Өдгөөгөөс 30 гаруй жилийн өмнө монголчууд эрх чөлөөний туган дор нэгдэж, хонхны дуунд жагсаж байсан бол одоо төрд нүүрлэсэн төрөл бүрийн хулгайг арилгах, эздэд нь хариуцлага тооцохыг хатуу шаардан эсэргүүцсээр байна. Үүний дагуу шударга ёсны төлөө Засгийн газраас “Таван Ш” ажиллагаа хэрэгжүүлж ихээхэн үр дүнтэй байгаа ч зарим нэг нөхөд шүглийн дуунд үл цочиж, шүүр ажиллагаанд ч өртөхгүй байгаа нь олны анхаарал татаж байна.

Тэдний нэг бол өдгөө шүүхээс авлигын хэргээр ял сонсоод байгаа Үндэсний итгэмжлэлийн төвийн даргын түр орлон гүйцэтгэгч С.Соронзонболд юм. Үнэн хэрэгтээ бүх хулгайн үндэс нь төрийн албаны хулгай гэдэгтэй хэн ч маргахгүй. Төрд нүүрлэсэн хулгайг эрхтэн дархтан л хийж чаддагаараа илүү аюултай. Сүүлийн жилүүдэд “Ковидын хууль” буюу “Коронавируст халдвар /ковид-19/-ын цар тахлаас урьдчилан сэргийлэх, тэмцэх, нийгэм эдийн засагт үзүүлэх сөрөг нөлөөллийг бууруулах тухай хууль”-ийг далимдуулан төрийн албаны дадлага туршлагагүй, чадваргүй мэргэжлийн бус, хамт олондоо хүлээн зөвшөөрөгдөөгүй олон албан хаагч төрд ажиллаж байгаа талаар Засгийн газрын хэрэг эрхлэх газрын дарга, Монгол Улсын сайд Б.Амарбаясгалан саяхан мэдэгдэн, шүүрдэж дуусгана хэмээн олон нийтэд зарлаад багагүй хугацаа өнгөрлөө.

Одоогийн байдлаар “Шүүр” ажиллагааны дээд түвшин болох яамдын Төрийн нарийн бичгийн дарга, агентлагийн дарга нарыг шүүрдсэн бөгөөд сонгон шалгаруулалт зарласан байна. Сонгон шалгаруулалтыг аль нэгэн даргын захиалгын хүнд тохируулан явуулбал авилгыг дэмжсэн хэрэг болно. Ер нь төрийн албыг хувийн компани шигээ ноолдог өвчин манай дарга нарын архаг өвчин гэж хэлж болох юм.

Тухайлбал, Стандарт, хэмжилзүйн газрын даргын сонгон шалгаруулалт зарлагдалгүй бүтэн таван жилийн нүүр үзсэн бөгөөд энэ хугацаанд Шадар сайд асан Ө.Энхтүвшингийн ойрын хүн болох Б.Билгүүн гэгч хуульгүй юм шиг даргалж ажил нь навс унасан гэдгийг салбарынхан дуу нэгтэй хэлдэг.

Гэтэл саяхан Төрийн албаны зөвлөлийн цахим мэдээлэлд Шадар сайд асан Ө.Энхтүвшингийн 2019 онд баталсан ажлын байрны тодорхойлолтыг байршуулсан байх бөгөөд Б.Билгүүний мэргэжил, шаардлагад яг тохирсон байна. Энэ нь хэдхэн сарын өмнө салбартаа гологдож, хаалгаар шүүрдээд явуулсан хүн тооноор ороод ирэх юм биш биз хэмээн салбарынхан ихээхэн хардах болжээ. Ийнхүү Шадар сайд С.Амарсайхан шүгэл ажиллагааг дэмжиж хууль бусаар ажиллаж байгаа дарга нарыг сайн шүүрдэх байх гэсэн итгэл салбарынханд бий. Ийнхүү мэргэжлийн бус салбарынхандаа хүлээн зөвшөөрөгдөөгүй нөхөр таван жил үүрэг гүйцэтгээд “шүүр” ажиллагааны зарчмаар ажлаасаа буусан ч ахиад сонгон шалгаруулалтад оролцохоор дарга нарын чихнээс хонх уяж явааг салбарынхан хэлж байна.

Мөн Үндэсний итгэмжлэлийн төвийн даргын түр орлон гүйцэтгэгч С.Соронзонболд нь 2020 онд ямар ч сонгон шалгаруулалтгүй орж ирсэн бөгөөд өнгөрөгч 2022 онд “Медика Монголиа” компани буюу “Сос медика” эмнэлгийн харьяа лабораторид эрх мэдлээ урвуулж бусдад давуу байдал олгосон үндэслэлээр АТГ-аас шалгаж Нийслэлийн Прокурорын газраас яллах дүгнэлт үйлдэн Баянзүрх дүүргийн Эрүүгийн хэргийн анхан шатны шүүхээр гэм буруутай нь тогтоогдсон. Түүний ажлын алдаа дутагдал хууль зөрчсөн үйлдлүүдийн талаар Шадар сайдад удаа дараа гомдол очиж АТГ, төрийн албаны зүгээс энэ байгууллагын даргын албан тушаалд сонгон шалгаруулалт явуулахыг шаардсан албан тоотууд хүргэгдэж байсан боловч чимээгүй өнгөрсөн.

Харин энэ удаад Засгийн газар, холбогдох байгууллагууд энэ байдалд бодитой алхам хийж сонгон шалгаруулна гэсэн итгэл үнэмшил байна. Энд зөвхөн Б.Билгүүн, С.Соронзонболд нарыг онцлоод байгаа болохоос бус “Ковидын хууль”-иар далимдуулан хуудуутай томилогдож, өдгөө ч хууль зөрчин алба залгуулж байгаа цөөнгүй нөхөд бий. Засгийн газраас “Таван Ш” ажиллагааг зориглон эхлүүлсэн. Үүний хүрээнд төрд бугшаад байсан томоохон дээрэм тонуул, авлига албан тушаалын гэмт хэргийг илрүүлж, хариуцлага тооцож байгааг олон нийт талархалтай хүлээн авч байгаа. Харин томоохон гэмт хэргийн дуулиан, бусад мэдээллийн давлагаанд сугарч үлдээд байгаа хууль бус алба хаагчид, дарга нараа явуулах цаг болсныг ч хэлж байна.

С.БАЯР

Эх сурвалж: ӨГЛӨӨНИЙ СОНИН