Монголчууд бидний уламжлалт цагаан сарын баярын өдөр буюу XVII жарны "Модон ногоон" хэмээх могой жилийн шинийн 2-ний өдөр ирэх гуравдугаар сарын 1-нд тохионо. Үүнтэй холбоотойгоор, "Шинийн нэгэн хоёрдугаар сарын 29-нд тохионо", "Шинийн 1 тасарсан, тасраагүй" гэх мэт мэдээллүүд цахим орчинд цацагдаж, зарим иргэд үнэн, худал мэдээлэл дунд төөрөлдсөн байдалтай өдрүүд өнгөрч байна.

Энэ талаар бид "Түвдэнпэлжээлин” хийдийн Хамба лам Ж.Гончигсүрэнгээс тодруулахад, "Энэ жилийн цагаан сарын баярын битүүний өдөр ирэх хоёрдугаар сарын 28-нд, гуравдугаар сарын 1-нд шинийн 2-ны өдөр тохионо. Шинийн нэгний өдөр энэ жил тасарна гэсэн үг. Өдөр тасарсан гээд өөрчлөгдөх зүйл байхгүй. Зурхайн ухаанд өдөр давхцах, өдөр тасрах тохиолдол гардаг. Зурхайд өдөр тасарвал өмнөх өдрийг нь, өдөр давхцвал арын өдрийг ашиглана гэж тайлбарласан байдаг юм.

Энэ нь од эрхэсийн хөдөлгөөний үйлчлэл түргэн, удаан байдгаас шалтгаалдаг гэж ойлгоход болно.

Бид хоёрдугаар сарын 28-нд битүүлж, гуравдугаар сарын 1-нд шинийн хоёрондоо золгоно. Хэдийгээр шинийн нэгэн тасрах хэдий ч Монгол түмэн уламжлалаа дагаад, шинийн нэгнээ тэмдэглэн өнгөрүүлнэ" гэлээ.