Чингэлтэй дүүргийн 2021 оны төсөв санхүүгээс 10 гаруй тэрбум төгрөгийн алдаа зөрчил илэрчээ

МАН-ын шилдэг залуу боловсон хүчин Н.Батсүмбэрэлээр удирдуулсан нийслэлийн томоохон дүүрэг ийм “сайхан” амжилтаар өнгөрсөн оноо үджээ. 2020 оны эхээр өмнөх даргаа “мөргөн” дүүргийн удирдлагад гарсан тэрээр “нам дагавал ам тосддог”-ийн жишээг харуулж яваа нэгэн юм. Харин толгойлсон дүүрэг нь “амаа тосдсонгүй” л явна. Өнгөрсөн жилийн тус дүүргийн төсөв санхүү, тайлан балансыг шалгахад нийтдээ 10 гаруй тэрбум төгрөгийн алдаа зөрчил илэрчээ. Шалгалтанд хамрагдсан харьяа байгууллагуудыг дүүргийн ЗДТГ, ИТХ хоёр нь олон үзүүлэлтээр “тэргүүлсэн” байх юм. Зөвхөн Засгийн газрын 2021 оны төсвийн хэмнэлтийн 43-р тогтоолын хэрэгжилтийг шалгахад л ЗДТГ-аас 125 сая төгрөгийн зөрчил илэрчээ. Н.Батсүмбэрэлийн “штаб” болсон энэ газраас нийтдээ 545 сая төгрөг буюу хагас тэрбумын алдаа, зөрчил илэрсэн бол ИТХ нь 108 сая төгрөгөөр араас нэхэж орж ирсэн аж. Энэхүү олон зуун сая төгрөгийн алдаа илэрдэггүй нь шилэн дансны мэдээлэлдээ оруулдаггүй байсаных гэнэ. Бас л нөгөө ЗДТГ хөрөнгө оруулалтын зардлын 1,9 тэрбум төгрөгийн мэдээллийг ил тод оруулаагүй явсаар иржээ. Ил тод оруулахаас ичмээр зүйл ч зөндөө илэрсэн. Үүний нэг жишээ нь амралтын газрыг давхардуулан байгуулж 300 гаруй сая төгрөгийн үрэлгэн зарцуулжээ. Тус дүүрэг нь 605 сая төгрөгийн хөрөнгөтэй ахмадын амралтын газартай ч тэр нь нэг ч удаа орлого олоогүй аж. Гэтэл дүүргийн удирдлага ижил үйл ажиллагаа явуулдаг “Хоймор хайрхан” амралтын сувилалын газрыг ОНӨААТҮГ-аар нэмж байгуулан өнгөрсөн онд 70 сая төгрөгийн хөрөнгө оруулж, 238 сая төгрөгөөр санхүүжүүлсэн байна. Зөвхөн энэ жишээ л энэ дүүргийн дарга нарыг ямар “мундаг” менежерүүд болохыг яруу тод харуулжээ.

Тавантолгой түлшийнхэн 1000 ширхэг мод тарилаа
ЭТТ: Ажилтан шалгаруулж авна
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!