Энэ сарын 29-ний өдрөөс нэгдүгээр сарын 02 хүртэл бүх нийтээр амрах хуваарьтай. Харин сурагчдын хоёрдугаар улирлын амралт нэгдүгээр сарын 08-ны өдөр эхлэхээр байсан. Иймд БШУЯ тус асуудалд анхаарч сурагчдын өвлийн амралтын эхлэх өдрийг дөрөв хоногоор урагшлуулахаар болсон. Учир нь шинэ жилийн дөрөв хоногийн амралтаар гэртээ харих орон нутгийн сурагчдад болоод тэдний эцэг эхэд хүндрэл учирна хэмээн үзсэн юм.
Тодруулбал, шинэ жилийн амралт дуусмагц сурагчид дөрөвхөн хоног хичээлдээ суухын тулд дахин холоос сургуульдаа ирэх шаардлага үүснэ. Ингээд сурагчдын амралт эхэлмэгц буюу дөрөвхөн хоноод буцаад гэртээ харих нөхцөл байдал үүсэх учир үүнийг чирэгдэлгүйгээр шийдвэрлэхээр хэлэлцэж энэ сарын 29 болгосон билээ.
Тэгвэл Боловсрол, шинжлэх ухааны яам энэхүү шийдвэртээ дахин нэмэлт өөрчлөлт оруулахаар болжээ. Учир нь цаг агаар эрс хүйтэрч, хичээл сургуулийн хэвийн үйл ажиллагаанд нөлөөлөхүйц нөхцөл байдал үүсээд байгаа тул сурагчдын амралт эхлэх өдөр хүртэлх хичээлийг цахим хэлбэрт шилжүүлэхээр шийдвэрлэсэн байна.
Тодруулбал, энэхүү шийдвэрээ тус яамнаас өнөөдөр олон нийтэд танилцуулах бөгөөд арванхоёрдугаар сарын 18-ны өдрөөс 28 хүртэлх ес хоногийн хичээлийг цахим хэлбэрт шилжүүлэх, эсвэл 18-наас 22-ны өдөр хүртэл сурагчид цахимаар хичээллээд, хоёрдугаар улирлын амралт энэ сарын 25-наас эхлэх ийм хоёр хувилбарын аль нэгийг сонгох аж.
