Мөнгө тараахаас өөрөөр мөнчгөр нь ажиллахаа байжээ!

Халамжаар хаман залгидаг шинэ цагийн мангасын царай ийм байдаг юм, сайн харж авцгаа. Улс орон нь 21-р зуунд цахилгааны албан ёсны хязгаарлалтын хуваариа танилцуулж байхад энэ хүн Ирээдүйн өв санд төвлөрсөн 4.0 их наяд төгрөгийг иргэн бүртээ тарааж, хүн тус бүрт 135 мянган төгрөг бэлэглэнэ, орон сууцжуулалт энэ тэрд хамрагдаарай гэнэ эээ. Ер нь бол Монгол Улс энэ хүний суудлаас хямдхан болжээ. Олон нийтийн дунд нэр хүнд нь навсайтал унаад байнгуут одоо 135 мянгын авлига өгье гэж байна.

Энэ авлигыг нь авцгаах юм уу? Засаг нь ганхаад эхлэнгүүт замбараагүй их мөнгө тараадаг манж аргад манай төрийнхөн гаршсан байна.

Ээлжит үмх мах, үдийн хоолны үлдэгдлээ шидэж байна. Энэ мөнгөөр юу хийж болох вэ? Цахилгаан станцаа шинэчилж болно. Хэдэн мянган ажилгүй залуусыг уул уурхай, зам гүүр, барилгын ажилд сургаад, бөөнөөр нь ажлын байран дээр гаргаж, "Ажиллах хүчний анхдугаар аян" өрнүүлж болно. Тэгж яривал хөнгөн гэмт хэрэг үйлдсэн, шоронд багтахгүй байгаа залуустаа ажил сургаад, дадлага олгоод, энэ улсад хэрэгтэй байгаа ажлын фронтод тэнсэн хэлбэрээр дайчилж болно. Гэтэл яав, гаднаас авах ажиллах хүчний тоог хязгааргүй цаглашгүй болгож, наана нь Халхын залуусын хамаг мөчийг халамжаар тайран хаяж байгаад, хамж залгиад, хөрштэйгээ хуваагаад хөшиглөж цавчаад иднэ гэнэ эээ. Мөнгө тараахаас өөр хувилбараар мөнчгөр нь ажиллахаа байжээээ! За тэгээд нөмрөн авсан тас харанхуйн дунд нөгөө 135 мянган төгрөгөө тэврээд баяжаарай.

Нийтлэлч: Р.Эмүжин