Засгийн газар өнөөдөр /2023.11.22/ хуралдаж, гаргасан зарим шийдвэрийн талаар Монгол Улсын сайд, Улаанбаатар хотын түгжрэл хариуцсан Үндэсний хорооны дарга Б.Дэлгэрсайхан дараах мэдээллийг өглөө.

Тэрбээр, "Нийслэл хот олон төрөлт, нийтийн тээврийг хөгжүүлэх, иргэдийн ая тухтай байдлыг хангах, аюулгүй хурдан тээвэрлэх их багтаамжийн тээврийн хэрэгсэл буюу метроны асуудлыг өнгөрсөн 11-р сарын 15-нд Засгийн газрын хуралдаанаар танилцуулсан. Үүнтэй холбогдуулан өнөөдрийн хуралдаанаар Засгийн газар үүрэг өглөө. Тодруулбал, ТЭЗҮ боловсруулах, зураг төслийг ойрын хугацаанд яаралтай хийх үүрэг даалгаврыг өглөө. ТЭЗҮ болон зураг төслийн мөнгийг нийслэлийн төсвөөс гаргахаар шийдвэрлэсэн. Олон улсын тендер зарлаж, шалгаруулна. Үүний дараа барих, ашиглах ажлууд хэрэгжинэ.

Одоогийн урьдчилсан төлөвлөгөөгөөр ирэх оны тавдугаар сараас бүтээн байгуулалтын ажил эхэлнэ. Харин 2028 онд ашиглалтад орох тооцоотой байна" гэлээ.