ОХУ-ын Ерөнхийлөгч Владимир Путин дайны сурвалжлагч нартай Кремльд уулзах үеэрээ Оросыг үр тарианы хэлэлцээрээс гарахыг үгүйсгэсэнгүй.
"Бид одоо энэ үр тарианы хэлэлцээрээс гарах талаар бодож байна. Ялангуяа хөлөг онгоцууд явдаг эдгээр коридорыг Украин нисгэгчгүй онгоц, далайн нисгэгчгүй онгоц хөөргөхөд байнга ашиглаж байна" гэж тэрбээр хэлжээ.
Түүний хэлснээр, ОХУ уг хэлэлцээрээс гарсан тохиолдолд Украинаас тээвэрлэсэн хэмжээний үр тариаг ядуу буурай орнуудад үнэ төлбөргүй нийлүүлэхэд бэлэн байна. "ОХУ Украины төлөө биш, харин ядуу буурай орнуудын төлөө үр тарианы хэлэлцээрт оролцож байна" гэж ОХУ-ын Ерөнхийлөгч хэлжээ. В.Путин мөн Африкийн хэд хэдэн орны удирдагчид тус улсад айлчлах гэж байгааг мэдээлээд, тэдэнтэй үр тарианы хэлэлцээрийн талаар хэлэлцэнэ гэж мэдэгдсэн байна.
Украины үр тариа, хүнс, бордоог Одесса зэрэг гурван боомтоос Хар тэнгисээр экспортлох тухай энэхүү гэрээг Орос, Турк, Украин, НҮБ-ын төлөөлөгчид 2022 оны долоодугаар сарын 22-нд анх байгуулсан бөгөөд энэ оны гуравдугаар сард 60 хоногоор, тавдугаар сард дахин хоёр сараар сунгасан. Хөлөг онгоцуудын хөдөлгөөнийг Истанбул дахь Хамтарсан зохицуулах төв зохицуулж байгаа юм.
ОХУ-ын Ерөнхийлөгч В.Путин дайны сурвалжлагч нартай даваа гарагт уулзсан байна. Уулзалт хэдэн цаг үргэлжилсэн бөгөөд энэ үеэр тэрбээр өргөн хүрээний асуудлаар санал бодлоо илэрхийлжээ. Тухайлбал, өнөөдрийн байдлаар Орост дайчилгаа явуулах шаардлагагүй байгаа, Оросын дайны цаашдын үйл ажиллагаа нь "Украины сөрөх довтолгоо дуусах үеийн нөөцийн харьцаанаас шалтгаална" гэж тэрбээр үзэж байна.
Д.Жаргал
Эх сурвалж: "Монцамэ" агентлаг
