Улиас тайрсан гэдгээр сүр дуулиантай олны хэл ам дагуулан эхэлсэн Бага тойруугийн 2,4 км урттай 2ф250/300мм голчтой хос дулаан, цэвэр, бохир усны /4а,б магистраль/ шугамыг 2ф400мм болгож өргөтгөн шинэчлэх ажил энэ амралтын өдрүүдээр үргэлжилж байна.

Дэлхийн банкны санхүүжилтээр хийгдэж байгаа шугамын Гүйцэтгэгчээр нь “Есөнталст оргил констракшн” ХХК, “Хангилцаг” ХХК-иуд шалгаран ажиллаж байна. Төсөвт өртөг нь 14 тэрбум төгрөг. Хотын төвийг бүхэлд хамрах энэ шугамыг сольсноор нийслэл хотын 400 гаруй мянган хүн ам 25-30 жилдээ цэвэр ус дулаанаар айх аюулгүй болно гэдэг тайлбарыг албаныхан өгч байлаа. Мөн энэ шугамын ажлыг зунжингаа ухаад орхих биш 300 метрээр таслан хийж, хийсэн газраа хуучин байсан байдалд буцаан оруулах байдлаар явна гэдгийг хотын Ерөнхий менежер М.Баяраа мэдэгдэж байсан. Мөн тэрээр авто зам таарсан хэсэгт хонгилын систем оруулах нь манайд анх удаагийн тохиолдол бөгөөд засвар гэмтэл гарсан үед замаа эвдлээд байхгүй болно хэмээн хэлсэн.

Бид энэ удаа газар нь бодит байдлын мэдээллийг хүргэхээр Хуучин шугамын труба нь үнэхээр муудсан уу? Шинэ труба нь чанарын шаардлага хангаж байгаа эсэх мэргэжлийн байгууллагын шинжилгээний хариуг тодруулахаар очсон боловч ажлын өдрүүдээр БХБЯ, Дэлхийн банкныхнаас асуух нь зүйтэй тэндээс тендэр сонгон шалгаруулалтыг хийсэн бид гүйцэтгэгч гэсэн тайлбарыг өгөв. Бид энэ тухай дараагийн сурвалжлагаараа хүргэх болно.