Орон нутгийн сонгууль орон даяар амжилттай зохион байгуулагдаж, өнөө орой 20.00 цагт өндөрлөлөө. Тиймээс Сонгуулийн ерөнхий хорооны дарга П.Дэлгэрнаран энэ тухай олон түмэнд мэдээлэл өгсөн.

Тэрбээр “Аймаг, сум, дүүрэг, НИТХ-ын сонгуулийн санал хураалт өглөө 7.00 цагаас орой 20.00 цагт явагдаж амжилттай өндөрлөж байна. Улсын хэмжээнд 21 аймгийн 558 тойрог 751, сумдын 1,642 тойрог 6,922, нийслэлийн 12 тойрог 45, дүүргийн 181 тойрог 313 мандатын төлөө санал хурааж, сонгууль амжилттай болсон. Бидэнтэй хамтарч ажилласан сэтгүүлчдэдээ маш их баярлалаа. Өнөөдрийн сонгуулийг амжилттай явуулахад нээлттэй ажилласан хэвлэл мэдээллийн үүрэг ихээхэн байлаа. Сонгуулийн үеэр ямар нэгэн хэрүүл маргаан гараагүй. Зарим нэг газарт тог цахилгаан тасрах асуудал үүссэн ч тухайн цагт асуудлыг шийдвэрлэж ямар нэг сөрөг зүйлгүй боллоо. Сонгуулийн ирц улсын хэмжээнд 53.1 хувьтай өндөрлөсөн, нэрсийн жагсаалтад байгаа 2.107.000 /хоёр сая нэг зуун долоон мянга/ сонгогч байгаагаас 1.116.000 /нэг сая нэг зуун арван зургаан мянга/ хүн саналаа өгснөөр сонгуулийн ирц 53.1 хувьтай болж өнгөрсөн. Одоо байгаа ирцэн дээр бага зэрэг нэмэгдэнэ. Энэ нь интернэт орчин байхгүй газар, үүрэн телефон байхгүй хилийн бүс орчмын цөөн хэсгийн хороодоос дүн мэдээ ирнэ” хэмээлээ.