Хөрөнгөлөг сайд Б.Чойжилсүрэн маань 177 тэрбум төгрөгөөр урьд хөршөөс боловсруулсан нүүрс авч, улаанбаатарчуудыг утаагүй өвөлжүүлэхээр 40 сэтгүүлчийн хамт урьд хөршийг зорьжээ. Эрчим хүчний сайд болсон даруйд “Дулаан хангамжийн асуудал хүнд байгаа, цаашид хэрхэн ажиллах вэ” гэсэн сэтгүүлчийн асуултад “Аргална даа” гэхээс өөр хэлэх үггүй зогссон сайдын эцсийн арга хэмжээ нь урьд хөршөөс 177 тэрбум төгрөгөөр боловсруулсан нүүрс авах л байжээ. Одоо тэр өмнөд хөршийн түлшний үйлдвэртэй сэтгүүлчдийг танилцуулахаар аялж явна. Уг нь төсвийн мөнгөөр Хөх хот руу 40 сэтгүүлч зугаацуулж явахаар түлш эрчим хүчний 40 ажилтан, инженер техникийн нөхдийг аваад явсан бол аятай юу гэх шүүмжлэлд бас өртөөд авав. Аргагүй үнэн зүйл. Салбарын 40 ажилтан аваад явсан бол “Юм үзэж нүд тайлсан” туршлага бүхий 40 алба хаагчтай болохгүй юу, мөн ч тоогүй зүйл хийдэг сайд шүү.
Төсвийн мөнгө ямар уйлах биш дээ. “Төрмөл сайд” Б.Чойжилсүрэн хэдэн сэтгүүлчийг өмнөд хөрш рүү аялуулаад энэ өвлийг “Аргална даа” гэж байгаа бололтой. Аль ч төрийн өнгөнд мэдлэг чадвараар бус хөрөнгөөр зодоод сайд болчихдог нөхөр ёстой л “аргалах”-аар яваа нь энэ ажээ.
Уг нь хөөрхий, Эрчим хүчний сайд болсон даруйд утаа их байгаа гэх шүүмжлэлд өртсөн Б.Чойжилсүрэн Байгаль орчин аялал жуулчлалын сайд руу нэг бухаж үзээд бараагүй. Яаж болох билээ. Түлшний үйлдвэр нь Эрчим хүчний яамны харъяа шүү дээ. Мань эр статусаа ч ойлгоогүй байж ч мэднэ. Тиймээс эхний ээлжинд түүхий эдийг солих буюу одоо байгаа мидлинг хагас коксжих нүүрсээр солих туршилт хийсэн. Үүнд Орчны бохирдлыг бууруулах газраас 242 сая төгрөг гаргаж, БНХАУ-ын үйлдвэрүүдэд очиж судалсан. Мөн Солонгос, Японы туршлагыг судалж үзсэн. Бусад орнуудын туршлагаас судлахдаа Хятадад байгаа технологийг хэрэглэх шийдвэр гаргасан юм билээ. Тиймээс одоо судлуулах, туршлага солилцуулах, ажилчдаа дадлагажуулах биш сэтгүүлчдийн амыг хаах зорилгоор төсвийн мөнгөөр зугаалж явна. Ингээд эцэст нь нийслэлээс 177.5 тэрбумын бонд гаргасан тохиолдолд 115 мянган тонн хагас коксжих нүүрсийг ойрын хугацаанд буюу ирэх арваннэгдүгээр сарын 15-н гэхэд тендерийг зарлаж, үйлдвэрлээд 2023 оны арванхоёрдугаар 15-наас 2024 оны арванхоёрдугаар сарын 31 хүртэл түлж, туршиж үзье гэсэн санал оруулсан юм билээ. “Аргална даа” сайд маань энэ үеэр хэлэхдээ “Туршилтаас айхгүй байгаа” хэмээж зогсоно лээ. Түүний хийж чаддаг ажил ердөө л энэ. Нийслэлчүүд ийм сайдтай энэ өвлийг хэцүүхэн давна гэдэгт итгэлтэй, сэтгэл зүйн бэлтгэлтэй байх хэрэгтэй. Салбарын сайд маань “аргалж” л таарна.
Tumen.mn
