Хуучин ЗХУ-ын бүрэлдэхүүнд байсан Молдавын салан тусгаарлах бүс нутаг Оросын байгалийн хийн нийлүүлэлт зогссоны улмаас цахилгаан таслахаар төлөвлөж байгаагаа мэдэгдэв. Днестрийн эрх баригчид Молдав даяар өдөрт гурван цаг цахилгаан таслахаар төлөвлөжээ.

Ройтерс агентлагийн мэдээлснээр, Приднестровье дэх айл өрхийн халуун ус, халаалтыг аль хэдийн зогсоосон бөгөөд хүнсний үйлдвэрлэгчдээс бусад бүх үйлдвэрүүд үйлдвэрлэлээ зогсоохоос өөр аргагүйд хүрсэн байна.

Оросын эрчим хүчний аварга Газпром Лхагва гаригаас эхлэн Украины нутгаар дамжуулан Европ руу хий экспортлохоо зогсоосон тул Молдавын эрх баригчид ийм арга хэмжээ авчээ. ОХУ-ын орлогын эх үүсвэрийг багасгах шаардлагатай гэж үзсэн Украин өнгөрсөн арванхоёрдугаар сарын сүүлчээр дамжин өнгөрөх гэрээгээ сунгахаас татгалзсан юм.

Харин ОХУ-ын зүгээс Молдав байгалийн хийн өр төлбөрөө төлж барагдуулаагүй тул нийлүүлэлтээ зогсоосон гэж мэдэгдсэн. Молдав руу нийлүүлдэг байсан Оросын байгалийн хийн ихэнх хэсгийг Приднестровье цахилгаан эрчим хүч үйлдвэрлэхэд ашигладаг байжээ.

Одоогийн байдлаар, Молдавын засгийн газар Румын улсаас байгалийн хийн нөөцөө авна гэж мэдэгдээд байна.

ЭХ СУРВАЛЖ: NHK