Шинэ Засгийн газар байгуулагдаад хэдхэн хонож байна. Засгийн газрын бүрэлдэхүүн, болж буй үйл явдлаас харахад бодитой томоохон өөрчлөлт гарна гэхэд хэцүү харагдана. Яагаад гэхээр бодлого, тогтолцоог өнгийгөөд харчих сайд нар нэн ховор. Ядахад урьд өмнө Боловсролын сайдаар ажиллаж байсан Л.Энх-Амгалан Гэр бүл, нийгэм, хөдөлмөрийн сайдаар томилогдсон. Тэр Боловсролын сайдаар ажиллахдаа ямар ч өөрчлөлт хийгээгүй, хичээлийн жилийг гурван улиралтай байсан бол дөрөв болгон өөрчилсөн ганцхан ажил бий. Суурь тогтолцоо, бодлогод огт анхаараагүй. Чадах ч үгүй биз.

Одоо шинэ яам байгуулуулж, бэлгийн замаар авчихаад “Монгол Улсын хэмжээнд бүх нийтээр тэмдэглэх 16 баярын өдрөөр 16 удаа амардаг. Үүнийг цөөлж, үндэсний их баяр наадам, сар шинийн баярын амралтын өдрийг нэмэгдүүлэх нь зөв зохицуулалт болох талтай нь ажиглагдаж байна” хэмээн жиргэжээ. Түүний хийж чадах ажил бол энэ мэтээс хэтрэхгүй. Ерөөсөө анхнаасаа хувийн цахим орчин болон бусад сүлжээнд популизм хийдэг л сайд байсан. Тэгэхээр шинэ тутам яамнаас ямар нэгэн зүйл хүсэх хэрэггүй болж байна. “Эм Си Эс”-ийн сайдад өөр хийж чадах зүйл байхгүй л дээ.

Нөгөө талаас Боловсролын сайд болсон П.Наранбаяр нь сайдын анхны тушаалаараа Л.Энх-Амгалангийн хичээлийн жилийн улирлыг дөрөв болгон өөрчилснийг гурав болгон өөрчилж байна. Аль аль нь үнэхээр хийх зүйлээ олж ядаж байна. Хамгийн наад зах нь Боловсролын багц хуулийг баталсан, үүнийг хэрэгжилтийг хангуулах талаар ямар нэг үг ч дуугарсангүй.

Тэрбээр Н.Энхбаярыг мандаж явах үед Байгаль орчны яаманд мэргэжилтнээр ажлынхаа гарааг эхлүүлж, Байгаль орчин, аялал жуулчлалын яамны Аялал жуулчлалын газрын орлогч дарга хүртэл арваад жил ажилласан хүн.

Харин Н.Энхбаяр улс төрөөс явж, тэр ч Шинэ Монгол” сургуулийн захирлаар ажилласан түүхтэй. Н.Энхбаяр эргэж сэхэх нь бүү хэл хүүгээ яая гэж байгаа энэ үед тэрээр ХҮН намыг бараадан, ийнхүү сайдын суудалд заларсан. Үүнээс харахад боловсролын салбарт дорвитой өөрчлөлт хийхгүй нь ойлгомжтой. Хийсэн ч “Шинэ Монгол” гэх мэт хувийн сургуулийн эрх ашигт нийцүүлэх нь дамжиггүй. Шинэ цагийн сайдууд нэгнийхээ урьд өмнө хийснийг өөрчлөх, амралт, зугаалгын цагийг солих, байшин барилгын өнгө өөрчилж, ширээ сандлаа шинэчлэхээс өөрөөр хийж байсан зүйл байхгүй. Л.Энх-Амгалан, П.Наранбаяр нар ч үүнийг л давтаж явна. Энэ хоёр сайдаас юу ч хараад хэрэггүйг анхныхаа тушаал, мэдэгдлээс л харууллаа.

Tumen.mn