“Тийм аймаар хүн алчихсан асуудал биш” гэж Нийслэлийн засаг даргын орлогч Т.Даваадалай цээж ханхалзуулан тоомжиргүйхэн өгүүлэх нь Энхтайвны гүүрээс Тэмээт хөшөө хүртэл замыг тэгш бус долгиотой, мэргэжлийн хэллэгээр бол сэвээтэй зассаныг тодорхойлон хэлж буй нь. Энэ замд 2.840.588.824 төгрөг зарцуулжээ. 2.8 тэрбум төгрөг гэдэг хоёр ч цэцэрлэг элбэгхэн барьчихаар мөнгө.

Нийслэл хотын хамгийн гол замыг Тэмээний бөхний долгиог харж байгаад урлагийн мэдрэмждээ автан долгиотой засчихсан мэт санагдахуйц урласан “Трүй Рөүд” компанийн инженер Ж.Мөнхсүх тайлбарлахдаа, "Бид нар бол шөнөөр ажилласан. Тэгэхээр тэрүүхэн хэсэгтээ багахан хэмжээний түвшин алдсан зүйл бол байгаа. Тэрийг бол засах шаардлагатай гэж үзвэл бид дулааны улиралд засчихна аа. Стандарт алдсан юм бол байхгүй. Жаахан сэвээ бол байгаа” гэж хээвнэг хэлэв. Тэгэхээр бол энэ замын асуудалд анхаарлаа хандуулж, ажиллах ёстой хүн нь бол Нийслэлийн удирдлага юм.

Тэгвэл Нийслэлийн засаг даргын нэгдүгээр орлогч Т.Даваадалай долгиотой замын талаар байр сууриа илэрхийлэхдээ гэнэтхэн яагаад ч юм хүн амины хэргийн талаар жишээ авсаныг хамгийн эхэнд өгүүлсэн билээ. Түүний хэлсэн үгийг аль болох бүтнээр нь сийрүүлбэл “Мэргэжлийн инженер хүмүүс хариуцлагын алдаа гаргасан байна лээ. Гэхдээ тийм аймаар хүн алчихсан ч юм уу, хүндрэлтэй асуудал биш. Засагдаж болно. Хийгдэж болдог алдаа гэсэн үг. Улаанбаатарчууддаа гээд хэлэхэд, бүхий л ажил, инженер мэргэжлийн хүмүүс алддаг...Тэр алдааны хувьд иргэдийн аюулгүй байдалд нөлөөлөхгүй. Гэхдээ насжилт, чанарын хувьд нөлөөлнө. Ус тогтох, тодорхой хэмжээний хурдтай явахад иргэдийн аюулгүй байдалд нөлөөлнө. Тэгэхээр тэр алдааг дулааны улиралд, тодорхой хугацаа нь болоод ирэхээр технологийн хувьд засварлана. Тэр компани хариуцлагаа хүлээнэ” хэмээн өгүүлэв.

Манай хотын эрхэм нэгдүгээр орлогч иргэдийн аюулгүй байдалд нөлөөлөхгүй гэснээ нэг өгүүлбэрийн дараагаар иргэдийн аюулгүй байдалд нөлөөлнө гэж хэлэх нь үнэхээр “долгиотой” сонстоно. Ийнхүү инженерийн гаргасан алдааг, хэнэггүй нэгдүгээр орлогч “Дулааны улиралд засуулна аа, хүн алчихсан биш” гээд ханхалзах аж. Уг нь Нийслэлийнхээ зам талбай, хөдөлгөөнийг зөв, сайхан болгоё гээд Улаанбаатар хотын ерөнхий менежер Ц.Төрхүү шиг хүмүүс мэрийгээд хичээгээд байдаг. Хэлж өгөөд, зааж чиглүүлээд байдаг. Гэтэл хэрэг дээрээ замын компани, зартай хотын нэгдүгээр орлогч хэмээх сэтэртэй эрхэм нь тоосон ч шинжгүй, дулааны улирлыг та нар хүлээ гэх аж. Ажлын явцыг нь цагт нь засаад,хариуцлага үүргийг нь цаг тухайд нь ойлгуулаад хянаад явсан бол өнөөдөр долгионы тухай яриа гарахгүй, иргэдийн аюулгүй байдал аюулгүй чигээрээ байх боломж бүрэн байлаа. Хотын дарга Х.Нямбаатар одоо нэг үгээ хэлнэ байгаа. Нэгдүгээр орлогч тань “Хүн алчихсан биш” гээд зогсож байна. Үгээ хэлж, хариуцлага алдсан компани, харж хянах ёстой даргынхаа хайхрамжгүй, хачин сонин харьцуулалт жишээг нэг хэлж ойлгуулна байгаа. Магадгүй тэр долгиотой замаар хэн нэгэн хурдтай давхиж яваад аваар осол хийхийг, тэрхүү долгион дээр хальтарч мөргөлдөхийг бүр цаашлаад Нэгдүгээр орлогчийн болохгүй гээд байсан хүний амины хэрэг ч гарахыг үгүйсгэхийн аргагүй. Тэмээний бөх шиг долгиотой Тэмээт хөшөө хүртэлх тэр замыг дулааны улирал хүртэл хэрэг төвгийн үндэс болохгүй гэж хэн нотлох билээ? Хотын дарга Х.Нямбаатар одоо нэгдүгээр орлогчийнхоо арьсыг хуулах уу, эсвэл цээжээрээ хамгаалаад өнгөрөх үү? гэдгийг ард иргэд харж байгаа нь лавтай.

Tumen.mn