Улсын бүртгэлийн ерөнхий хуулийн 21.2 дахь хэсэгт заасны дагуу Монгол Улсын Засгийн газраас “Улсын бүртгэлийн үйлчилгээний хөлсний хэмжээг шинэчлэн тогтоох тухай” 230 дугаар тогтоолыг 2020 оны арванхоёрдугаар сарын 23-ны өдөр баталсан байна. Энэхүү тогтоолыг баталсантай холбогдуулан яг ийм асуудлаар өмнө нь мөрдөж байсан Засгийн газрын 2010 оны есдүгээр сарын 15-ны өдрийн 237 дугаар тогтоолыг хүчингүйд тооцжээ. Тиймээс 230 дугаар тогтоолыг энэ оны долоодугаар сарын 1-ний өдрөөс дагаж мөрдөхөөр болсон юм. Энэ талаар УБЕГ-ын Улсын бүртгэлийн нэгдсэн архивын газрын дарга С.Оюунгэрэлээс тодруулахад, иргэдээ хариуцлагажуулах үүднээс зарим төрлийн үйлчилгээний үнэ тарифыг нэмсэн. Тухайлбал, үндэсний энгийн гадаад паспортыг хаяж, үрэгдүүлж, гэмтээсэн тохиолдолд нийт 40 мянган төгрөгийн үйлчилгээний хөлс авахаар болсон. Үүний дотор бичилтийн үнэ 15 мянган төгрөг багтаж байгаа юм гэлээ.

Харин энгийн гадаад паспортын хуудас эсвэл хугацаа нь дууссан юмуу шинээр 5, 10 жилээр нь олгоход 27.5 мянган төгрөг байх аж. Түүнээс гадна төрсний бүртгэлд шинэ иргэнээ бүртгэж, гэрчилгээ олгох, биеийн давхцалгүй өгөгдөл буюу хурууны хээний бүртгэл хийлгэх, нас барсны бүртгэлд бүртгэж, Монгол Улсын иргэн байсныг баталгаажуулж гэрчилгээ олгох зэрэг үйлчилгээг үнэ төлбөргүй үзүүлэхээр болжээ. УБЕГ-ын Иргэний улсын бүртгэлийн газрын ахлах мэргэжилтэн Н.Наранцэцэг хэлэхдээ, тус газрын орон нутаг дахь салбараас аймаг, нийслэлийн дотор шилжин суурьших хөдөлгөөнийг бүртгэхэд 1500 төгрөгийн үйлчилгээний хөлс авдаг бол хил орчмын нутагт зорчих нэг удаагийн үнэмлэх олгох, нэг аймгаас нөгөөд эсвэл нийслэл рүү шилжин суурьших хөдөлгөөнийг бүртгэх төлбөрийн хэмжээ харилцан адилгүй байдаг нь иргэдийн хөдөлгөөнийг зохицуулах үндсэн зорилготой хамааралтайг тодотгож байсан юм. Тухайлбал, дээр дурдсан үйлчилгээ нь 1500-5000 төгрөгийн хөлстэй байдаг аж. Харин иргэний улсын бүртгэлийн үйлчилгээнд хамгийн өндөр хөлс нь үндэсний энгийн гадаад паспортыг гадаадад суугаа Элчин сайдын яам, Дипломат төлөөлөгчийн газраар дамжуулан олгоход оногддог бөгөөд 48.5 мянган төгрөг байдаг. Харин хуулийн этгээд, эд хөрөнгийн эрхийн бүртгэл болон Улсын бүртгэлийн мэдээллийн сангаас лавлагаа олгох үйлчилгээ зэрэг нь ямар үнэ өртөгтэй байдаг болон үнэ тариф хэрхэн өөрчлөгдсөн талаар доорх жагсаалтаас харна уу.

ХУУЛИЙН ЭТГЭЭДИЙН УЛСЫН БҮРТГЭЛИЙН ҮЙЛЧИЛГЭЭ

Хуулийн этгээдийн нэр баталгаажуулах – 10000 төгрөг /500 төгрөг байсан/

Хуулийн этгээдийн нэр баталгаажуулсан хугацааг сунгах – 15000 төгрөг /шинээр нэмэгдсэн/

Хуулийн этгээд, түүний салбар, Төлөөлөгчийн газрын улсын бүртгэлийн гэрчилгээ олгох – Үнэ төлбөргүй /5000 төгрөг байсан/

Хуулийн этгээдийн улсын бүртгэлийн гэрчилгээ дахин олгох – 88000 төгрөг /Шинээр нэмэгдсэн/

Хуулийн этгээдийн салбар, Төлөөлөгчийн газрын гэрчилгээ дахин олгох – 40000 төгрөг /Шинээр нэмэгдсэн/

Тамга, тэмдгийн хяналтын дугаар олгох – 10000 төгрөг /Шинээр нэмэгдсэн/

ЭД ХӨРӨНГИЙН ЭРХИЙН УЛСЫН БҮРТГЭЛИЙН ҮЙЛЧИЛГЭЭ

Монгол Улсын иргэнд төрөөс үнэ төлбөргүй өмчлүүлсэн газрын эрхийг бүртгэж, гэрчилгээ олгох – Үнэ төлбөргүй /Өөрчлөгдөөгүй/

Монгол Улсын иргэнд төрөөс худалдаж өмчлүүлсэн газрын эрхийг бүртгэж, гэрчилгээ олгох – Үнэ төлбөргүй /Шинээр нэмэгдсэн/

Газраас бусад үл хөдлөх эд хөрөнгө өмчлөх эрхийг улсын бүртгэлд анх удаа бүртгэж, гэрчилгээ олгох – Үнэ төлбөргүй /Шинэчилсэн/

Төрийн өмчийн үл хөдлөх эд хөрөнгийн эрхийг эд хөрөнгийн эрхийн улсын бүртгэлд бүртгэх – Үнэ төлбөргүй /Шинээр нэмэгдсэн/

Хуулиар төрийн болон албаны нууцад хамааруулсан үл хөдлөх эд хөрөнгийн эрхийг эд хөрөнгийн эрхийн улсын бүртгэлд бүртгэх – Үнэ төлбөргүй /Шинээр нэмэгдсэн/

Төрөөс үнэ төлбөргүй хувьчилсан орон сууцыг өмчлөх эрхийг бүртгэх – 5000 төгрөг /Өөрчлөгдөөгүй/

Хөдлөх эд хөрөнгө өмчлөх эрхийг анх удаа бүртгэж, гэрчилгээ олгох – Эрхийн улсын бүртгэлд тусгах үнийн дүнгийн нэг хувь /Шинэчилсэн/

Эд хөрөнгийн өмчлөх эрх шилжилтийг бүртгэх – 20000 төгрөг /Өөрчлөгдөөгүй/

Гэрээ, хэлцлийн үндсэн дээр бүртгэл салгаж, шинээр бүртгэх – 20000 төгрөг /8000 байсан/

Эд хөрөнгийн эрхийн улсын бүртгэлд нэмэлт, өөрчлөлт оруулах – 8000 төгрөг /Өөрчлөгдөөгүй/

Үл хөдлөх эд хөрөнгө өмчлөх эрхтэй холбоотой дараах бусад эрхийг улсын бүртгэлд бүртгэх – 10000 төгрөг /Өөрчлөгдөөгүй/

-түрээсийн гэрээ;

-сервитут;

-узуфрукт;

-усан замын тээврийн хэрэгсэл, агаарын хөлгийн санхүүгийн түрээс (лизинг) – ийн гэрээний эрх;

-бусдын газар дээр барилга, байгууламж барих эрх.

Газар эзэмших, ашиглах эрхийг улсын бүртгэлд бүртгэх – Үнэ төлбөргүй /10 000 байсан/

Үл хөдлөх эд хөрөнгийн барьцаа (ипотек) – ны болон батлан даалтын гэрээний эрхийг улсын бүртгэлд бүртгэх – Гэрээний үндсэн үүргийн үнийн дүнгийн 0.05 хувь /Өөрчлөгдөөгүй/

Барьцаалбар бүртгэх – 3000 төгрөг /Өөрчлөгдөөгүй/

Барьцаалбарт оруулсан өөрчлөлтийг бүртгэх – 5000 төгрөг /3000 байсан/

Гэрээнд оруулсан нэмэлт, өөрчлөлтийг бүртгэх – 5000 төгрөг /Өөрчлөгдөөгүй/

Эд хөрөнгийн эрхийн улсын бүртгэлд бүртгэгдсэн гэрээг дуусгавар болгох, цуцлах – Үнэ төлбөргүй /Өөрчлөгдөөгүй/

Эд хөрөнгийн эрхийн улсын бүртгэлд урьдчилсан тэмдэглэл хийх – 5000 төгрөг /Өөрчлөгдөөгүй/

Эд хөрөнгийн эрхийн улсын бүртгэлийн урьдчилсан тэмдэглэлийг хүчингүй болгох – Үнэ төлбөргүй /Өөрчлөгдөөгүй/

Эд хөрөнгө өмчлөх эрхийн гэрчилгээг дахин олгох (хаясан, үрэгдүүлсэн, гэмтээсэн тохиолдолд) – 20000 төгрөг /Өөрчлөгдөөгүй/

Д.МӨНХЖАРГАЛ

Эх сурвалж: "Монголын үнэн" сонин