Шатахуун түгээх станцууд дахин бензиний хомсдолд ороод байна гэх иргэдийн шүүмжлэл нэмэгдэв.
Энэ дагуу бид Ашигт малтмал, газрын тосны газраас тодруулахад холбогдох эх сурвалж "Бензиний нийлүүлэлт хэвийн байгаа. Агуулахаас ШТС-уудад 22:00 цагаас хойш тээвэрлэлт хийдэг тул хот доторх түгээлттэй холбоотой процессын асуудал гарч байгаа. Ачаалал ихтэй ШТС-уудад өдөрт 3-4 удаа татан авалт хийдэг. Шөнийн тээвэрлэлт хийгдсэн ч өдөр нь дуусчихдаг. Амралтын өдрүүдэд зарим агуулах амардаг тул Даваа гарагт ШТС-уудад бензин тасалдах асуудал гарч байна. Аюултай ачаа тээвэрлэлт тул зөвхөн оройн цагаар л тээвэрлэлт хийгддэг. ШТС-ууд аль замаар, хэдий хугацаанд тээвэрлэлт хийх тухай зөвшөөрлийг Зам тээврийн хөгжлийн яамнаас авдаг" хэмээсэн.
Харин хэвлэлийн төлөөлөгч П.Мөнхжаргал "Албаны хүмүүс хуралдаж дууссаны дараа нэгдсэн мэдээлэл өгөхөөр төлөвлөж байна. Одоогоор дэлгэрэнгүй тайлбар өгөх боломжгүй" гэлээ.
Ташрамд дурдахад манай улсын хувьд сар бүр 110,000 тонн ДТ, 55,000 тонн АИ-92 автобензинийг хэрэглэдэг ба үүний 95 хувийг ОХУ-аас худалдан авдаг. 2024 оны 1, 2, 3 дугаар саруудад тус бүр ДТ 140,000 тонн, АИ-92 90,000 тонн автобензинийг худалдан авахаар захиалгаа баталгаажуулжээ.
