Аляскийн төв хэсгийн хүн ам сийрэг суурьшсан бүс нутагт 1970 оноос хойш 20 мянган хүн сураггүй болжээ. Нисэх онгоц, усан онгоцууд сураггүй болдгоороо алдаршсан Бермудын гурвалжингийн талаар хүн бүхэн сонссон ч Аляскийн гурвалжин төдийлөн сайн мэдэхгүй. Тус гурвалжин нь хойд эргийн Барроу болон өмнөд эргийн Анкорэйж, Жунау хотуудын хооронд оршдог.

Аляскийн гурвалжинг Бермудын гурвалжингийн адилаар хүчтэй цахилгаан соронзон орон, тэр бүү хэл харь гаригийн үйл ажиллагаатай хүртэл холбон тайлбарладаг.

Нутгийн ард иргэдийн дунд хүмүүсийг айлган сүрдүүлдэг алмасын тухай домог яриа ч байдаг аж. Домогт дурдсанаар 1950-иад онд нэгэн үл мэдэгдэх амьтан тосгоны оршин суугчид руу дайрч, хүмүүсийг айлган, хөнөөсөн гэдэг.

АНУ-ын төлөөлөгч Хейл Боггс, Ник Бегич нар 1972 онд онгоцтойгоо сураггүй алга болсноор Аляскийн гурвалжингийн тухай яриа анх гарч байв. Тухайн үед бараг 40 хоног хайсан ч онгоцны сэг, хүмүүсийн цогцос олдоогүй. Тэд Анкорэйжээс Жунауг зорин явж байжээ. Сүүлийн үеийн тохиолдлоос дурдвал, 2019 онд 43 настай Шанна Оман найзтайгаа уулзахаар гараад сураггүй болсон. Түүнийг нисдэг тэрэг, үнэрч нохой ашиглан олон хоног хайсан ч олоогүй. Мөн Аляскаас Монтана руу явж байсан "Douglas C-54 Skymaster" онгоцтой 44 цэрэг алга болсон нь хамгийн олон хүн сураг алдарсан тохиолдол юм.

Дэлхийн хүн амын нягтаршилын тайланд мэдээлснээр Аляскийн бүс нутгийн ердөө нэг хувьд нь л хүн амьдардаг. Гэвч бусад мужтай харьцуулахад хамгийн их хүн сураггүй алга болжээ. Тодруулбал, 100 мянган хүн тутамд 42.16 хүн алга болсон гэж тооцоолсон байна. Сураггүй алга бологсдынхоо тоогоор Аризона муж хоёрдугаарт оржээ.

Дэлхийн хоёрдугаар дайнаас хойш үл мэдэгдэх нисдэг биетүүд үзэгдэх нь ихэссэнийг шинжээчид хэлж буй. Аляскийн хүн ам сийрэг байдаг нь харь гаригийнхныг татдаг гэх таамаглалыг зарим шинжээч дэвшүүлжээ.

Эх сурвалж: DAILY MAIL