Юу л хийгээд байна даа гэсэн хардалтын цаана улсаа урд хөршид живүүлэх асар ноцтой хуулийн өөрчлөлтүүд хийгдэж байна даа. Утаа бол зүгээр хөнгөн халхавч, зориудын хөшиг юм биш үү? Намаржин биднийг бөглөрөл түгжрэл гээд бүүр мансуурч явах зуур Д.Амарбаясгалангийн удирдсан УИХ-аас Ажиллах хүчний тухай хуульд өөрчлөлт оруулсан. Ажлын байрны зарыг 14 хоног тавиад дотоодоосоо ажилтан олж чадахгүй бол гаднаас ажиллах хүч авах эрх нээгдсэн. За газрын тос зэрэг Монголд нутагшаагүй нарийн мэргэжлийн асуудлыг ингэсгээд шийдэж болох юм байж гээд харж байтал өчигдөр Сайнзориг, Батсүмбэрэл нар Гаднаас авах ажилтны тоо хувь хэмжээнд хязгаар тогтоохгүй байх, улмаар ажлын байрны төлбөрөөс чөлөөлөх тухай хуулийг Оюун-Эрдэнийн шинэ сэргэлтийн бодлогын хүрээнд өргөн барьлаа.

Энэ эрх баригч намынхны яриад байгаа, Оюун-Эрдэнийн зүүдэлж босч ирдэг Шинэ сэргэлтийн бодлого гээч нь Хятадын коммунист намын 22 дугаар их хурлаараа дэвшүүлсэн эдийн засгийн шинэ тэлэлтийн бодлоготой хэрхэн холбогддог вэ? Үүний цаана Монгол Улс руу Си Зин Пиний "Нэг зам нэг бүс" уриалгын хүрээнд, төрийн өндөр төвшинд ямар бодлогын дайралтууд орж ирж байгаа вэ гэдэг нь харагдана.

Би хардах эрхээ эдэлмээр байна, энэ 80-аад оны хуурамч дипломтой, хуурмаг инээсэн залуус чинь хөгжлийн бодлого тодорхойлж толгой тархи нь хүрэхгүй болмогцоо Хятадын шууд зөвлөгөөгөөр хялайж унатлаа зүтгэж, тэдний бодлогыг хэрэгжүүлэгч болчихсон юм биш үү?

Сайнзориг, Батсүмбэрэл, Алдаржавхлан нар уг хуулийг төслөө "1993-2006 онд төрөлт эрс багассанаас ажиллах хүчний хомсдолд орлоо" хэмээн тодорхойлж байгаа юм.

Тэгснээ энийгээ Төрийн бүтээмжийн сэргэлт гээд нэрлэчихжээ. За нэгт, ажиллах хүчний хомсдолд ороогүй, сайхан залуус чинь шорон дүүргэсэн байна, үг хэлснийхээ төлөө өчнөөн хүн ид насандаа хоригдсон байна, хулгай, архидалтаас үүдэлтэй гэмт хэрэг зэргээр Монголын шоронд багтахгүй чихэлдэж байна, боловсрол мэргэжилгүй хаягдсан байна, төрийн бодлогын шахалтаар чадалтай нь гадагшаа дүрвэсэн байна, та нар Монголыг ийнхүү шархадсан бар шиг сульдааж байгаад шарх руу нь одоо дайрч, сүүлийн цохилтоор сүхдэн унагааж байна. Тэр шинэ сэргэлт, бүтээмжийн сэргэлт, соёлын сэргэлт...тэнэг хүний агуу жагсаалтын чинь ард муужран унаж байгаа Монгол Улс эцсийн амьсгалдаа багтран сульдан унаж байна. Монголд ажиллаж буй гадныхны 70 шахам хувь нь хятадууд, үлдсэн 30 гаруй хувь нь бусад орныхон байдаг гэсэн тоон судалгаа бид хаашаа явж байгааг үргэлж илчилдэг шүү дээ. Ер нь тэгээд сэргэлт яриад өчнөөн жил боллоо, хэн сэргээд байгаа юм. Хэний зүүдэг цаг, өмсдөг брэнд, суудаг хаус, явалддаг хүүхэн, зорчдог улсын зэрэг зиндаа шинэчлэгдэн сэргээд, хэн нь бүүр доройтоод байгаа юм, Монгол даяараа бүгд харж байгаа шүү!

Энэ Монполимет, МАК гээд үндэсний компаниудаасаа суралц, яаж залуусыг мянга мянгаар нь сургаад, нийгмийн асуудлыг нь шийдээд ажиллуулж чадаад байгааг очиж асуу, тэр Нямтайшир, Гарамжав, Оджаргал нараас очиж цагаар лекц сонс, хичээл ав! Амьдралдаа хүн цалинжуулж, аж ахуйн нэгж байгуулж, бусдад цалин өгч үзээгүй, ТҮЦ ч ажиллуулж мэдэхгүй мангар бацаанууд төрөөр наадаад, одоо төрлөө устгана гэж байна, устгаж л байг уу?

Эмүжин