Аймаг, нийслэл, сум, дүүргийн Иргэдийн Төлөөлөгчдийн Хурал (ИТХ)-ын 2024 оны ээлжит сонгуулийн санал хураалт аравдугаар сарын 11-нд болно. Үүнтэй холбогдуулан Сонгуулийн Ерөнхий Хорооны дарга П.Дэлгэрнаран сонгуулийн зохион байгуулалт болон бусад мэдээллийг өглөө.
Энэ үеэр тэр "Орон нутгийн сонгуулийн санал хураалт 2024 оны аравдугаар сарын 11-ний орой 20:00 цагаас улс орон даяар дуусаж, 20:00 цагт улсын бүртгэлийн төхөөрөмж автоматаар зогсоно. Үүнээс хойш дүн дамжуулах ажил явагдана. СЕХ-ны төв серверт хэсгийн хороодын санал тоолох төхөөрөмжийн дүнгүүд нэгтгэгдэх юм. Орон нутгийн ээлжит сонгуульд 8,031 мандатын төлөө 10 нам, нэг эвслийн 17,278 нэр дэвшигчид өрсөлдөж байна. Нэр дэвшигчдийн 32.3 хувь нь эмэгтэй хүн юм. Түүнчлэн нам, эвсэл бие даагчдын 104,500 менежер, шадар туслах сонгуулийн сурталчилгааг явуулсан. Аймаг, нийслэл, сум, дүүргийн иргэдийн Төлөөлөгчдийн Хурлын 2024 оны ээлжит сонгуулийн 2395 тойрог, 8031 мандатын төлөө 10 нам, 1 эвслээс 17010, бие даан нэр дэвшигч 268, нийт 17278 нэр дэвшигч шат, шатны сонгуулийн хороодоос нэр дэвшигчийн үнэмлэхээ авч, хуулийн хугацаанд сурталчилгаагаа хийж дуусгалаа. Санал авах, тоолох үйл ажиллагааг улсын хэмжээнд 17.800 гаруй ажиглагч хөндлөнгийн хяналт тавин ажиллаж байна. Улсын хэмжээнд 2230 санал авах байранд 2824 санал тоолох төхөөрөмжөөр сонгогчийн саналыг авахаар бэлтгэл хангалаа. Монгол Улсын хэмжээнд ашиглагдах бүх санал тоолох төхөөрөмж болон саналын хуудсыг нам, эвсэл, төрийн бус байгууллага хэвлэл мэдээллийн байгууллага, олон нийтийн нээлтэй оролцоотойгоор энэ сарын 7, 9-ний өдрүүдэд шалган туршиж, баталгаажуулсан. Санал авах ажиллагаа дууссаны дараа сум, дүүргийн сонгуулийн хороо харьяа бүх хэсгийн 50 хүртэл хувийг нь санамсаргүй сонголт /сугалах/-ын аргаар сонгож, хяналтын тооллого хийхээр хуульд заасан. Хэрэв маргаан, хардлагатай нөхцөл байвал 100 хүртэлх хувиар тоолж болох чиглэлийг бид өгч ажиллаж байгаа.Нийслэлийн Сонгуулийн Хорооноос нийслэлийн ИТХ-ын сонгуулийн дүнг шууд дамжуулахаар бэлтгэл ажил хангасан. СЕХ нэгдсэн байдлаар шууд дамжуулалт хийхгүй. Аймаг, нийслэл, сум, дүүргийн ИТХ-ын 2024 оны ээлжит сонгуулийн дүнг тухайн нутаг дэвсгэрт нь мэдээлнэ хэмээн хуульд заасан. Тиймээс тухайн нутаг дэвсгэрт сонгуулийн дүнг олон нийтэд танилцуулах үйл ажиллагаа болно. Мөн нийслэлийн хэмжээнд буй хэсгийн хороодод камерын дэлгэц ажиллах учраас нам, эвсэл, олон нийт хянах боломжтой. СЕХ-ны байрны нэгдүгээр давхар мэдээллийн төв маягаар ажиллах тул сонгуулийн ирцийн мэдээлэл болон хэсгийн хорооны байрны дүрсийг шууд дамжуулна. Ирцийн мэдээллийг дамжуулах дэлгэцээр орон нутаг бүрийг тус тусад нь ялган харуулна" хэмээсэн юм.
