УИХ-ын намрын ээлжит чуулганы өчигдрийн /2024.11.14/ хуралдаанаар “Монгол Улсын Их Хурлын 2024-2028 оны стратеги төлөвлөгөө батлах тухай” УИХ-ын тогтоолын төслийг хэлэлцлээ. Энэ үеэр УИХ-ын гишүүн, Монгол Улсын Шадар сайд С.Амарсайхан “Стратеги төлөвлөгөөг хэрэгжүүлэхдээ УИХ өөрсдөө стандарттай хэрэгжүүлэх хэрэгтэй. Стандартын хэрэгжилт УИХ-ын энэ танхимаас эхлэх ёстой. Улс төрөө стандарттай хийдэг байх ёстой. УИХ-ын танхим гэдэг бол Монгол Улсын тусгаар тогтнол, аюулгүй байдал, ард түмний эв нэгдэл, итгэл үнэмшил, цаашлаад нийгмийн ёс суртахууны оргил, гал голомт нь болсон газар. Өөрөөр хэлбэл, өнөө цагийн иргэдийнхээ хүсэл тэмүүллийг, ирээдүй хойч үеийнхээ итгэл үнэмшлийг тээсэн гишүүд энэ тахимд сууж байгаа.
Бид амаргүй нөхцөл байдалд ажиллаж, амьдарч байгааг УИХ-ын гишүүд та бүхэн мэдэж байгаа байх. Ковидын ямар хүнд нөхцөлд улс орноороо орсон билээ. Монгол Улсын иргэн бүр өнөөдөр эдийн засгаа өсгөхөөр зүтгэж яваа.
Ийм цаг үед бид хэд хэдэн зүйлийг онцгой анхаармаар байна. Бүс нутаг, геополитикийн нөхцөл байдал улам ээдрээтэй, энх тайван, аюулгүй байдал тогтворгүй, улам эмзэг болж байна. Дэлхий нийтийн улс төр, нийгэм, эдийн засгийн үйл явц тодорхойгүй, мухардмал байдалд орж байна. Хөгжингүй орнуудын сэтгэлгээ, соёл, мэдээлэл технологи, хиймэл оюун ухааны давалгаанд хөгжиж байгаа жижиг буурай улс орнууд нэрвэгдэх эрсдэл бий болж байна.
Том гүрнүүдийн гео-стратегийн байр суурь тодорхойгүй, таахын аргагүй байдалд байна. Энэ нөхцөлд Монголчууд та бүхэн эв нэгдэл, аюулгүй байдалдаа хэрхэн дүн шинжилгээ хийж, үнэлэлт дүгнэлт өгч байна вэ гэсэн асуултын тэмдэг эх орны маань торгон хилийг тогшиж байна, Төрийн хар хайрцагны бодлогыг тогшиж байна, Монгол хүн бүрийн оюун санааг тогшиж байна.
Монголчуудаа, та нар юу бодож, Юу сэтгэж байна вэ? Хурдацтай хувьсан өөрчлөгдөж байгаа дэлхий ертөнцөд цаашид яаж аж төрж, хэрхэн амьдарч, оршин тогтнож, хөгжин урагшлах гэж байна вэ гэсэн асуултын тэмдэг бидний эргэн тойронд байна. Тиймээс бид эв нэгдэлтэйгээр улс орноо авч явах зайлшгүй шаардлагатай. Төрийн түшээ гэдэг бол бүхнийг мэдэгч биш. Бүхнийг үгүйсгэгч биш. Шинэ парламент бүрдсэнээс хойш би чуулганы танхимыг ажигласан байдалтай байгаа. Зарим зүйл дээр гэрийн эзэгтэй шиг, эсвэл айлын нөхөр шиг аашилж байгаа УИХ-ын гишүүдийн улс төрийн хандлагууд арай хэтэрч байна. Гэрийн хүн биш төрийн хүн болсон гэдгээ, төрийн түшээ болсон гэдгээ зарим гишүүд ойлгож ухаармаар байна. Улс орны нэгдмэл эрх ашиг, нийтлэг үнэт зүйлтэй холбоотой асуудалд бодлоготой, бодолтой хандмаар байна. Хувийн эрх ашиг, жижиг амбицаа улс төрийн явцуу тоглолт болгож улс орныг хувааж талцуулдаг, гадна дотны нөлөөнл автдаг, ард түмнийг төөрөгдүүлдэг, амьдрал ахуйнд нь сөргөөр нөлөөлдөг увайгүй үйлдлүүд гаргаж болохгүй” гэлээ.
