Аймаг, нийслэл, сум, дүүргийн иргэдийн Төлөөлөгчдийн Хурлын 2024 оны ээлжит сонгууль энэ сарын 11-ний өдөр явагдах билээ. Аймаг, нийслэлийн түвшинд 1,992 нэр дэвшигчийг, сум, дүүргийн түвшинд 15,285 нэр дэвшигчийг шат шатны сонгуулийн хороод бүртгэж баталгаажуулаад байгаа юм.
Түүнчлэн нийт 17,277 нэр дэвшигч ийнхүү сонгогдох эрхийнхээ хүрээнд сурталчилгаагаа хийж буйтай зэрэгцэн иргэдийн сонгох эрхийг хангах асуудлаар холбогдох байгууллагаас өгч буй мэдээллээс хүргэе.
Сонгуулийн Ерөнхий Хорооноос /СЕХ/ байнга оршин суугаа хаягаасаа өөр газар ажиллаж байгаа иргэдийн сонгох эрхийг хангах асуудлаар мэдээлэл хийлээ. СЕХ-ноос сонгуулийн ирцийг хангах үүднээс улирлын чанартай ажил эрхэлж буй хүмүүс, хөдөө орон нутгийн хаягтай Улаанбаатар хотод сурч байгаа оюутнуудыг санал өгөх боломжоор нь хангуулах хүрээнд үе шаттай ажлуудыг зохион байгуулж буй аж.
Улсын хэмжээнд хөдөө орон нутгийн хаягтай Улаанбаатар хотод сурч буй 120 гаруй мянган оюутан, 1100-аад аж ахуйн нэгжид үндсэн хаягаасаа өөр газар улирлын чанартай ажил эрхэлж буй 60 гаруй мянган иргэн байгаа аж. Сонгуулийн санал хураалтын өдөр тав дахь өдөр юм. Тэгвэл хотод сурч буй оюутнуудын хувьд их дээд сургуулиуд нь оюутнуудаа үндсэн хаяг дээрээ очиж саналаа өгөх боломжоор нь хангуулах үүднээс 3,4 дахь өдрийн хичээлийг дараа нь нөхөх байдлаар зохицуулах зэргээр ярилцаж тохиролцжээ.
Уул уурхай, тээвэр ложистикийн компаниудын хувьд хуульд заасан үүргээ биелүүлж ажилчдаа чөлөө олгох, орон нутаг руугаа зорчиход нь зардал, унаа зэргээр дэмжлэг үзүүлж ажиллах шаардлагыг тавьжээ. Албаны хүний өгсөн мэдээллээс эшлэхэд, "Орон нутгийн хурлын сонгуулийн тухай хуулиар санал авах өдөр ажиллаж байгаа сонгогчид тухайн байгууллагын удирдлага чөлөө олгож, саналаа өгөх боломжоор хангах ёстой. Хэрвээ чөлөө өгч саналаа өгөх боломжоор хангахгүй бол тухайн ажил олгогч Зөрчлийн тухай хуулиар өндөр дүнтэй торгууль төлөх хэрэг гарна. СЕХ-ноос, цаашид цахим, урьдчилсан, шуудангаар зэрэг олон хэлбэрээр санал өгөх боломжийг нэвтрүүлэх шаардлагатайг тодотгож байна. Улсын хэмжээнд цахим дэд бүтцийн асуудал одоо л хангагдаж байгаа бөгөөд тоон гарын үсгийн хэрэглээний түвшин нэмэгдэж байгаа. Тиймээс дараагийн сонгуулиар цахимаар, шуудангаар, урьдчилсан санал авах зэрэг боломжуудыг хангаж өгөх ёстой гэж буй юм.
Tumen.mn
