Халдварт өвчин судлалын үндэсний төв/ХӨСҮТ/-өөс Томуу, томуу төст өвчний нөхцөл байдлын мэдээлэл ба ХӨСҮТ эмч нарын уриалгыг өнөөдөр танилцууллаа.

Томуу, томуу төст өвчин, гэдэсний халдварт өвчнөөс сэргийлэхийн тулд гар барихыг бүрэн татгалзаж шуугаар болон зайнаас мэндлэхийг уриаллаа.

Судалгаагаар:

- Гар барьж мэндлэхэд бохир гар дахь өвчин үүсгэгч бичил биетнүүд 100% дамжин халдварладаг байна.

- Нударгаар мэндлэх үед 50% болж буурдаг

- Шуугаар мэндлэх үед 0-15% болж буурдаг аж.

45-р долоо хонгийн байдлаар амбулаториор хандаж үйлчлүүлж байгаа нийт хүмүүсийн зургаа орчим хувь нь томуу, томуу төст өвчний шалтгаантай байгаа аж. Энэ нь өмнөх долоо хоногоос 1-2 хувиар нэмэгдсэн үзүүлэлт юм байна. Өвчлөлийг насны бүлгээр нь харвал 80 орчим хувь нь 15 хүртэлх насны хүүхдүүд байгаагаас 50- 60 орчим хувь нь дөрөв хүртэлх насны хүүхдүүд байна. Уушгины хатгалгаагаар эмнэлэгт хэвтэж байгаа хүүхдүүдийн 90 орчим хувь нь 15 хүртэлх насны хүүхдүүд байгаагаас 60 орчим хувь нь дөрөв хүртэлх насны хүүхдүүд байна.

Нийт томуу, томуу төст өвчнөөр өвчлөгсдийн 60 орчим хувь нь Улаанбаатар хотод бүртгэгдэж байгаа бөгөөд 400 гаруй орыг нэмэлтээр дэлгэжээ.