Хойд хөршийн Владивосток хотод Дорнын эдийн засгийн VII чуулга уулзалтыг “Олон туйлт дэлхий ертөнц рүү” сэдэв дор 40 гаруй улс орон, бүс нутгийн 4000 орчим зочид, төлөөлөгчтэйгөөр зохион байгууллаа. Уг чуулга уулзалтад Ерөнхий сайд Л.Оюун-Эрдэнэ оролцож, Монгол Улсад тулгамдаж буй төсөл хөтөлбөрөө танилцуулж, бүхий л талаар дэмжлэг авахаар болсон хэвлэлүүд шуугиж байна. Энэ мэт Ерөнхий сайдад хаягласан гоё ганган мэдээ нь дэндүү хөөстэй, бодит байдлаас тасарсан нь олны хардлагыг дагуулж эхэллээ.

Цагтаа Монгол Улсыг Кремлиэс удирдаж байсан хойд хөрш биднийг зүгээр ч нэг дэмжээгүй байх. Эрх баригчдаас санал болгон, дэвшүүлсэн “Шинэ сэргэлтийн бодлого”-д нийтдээ 47 төсөлд 120 их наяд төгрөг зарцуулна гэхээр гаднын хөрөнгө оруулалт зайлшгүй шаардлагатай. Чухам үүнийг хөдөлгөхийн тулд хөрөнгө оруулагч талд ашигтай санал тавьж байж төслүүд хөдөлнө гэхээр Ерөнхий сайд маань чуулга уулзалтаар чухам юу юу амласан юм бол гэх хардлага хаа хаанаа бий. Бүхий л хэвлэл мэдээллийг гартаа хийсэн Засгийн газар үнэн бодит мэдээллийг олон нийтэд хүргэх боломж өгөхгүй байна гэх гомдол ч бий.

Дэлхий нийтэд газрын тосны үнэ өссөн үед Монгол Улсад ч шатахуун, түлшний үнэ дагаад өндөр авч байсныг түр арга хэмжээ аваад байсан. Тодотговол, Уул уурхай, хүнд үйлдвэрийн яам “Роснефть” компанитай хэлэлцээ хийж, 1285 ам.долларт хүрээд байсан АИ-92 автобензиний хилийн үнийг 830 ам.доллар болгон бууруулж, 2022 он дуустал үнийг тогтвортой хадгалахаар болоод байсан. Уул уурхай, хүнд үйлдвэрийн сайд асан Г.Ёндон “Шатахууны үнийг он гартал тогтвортой барих боломжтой хэлэлцээрт хүрсэн. Үүнээс цааш яах ч аргагүй” хэмээн мэдэгдэж байв. Тэгвэл чуулганы үеэр талууд хэлэлцээ хийж АИ-92 автобензинийг 2027 он хүртэл тогтвортой үнээр, дизель түлшийг 10 хувийн хөнгөлөлттэй үнээр худалдан авахаар тохирчээ. ОХУ өөрөө эдийн засаг нь уначихсан, дэлхийн зах зээл дээр баррель нефтийн үнэ өндөр авсан байхад ирэх 2027 он хүртэл биднийг харж үзнэ гэдэг цаана нь ямар нэгэн өргөл барьц байж таарна гэх.

Мөн олон жил яригдсан Эгийн голын усан цахилгаан станц болон бусад эрчим хүчний цахилгаан станцуудын өргөтгөл шинэчлэлийн талаар хэлэлцээ хийсэн. Эгийн голын усан цахилгаан станцын төслийг НҮБ-тай хамтран шийдвэрлэж, мэргэжлийн шинжээч, судлаачдын баг гарган ажиллуулж Сэлэнгэ мөрөн, Байгаль нуурын усны нөөцөд нөлөөлөх байдлын үнэлгээ хийлгэхээр болсныг ажил гараанаас гарсан мэт шуугиж байна. Энэ төсөлд ОХУ-ыг дийлэнх хувьд нь оруулж байж л тэд нааштай хандах нь ойлгомжтой учраас илүү хувь амласан байх.

Мөн үеэр төмөр замын асуудлыг ярилцсан. Уг нь Монгол Улсад төмөр замынхаа сүлжээг нэмэх, ОХУ-ын хувь эзэмшлээс илүү гаргах зорилго тавьж байгаа ч тэд төдийлөн ойшоож байсангүй. Харин чуулга уулзалтаар ойрын хугацаанд зүүн босоо төмөр замын бүтээн байгуулалтыг эхлүүлж, “УБТЗ” ХНН-ийн өргөтгөл, шинэчлэлийн ажлыг эрчимжүүлэх талаар оросын тал байр сууриа илэрхийлжээ.

Энэ мэт олон төсөл хөтөлбөрүүдийг урагш явуулах асуудлыг Дорнын эдийн засгийн чуулга уулзалтаар шийдвэрлэсэн шахуу зүйлс бичигдэж байгаа нь дэндүү хөөсөрсөн хэрэг гэдгийг эх сурвалжууд тал талаас хэлж байна.

Түмэн.мн