Дөрвөн их наяд гаруй төгрөгийн алдагдалтай төсөв баталсан ч 32.5 тэрбум төгрөгөөр “Богд Зонхова”-ын хөшөөг Тасганы овоон дээр босгохоор төсөвт мөнгийг нь нэгэнт суулгажээ. Барихаар ч гэж бариад эхэлчихсэн хөшөө шүү дээ. МАН-ын зүтгэлтнүүд, ид насны нөхдийн толгой дээгүүр гишгээд өндөрт гарч ирсэн Соёлын сайд Ч.Номин богино зайд хүчээ авч байгааг харуулсан хэрэг. Тэгэхэд насаараа төрд, МАН-д үнэнч зүтгэсэн нөхөд гурван тэрбумын хөрөнгө оруулалт ч татаж чадахгүй байгаа нь үнэн.
Хөрөнгөтэй эцгийнхээ нэр, мөнгөөр сайдын суудалд очиж, нэгэн жилийн нүүр үзэхэд төсвөөс зөвхөн хөшөөнд зориулан 30 гаруй тэрбум төгрөг гаргуулан авч байна гэдэг хэтдээ МАН-д байтугай энэ төрд дийлдэхгүй гэдгийг харууллаа. Тэгээд Ч.Номин сайдын ар талд маш том хүч байна, асар их хөрөнгө байна. Хэдийгээр хөрөнгөтэй эцэгтэй ч түүний хэр хэмжээнээс хэтэрсэн асуудал бол энэ мөн. Соёлын сайдын энэхүү үр ашиггүй төслийг хэн түлхэж, хэн хэн дэмжив гэдэгт асуудал бий. Ямартай ч өдгөө хүчтэй байгаа УИХ-ын дарга Г.Занданшатар түүнийг дэмжсэн гэдгийг мэдээлээд эхэлжээ. УИХ-ын даргаас дэмжлэг авч байгаа нь аргагүй өндөр авсныг гэрчилнэ. Түүнд цэцэрлэг барихад харамлаад өгөөгүй мөнгөө өгч байна, эмнэлэг барихад гар татсан мөнгөө өгчихөж байна, сургууль босгоход буруу харж суучихаад өгөөгүй мөнгөө шууд гаргаад өгчихөж байгааг өөрөөр юу гэж тайлбарлах юм бэ.
Гэтэл тус хөшөөний төсөвт өртгийг нэмэгдүүлэхэд Ц.Анадбазар, Ц.Цэрэнпунцаг тэргүүтэй гишүүд дэмжлэг үзүүлж, лобби хийсэн гэдгээс харахад бизнест нэр мөртэй толгой хөрөнгөтнүүд дэмжиж байна. Өөрөөр хэлбэл “Гачуурт” группын ерөнхийлөгч Л.Чинбат УИХ-д байгаа нэр нөлөө бүхий бизнесмэн улстөрчидтэй халаас нэг байгааг төвөггүйхэн илтгэж буй хэрэг.
Мэдээллээс харвал анх 2021 оны төсөвт 5.5 тэрбумаар сууж, 2022 онд шууд 32.5 тэрбум болон тусгагдсан нь хэний ч анхаарлыг татна. Гэтэл тухайн үед Сангийн сайдаар ажиллаж асан Ч.Хүрэлбаатар “Бид ийм төсөв хийж өгөөгүй, УИХ дээр гурван гишүүний саналаар нэмэгдсэн” хэмээн мэлзэв. Ийм хэмжээний төсөвт өртөгтэй бүтээн байгуулалтын ажлыг Сангийн сайд харахгүй өнгөрөөнө гэж үү. Тэгээд ч 2021 оны төсвийг Ч.Хүрэлбаатарыг сайд байхад тэдний багийнхан л төсөөлж хийсэн байж таарна. Энэ талаар сэтгүүлчид мэдээлэл хайж, эцэст нь тендер зарлагдсан гэх баримт ч олж чадсангүй, албаны хүмүүсээс ч хариулт авч чадсангүй. Үүнээс харвал энэ бүтээн байгуулалтын ажил хувийн хөрөнгөөр хийгдэж байгаа нь бараг тодорхой болж байна.
Харин нэг баримт олж авсан нь Барилга хот байгуулалтын яамны харьяа Барилгын хөгжлийн төв “Барилга байгууламжийн зураг төслийн магадлалын дүгнэлтийн нэгтгэл” гэх баримт үйлдэж, уг барилгыг 32.5 тэрбумаар баригдана гэж хүлээн зөвшөөрчээ. Уг дүгнэлтийг 2021 оны есдүгээр сарын 10-ны өдөр үйлдэж, Барилгын хөгжлийн төвийн захирал Ц.Амарсанаа тэргүүтэй албан тушаалтнууд гарын үсэг зурсан нь нэгэнт нотлогдлоо. Ц.Амарсанаа гэх хурган дарга ч УИХ-ын дарга, гишүүдийн хүчинд автсан уу, эсвэл өөр холбоо сүлбээ байв гэдгийг тогтоох хэрэгтэй.
Уг нь тус хөшөөг “Монголын бурхан шашинтны нийгэмлэг Богд зонхов” нэртэй Төрийн бус байгууллагын санаачлагаар хийж байгааг эх сурвалж дуулгасан. Тэгэхээр шашин шүтлэгтэй сайд дарга нар маань нэг Төрийн бус байгууллагын санаачилсан ажлыг төрийн мөнгөөр хийлгэхээр дэмжиж байгаа хэрэг болж байна. Мөн цааш хөөгөөд байхаар УИХ-ын гишүүн Ц.Цэрэнпунцаг Ш.Адьшаа гишүүнтэй хамтарч “Монголын бурхан шашинтны нийгэмлэг” НҮТББ-ыг эзэмшдэг бөгөөд өөр хэд хэдэн шашны чиглэлийн ТББ түүн дээр бүртгэлтэй байгааг ч гаргаж иржээ. Эцэст нь дүгнэж хэлэхэд бурхан шашны чиглэлд үйл ажиллагаа явуулдаг Төрийн бус байгууллагтай бизнесмэн гишүүдийн лобби үүнд орсон нь зайлшгүй харагдана.
Эх сурвалж: Tumen.mn
