Болдын Жавхлан. Манай улсын Сангийн сайд. Сангийн яамны хамгийн том эрх мэдлийн сандлыг эзэмшин суугч эрхэм сайд. Сонгуулийн өмнө сайд байсан, сонгуулийн дараа ч сайд хэвээрээ л байгаа. Эд хөрөнгө хүнийг эвддэггүй, харин хэн болохыг нь харуулдаг гэх үг бий. Сайдын сэнтийдээ улиран үлдсэн эрхэм сайд маань саявтархан нэгэн хурган даргыг зам зуур заамдаж аваад дэлсчихсэн юмдаг уу даа. Гэхдээ бас зүгээр ч үгүй, “Муу Энхбаярын золбингууд зайл” гэж хашхичсан сурагтай. Сурагтай гэхийн учир нь хэвлэлүүд л тэгж бичээд буй учраас хэлж байгаа юм шүү. Ш.Жадамба генералын хүү Ж.Энхбаяр гэж саарал толгойтой, сайдын сэтэр саяхан дахин хүртсэн нэгэн бий. ЖДҮ-дэж жаахан чичлүүлээд жижигрэх төлөв рүүгээ орсон ч Ж.Энхбаяр эргэн сэхэх янзаа олж, Хүнс, Хөдөө аж ахуй, хөнгөн үйлдвэрийн сайдаар томилогдож, Дархан руу яамтайгаа хамт нүүх бодолтой яваа нэгэн. Гэтэл Дархан-Уул аймаг бол Сангийн сайд Б.Жавхлангийн УИХ-ын гишүүнээр сонгогдсон газар. Нэг ёсондоо дош нь. Дошин дээр нь яам нүүж ирэх гээд байдаг, тэр яамыг нь ядаж байхад таагүй харилцаатай, таарамжгүй нөхөр Ж.Энхбаяр толгойлчихоод Нэгдүгээр хүний суганд нэлээн гүн наалдчихсан явааг Атар газар эзэмшсэний саяхны ёслолоос жирийн иргэд ч, жир бус эрхэм Б.Жавхлан ч ажиглан харж, атаархангуй хүлээн авсан байж мэднэ. Тиймдээ зам зуур уушийн газарт ХХААХҮ-ийн Бодлого, төлөвлөлтийн газрын дарга Ц.Болорчулуунд уураа гаргаж, олон давтаад бичээд баймгүй, ихэвчлэн гэр оронгүй, гэдэс алдаж яваа нохойг хэлдэг үгээр дайрч доромжилсон сурагтай. Сайд хүн нөгөө сайд руугаа шууд асаж, шулуухан үзэлцэх нь эрсдэлтэй учир нохой сүүлээ, сүүл хонгорцгоо гэдгийн үлгэрээр хурган дарга руу агсарч, “барьж чадахаа” барьсан нь тэр юм биш байгаа. Ямартай ч жаахан тарган л болохоос Чанву царайтай сайд маань сүүлийн үед эрх мэдэлдээ эрдэж, энд тэнд таалагдаагүй нэгнийг нударгаараа “таалчихдаг” болж буй янзтай. ““Тэрэлж” зочид буудалд төсвийн асуудлыг хэлэлцэх нь тохиромжтой гэж үзсэн” хэмээн саяхан дэгдсэн 50 саяын тансаг хуралдааны шуугианы дундуур хээвнэг хэлж амжсан хүн шүү дээ. 50 сая гэдэг сангийн сайдад маань 5 төгрөг шиг санагддаг байх л доо. Та бид шиг ямар тал талх мухлагаас гуйж авдаг биш. Архаг сайд маань хал цэрэг шиг хатуухан гартай нэгэн болчих гээд байгааг хайрлаж, дэмжиж сонгосон Дархан-Уулынхан харж л суугаа. Таалалд нь нийцэхгүй бол дараагийн сонгуулиар тааруухан дүн тавиад буцаахаа мэдэж л байгаа даа.

Tumen.mn