Орон нутгууд дундаа цор ганц ногоон бүс болоод байсан Өмнөговь аймаг дахь Цагаан хаданд нүүрс тээврийн экспорт зогссон. Улмаар нүүрс тээврийн цуваа ихсэж, нөхцөл байдал хүндэрсэн талаар хэвлэл мэдээллийн хэрэгслүүд мэдээллээд буй. Энэ талаар Ашигт малтмал, газрын тосны газрын статистик хариуцсан эдийн засагчаас тодруулахад: “Өнгөрсөн 24 цагийн байдлаар нүүрс экспорт гараагүй. Түүний урд өдөр ч Монгол улс нүүрс экспортолж чадаагүй. Коронавирусийн нөхцөл байдлаас үүдэн БНХАУ хилийн боомтоо чангатгасан. Учир нь манай Цагаан хадан дахь нүүрсний экспортын тээврийн жолоочдоос удаа дараа шинжилгээгээр коронавирус илэрч байгаа. Тиймээс өнгөрсөн 48 цагийн байдлаар нүүрсний экспорт тэг хувьтай байлаа.

Нүүрсний экспортыг оруулахгүй байгаа ч зэсийн баяжмалыг авч байгаа” гэлээ.

Ийнхүү манай улсын эдийн засгийн гол эргэлт болсон Цагаанхад боомтод халдварын тохиолдол эрс нэмэгдэж БНХАУ-ын талаас хилээ чангатгасан нь улсын эдийн засагт хамгийн их нөлөөлөх нь тодорхой. Гэвч зарим эх сурвалжийн мэдээлснээр "Өмнөговь аймагт аль хэдийнээ халдвар бүртгэгдчихсэн байсан. Тийм хэдий ч одоог хэр нь хатуу хөл хорио тогтоогоогүй байгаа нь БНХАУ-аас хилээ чангатгахад хүргэлээ" хэмээж байв.