-ЭРХ БАРИГЧИД ИРГЭН БҮРД 116 МЯНГА, ШИНЭ НАМ ИРГЭН БҮРД 308 САЯ ТӨГРӨГ-
Нэг жил гаруйхны өмнө “Эрдэнэс Тавантолгой” компанийн дотоод гадаад нөхцөл байдал хүндэрч, Засгийн газраас Бүрэн эрхэт төлөөлөгч томилж байв. Гэтэл эрх баригчид “Эрдэнэс Тавантолгой” компани ихээхэн ашигтай ажилласан, ногдол ашиг тараана хэмээн ард олондоо гэнэт “хайр зарласан” нь санаандгүй хэрэг биш. Өнөөх л сонгууль угтсан ажиллагаа, санал худалдан авах технологио ажиллуулж эхэллээ. Үүгээрээ ногдол ашиг авах гэж байгаа иргэдээ буруутгаж байгаа хэрэг биш. Хамгийн гол нь эрх баригчид нийгмийн байдал хүндэрсэн үед цалингүй, орлогогүй иргэдийг басамжилж 116 мянган төгрөгийн ногдол ашиг олгоно гэж байгаа.
Тэгвэл “Эрдэнэс Монгол” хувьцаат компанийн гүйцэтгэх захирал С.Наранцогт “Өнгөрөгч 2023 оны санхүүгийн эцсийн тайлан тооцоо гараагүй байна. Урьдчилан таамаглаж байгаагаар бол 2.3 их наяд төгрөгийн ашигтай гэж гарах болох болов уу. Үүнээс иргэдэд ногдол ашиг хүртээнэ гэвэл иргэн тус бүрд 200 орчим мянган төгрөг ногдоно. Гэхдээ ногдол ашиг тараавал компани дампуурна. Компани хэдийгээр ашигтай ажилласан ч компанид 4.6 их наяд төгрөгийн өр үүссэн..” гэж байв. Харин үүний дараа МАН-ын бүлгийн дарга Д.Тогтохсүрэн “Эрдэнэс Тавантолгой” компани 2023 онд 3.1 их наяд төгрөгийн ашигтай ажилласан. Тиймээс иргэддээ 450-500 шахам мянган төгрөгийн ногдол ашиг өгөхөөр судалж байгаа” хэмээсэн.
Орлогогүй ажилгүй иргэд ийнхүү 116 мянган төгрөг өгнө гэсэн эрх баригчдын төөрөгдүүлсэн байр суурийг даган хуйларч байна. Уг нь иргэд маань нэг удаа өчүүхэн ногдол ашиг авах бус ШИНЭ намаас өргөн барьсан бодлогыг анхаарч, өргөн барьсан хуулийг тууштай дэмжиж орд газраа өөрсдөө 100 хувь өмчлөх боломж байсан уу гэвэл байсан. ШИНЭ намын эрдэмтдийн баг урт хугацаанд судалж, Тавантолгой орд газрыг 100 хувь ард түмний өмч болгох боломжтойг гаргаж тавьсан төдийгүй хууль санаачилан УИХ, Засгийн газарт өргөн барьсан ч авч хэлэлцээгүй.
Жагсаж тэмцээд төр ч авч хэлэлцээгүй, өдгөө өчүүхэн ногдол ашиг хараад сууж байгаа ард түмэн ч дэмжээгүй. Уг өнөөдөр бид цөөн хэдэн төгрөгийн ногдол авах тухай баярлаад суух биш юм. Иргэн хүн өөрийнхөө өмчид эзэн байх бүрэн боломж байгаагаа дэмжих шаардлага байгаа. ШИНЭ намаас санаачилсан хуулиар бол Монгол Улсын иргэн бүр 308 сая төгрөг эзэмших эрхтэй. Нэг гэр бүл дундажаар нэг тэрбум гаруй төгрөгийн өмчтэй болох боломжтой байв. Үүнийг дэмжих ёстой байлаа. Гэхдээ энэ нь ингээд өнгөрөх асуудал биш. Зөв бодлого гаргаж тавьж байгаа ШИНЭ нам үйл ажиллагаа явуулж байна. Тэд энэхүү бодлого, төлөвлөгөө тэмцлээ орхихгүй. Ард иргэдийнхээ талд шийдвэрлүүлэхийн төлөө явна гэдгийг ойлгох хэрэгтэй.
Үнэн хэрэгтээ өнөөдөр 116 мянган төгрөг тараагаад яах юм. Үүнийгээ ямар нэг бүтээн байгуулалтад оруулчих хэрэгтэй. Дулааны цахилгаан станц барихад яагаад болохгүй гэж. Монгол Улсын эрчим хүчний хэрэглээний 30 хувийг хангах Бөөрөлжүүтийн цахилгаан станцыг барихад 500 орчим сая ам.доллар болж байна. Тэгэхээр “Эрдэнэс Тавантолгой” компанийн 2022, 2023 оны ашгаар бариад цаана нь илүү гарна. Энэ мэтээр эрчим хүчний хараат байдлаар гарахад зарцуулах шаардлага байна.
Tumen.mn
