонгуульд өрсөлдөнө гэдгээ мэдээгүй байсан нь бодит үнэн. Тэрээр ердөө нэг сарын өмнө сонгуульд өрсөлдөх шийдвэрээ гаргаад орон даяар явж иргэдтэйгээ уулзсан. Дэмжигч нар, сайн дурын ухаалагч нартаа талархлаа. Мөн нэр дэвшигчийн маань гэргий Оюунцэцэг эгчдээ талархлаа илэрхийлье. Нөхрөө дэмжээд, нөхрөө дагаад Монголынхоо олон аймгаар явж, сонгуульд оролцсонд баярлалаа. Хэдий аялах явцдаа коронавирусын халдвар авсан ч гэлээ сэтгэл зүрхээрээ хамт байсанд тань талархъя.

Бидний саналыг хүлээж авсан эгэл жирийн нэгэн инженер, доктор Дангаасүрэнгийн Энхбат танд ХҮН нам, "Зөв ХҮН Электорат" эвслийнхээ хамт олны өмнөөс дахин талархаж байгаагаа илэрхийлье. Нэр дэвшигч эмнэлэгтээ хэвтэж байгаа, биеийн байдал нь маш сайн байгаа. Тун удахгүй эхнэрийнхээ хамт эмнэлгээс гарах биз ээ" гэв.

Монгол Улсын 6 дахь Ерөнхийлөгчөөр У.Хүрэлсүх сонгогдлоо
Монгол Улсын 6 дахь Ерөнхийлөгчөөр У.Хүрэлсүх сонгогдлоо
 
“ Захилагат хууль” -ийн автор Ч.Хүрэлбаатар УИХ-ын гишүүн А. Адьяасүрэнг заналхийлжээ
“ Захилагат хууль” -ийн автор Ч.Хүрэлбаатар УИХ-ын гишүүн А. Адьяасүрэнг заналхийлжээ
Энэ мэдээ хуучирсан буюу 2021/06/10-нд нийтлэгдсэн мэдээ болно.