Боловсролын мэдээллийн цахим сан бүрдүүлэх, ажиллуулах журмыг EdTech компаниудын оролцоотойгоор баталсан талаар мэдээллээ.

Боловсролын сайд П.Наранбаяр:
- Боловсролын мэдээллийн цахим сан бүрдүүлэх, ажиллуулах журмыг шинэчлэн баталлаа. Миний өмнөх сайд цахим шилжилтийг амжилттай хийсэн.

Цахим шилжилтийн өнөөдрийн нөхцөлд дүн шинжилгээ хийж, цаашдын хөгжилд хэрэгтэй, хэрэгжүүлэх журмыг баталлаа. Өөрөөр хэлбэл эрх ашиг нь хөндөгдөх бүх оролцогчтой дөрвөн сарын хугацаанд хэлэлцэж баталсан. Энэ журам бол эрүүл өрсөлдөөн, нээлттэй ил тод байдлыг бий болгож байна. Боловсролын хуульд зааснаар сургуулийн зөвлөл өөрсдөө шийдвэр гаргаж ААН-үүдийн эрүүл өрсөлдөөнийг дэмжинэ. Цахим хэрэглээний зардлыг хувьсах зардалд шингээж Монгол улсын бүх сургуульд хүргэдэг. Үүнээс цахим бүх систем нь сургуулийн зөвлөлөөр дамжина. Тэгэхээр яамны үүд сахиж санхүүжүүлэх хэлбэр биш зөвлөлтэйгөө шийдвэр гаргаж компаниуд өөрсдөө өрсөлдөж цахим бүртгэл гэх мэт үйлчилгээг үзүүлэх юм. Энэ талаар бүх захиралд чиглэл хүргүүлж байна. Зөвхөн шаардлагыг хангасан компаниуд оролцоно. Ингэснээр зах зээл ил тод, ойлгомжтой бөгөөд шуурхай болж байна. Түүнээс гадна багш, сурагчдын интернетийн хүртээмжийг нэмэгдүүлэхэд цаашид анхаарах болно.

Сургуулийн зөвлөл нь багш нарын, эцэг эхийн, орон нутгийн төлөөллөөс бүрдсэн байх ба сургуулийн захирал дангаараа шийдвэр гаргах боломжгүй. Хэрэв зөвлөлийн шийдвэрээр бус захирал дангаараа жагсаалтад байхгүй аль нэг компани сонгосон байвал энэ нь хууль бус болох юм.

Багшийн ёс зүйн зөрчил бүхий харамсалтай хэрэг Архангай аймагт гарлаа. Боловсролын газар ажиллахад нотлогдсон, багш өөрөө чөлөөлөгдөх хүсэлтээ өгсөн. Ямар ч учир шалтгаантай байсан ч хүүхдийн эрхэд халдаж болохгүй. Тиймээс 2025 оныг бид Багшийн ёс зүйн жил болгон зарлаж, тэдний ёс зүйг дээшлүүлэх арга хэмжээг яамнаас авах болно.