Шадар сайдын удирдлаганд ажилладаг Үндэсний итгэмжлэлийн төвийн даргын албан үүргийг түр орлон гүйцэтгэгчээр ажиллаж байгаа С.Соронзонболдод холбогдох жил гаруй үргэлжилсэн хэргийг Баянзүрх дүүргийн Эрүүгийн хэргийн анхан шатны шүүх хэлэлцэн шийдвэрлэж, шийтгэх тогтоолоо гаргажээ.

Тодотговол, нийслэлийн Прокурорын газраас түүнд Эрүүгийн хуулийн 22.1.1 дэх хэсэгт заасан “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал бий болгосон” гэх үндэслэлээр яллах дүгнэлт үйлдэн ирсэнийг шүүх хэлэлцээд гэм буруутайд тооцож, нийтийн албанд ажиллах эрхийг гурван жил хасаж, 7.2 сая төгрөгөөр торгох ял шийтгэжээ

Саяхан Засгийн газрын хэрэг эрхлэх газрын дарга, Д.Амарбаясгалан “Сонгон шалгаруулалтгүй томилогдсон 800 төрийн албан хаагчдыг дөрөвдүгээр сарын 6-ны дотор ажлаас нь чөлөөлөх”-ийг үүрэгдсэн байдаг. С.Соронзонболд нь мэргэжлийн бусаас гадна сонгон шалгаруулалтгүй томилогдсон байна. Итгэмжлэлийн байгууллагын нэр хүндийг унагасан авлигач даргыг Шадар сайд С.Амарсайхан чөлөөлж сонгон шалгаруулалт зарлах юм байна. Хэргийг эргэн сануулахад С.Соронзонболд нь 2022 оны нэгдүгээр сарын 14-нд “Меика Монголиа” компани буюу “Сос медика” эмнлгийн харъяа эмнэл зүйн лаборатори нь MNS ISO 151895/2015 стандарт шаардлага гэх Техникийн хорооны шинжээчдийн зөвлөмж, дүгнэлт гарсан байхад ML 18 дугаартай “Стандартын шаардлага хангасан” тухай итгэмжлэлийн гэрчилгээ гарган өгсөн байна.

Уг нь “Оюутолгой” компанийн ажилчдаас шинжилгээ авдаг “Медика Монголиа” ХХК-ийн “Сос медика” лабораторийнхон өөрийн байранд бус, ХӨСҮТ-д дээжээ хүргүүлэн шинжлүүлж байсан бөгөөд тус компанийнхан ХӨСҮТ-тэй “Төлбөрт тусламж, үйлчилгээ үзүүлэх” гэрээ байгуулан дээжээ шинжлүүлэн хариуг нь гэрэгэ системд өөрийн байгууллагын албан баланк дээр гаргаж байсан юм. Өөрөөр хэлбэл, тусгай зөвшөөрөлгүй үйл ажиллагаа явуулсан гэсэн үг. Тодруулбал, MNS ISO15189:2015 стандартын шаардлага хангасан гэрчилгээгүй ажиллаж байв. “Медика Монголиа” ХХК-ийн “Сос медика” лабораторид ҮИТ-ийн дарга С.Соронзонболд албан тушаалаа урвуулж, Стандартчилал, техникийн зохицуулалт, тохирлын үнэлгээний итгэмжлэлийн тухай хууль, Итгэмжлэлийн гэрээ байгуулах, гэрчилгээ олгох журмаа зөрчин давуу байдал олгосныг шүүх ийнхүү тогтоолоо.

Tumen.mn