УИХ-ын дэд дарга Б.Пүрэвдорж өчигдөр /2025.11.06/ чуулганы танхимаас ЭТТ ХК-ийн даргын үүргийг түр орлон гүйцэтгэгч Н.Цэрэнсамбууг "хөөсөн". Ингэхдээ түүнийг “Нүүрсний хулгайн хэрэгт хамгийн их нэр холбогдсон нөхөр” гэж цохсон юм.

Нүрэнзэдгомбын Цэрэнсамбуугийн хувьд “Эрдэнэс Тавантолгой” ХК-нд

• Санхүү, хөрөнгө оруулалтын газрын даргаар
• Худалдан авах ажиллагааны газрын даргаар ажиллаж байсан.

Энэ утгаараа нүүрс худалдаа, ЭТТ ХК-ийн санхүүгийн ойрын хэдэн жилийн үүх түүхийг сайн мэдэх хүмүүсийн нэг гэж хэлж болохоор. Нүүрсний хэрэгт холбогдон бичигдэж байсан дата мэдээлэл ч үгүй аж. Гэхдээ “Моннис” группийн Б.Чулуунбаатартай нэр холбогдож байсан бөгөөд “Сүхбаатар зүгийн хүн биз дээ. Би огт танихгүй” хэмээн сэтгүүлчдэд хариулж байжээ.

ЭТТ ХК-нд ажиллахаасаа өмнө

• Хувийн компаниудад Веб программист, программ хөгжүүлэгчээр,
• 2011 оноос Сангийн яаманд зөвлөхөөр
• 2017 оны үес Төрийн өмчийн бодлого, зохицуулалтын газарт албаны даргаар,
• 2019, 2020 оны үес Төрийн худалдан авах ажиллагааны газарт хэлтсийн даргаар тус тус ажилласан аж.
• 2023 онд ЭТТ ХК-нд орж иржээ.

ЭТТ ХК-нд орж ирээд “Тавантолгой төмөр зам” ХХК-нд давхар ТУЗ-ийн гишүүнээр ч суусан байна.

Товчхондоо, программист мэргэжилтэй залуу Сангийн яамнаас эхлээд төрд орж, улмаар ЭТТ ХК-ийн санхүү, худалдан авах ажиллагаанд хүртэл суужээ.

Түүний хамгийн сүүлд буюу 2024 онд АТГ-т мэдүүлсэн ХОМ-т:

• Өөрийн орлого 284 сая
• Гэр бүлийн орлого 58.6 сая
• 515 сая төгрөгөөр үнэлэгдэх хоёр орон сууцтай
• 30 саяар үнэлэгдэх Lexus, 470, Toyota, Crown маркийн хоёр автомашинтай
• 24 сая төгрөгийн малтай
• 2 сая төгрөгөөр үнэлэгдэх газартай
• 10 сая төгрөгийн үнэт эдлэлтэй
• 334 сая төгрөгийн хадгаламжтай
• Бэлэн мөнгө: 19 сая
• 7.8 сая төгрөгийн койнтой гэж мэдүүлжээ.