Эцэг эхийн халамжнаас гарч нөхөр эхнэр болж өрх толгойлох нь хувь хүний эрх чөлөөт амьдрал боловч маш олон өндөр хариуцлагыг үүрч эхэлдэг. Энэ олон хариуцлагын нэгээхэн хэсэг нь хэдийд хэдэн хүүхэдтэй болох, гэр бүлийн гишүүдийн эрх чөлөө, ая тухтай байдал, эрүүл мэнд, хүмүүжил, боловсрол гэх мэт ирээдүйд чиглэсэн бодлого үйл ажиллагаа юм. Энэ бодлого үйл ажиллагааг хэрхэн зөв авч явна гэдгээс та хоёрын болон таны удам угсааныхны амьдрах ухаан арга билэг, хүн чанар нутаг нугын олон түмэнд танигдаж хүндлэгдэж явдаг.

Нэртэй хүний зүстэй хүүхэд гэж бардамнаж хэлсэн сайхан үг байдаг. Тиймээс хүн хойч үеэ бодож хичээж амьдрах ёстой. Насны ханиа сонгохдоо сайн судлан шинжих хэрэгтэй. Хэн хэндээ сэтгэл хангалуун байж сонгосон бол эргэж буцалтгүй тууштай байх хэрэгтэй. Гэр бүл болж буй хайрт хосууд хүүхэдтэй болохыг чин сэтгэлээсээ хүсэж төлөвлөхдөө эхийн хэвлийд хүүхэд бүрэлдэн тогтож өсөж хөгжих явцад саад учруулж, үүсэх болох бүхий л таагүй хортой нөлөөг урьдчилан харж тооцоолж арилгана. Ингэснээр эрхтэн бүтэн эрүүл саруул хүүхэд төрөхийн үндэс суурь нь болж өгдөг.

Юуны түрүүнд эрүүл мэндийн зөв хэвшил, боловсролтой юу гэж өөрсдийгөө хяна. Энэ талаар өмнөх дугаарт бичсэн шүү дээ. Мөн хүүхэд тээж төрүүлэх таатай орчин бүрдсэн эсэхээ хянана. Дээрхи хоёр үзүүлэлтийг сайн хийж чадсан тохиолдолд хүүхэд төрүүлэх боломжтой боллоо гэж ойлгож болох юм.

Хүүхэд тээж төрүүлэх таатай орчныг яаж бүрдүүлэх вэ?

Гэр бүлийн гишүүд хүүхэд олдохоос өмнө эмчид үзүүлж оношлогоо шинжилгээ хийлгэж шаардлагатай бол төгс эмчлүүлнэ. Эмийн эмчилгээ хийлгэснээс хойш нэг сараас хойш хугацаанд жирэмсэлбэл тохиромжтой. Байгаа архаг хууч өвчнөө сэдрэхээс сэргийлэх аргад суралц.

-Эдийн засагаа гачигдаж дутагдахааргүй өр зээлэнд орхооргүй зөв зохицуулж орчны эрүүл ахуй халдвар хамгааллыг чанд сахиж амьдрах орчноо тохижуулах хэрэгтэй.

-Энэ нь ханиад томуу халдварт өвчнөөс сэргийлнэ. Мөн амгалан тайван байх орчин бүрдэнэ. Архи тамхи хорт зуршлын талаар залуучуудад ярихын ч хэрэггүй. Уруу дорой явах гээгүй л бол ахмад хүмүүсийн болохгүй гэсэн болгоноос хол байж сур. Бие биеэ хүндлэн дээдэлдэг монгол ёс заншилыг дагаж, нутаг орондоо нэр хүндтэй зөв тэгш амьдралтай гэр бүлийн амьдралыг ашиглаж тэднээс суралц.

Амьдрал анхнаасаа хэрүүл тэмцэлгүй зөв харилцаатай байвал тэр чигтээ тогтдог. Нэг нь хичнээн зөв санаатай зөөлөн харьцаатай байлаа ч нэг нь хэдэр зантай хэрүүлч байвал тэр гэр бүлийн дотно харьцаа гэгээн амьдрал эвдэрч эхлэх нь л гэж ойлгоорой. Хорвоо дэлхий алаг юм.

Дэлхий дээр амьдарч байгаа бид бүгд сайн муу талтай. Тэгэхээр нэг нэгнийхээ сайн талыг дэмжээд бай. Аливаа асуудлыг хамтдаа шийд. Хазайсан газар чинь түшин хальтарсан газар чинь босгох хань нөхөр болсон гэдгээ сайн ойлго. Үл ойлголцох үед хүлээцтэй бас буулт өгч уучилж өнгөрсөн муу зүйлийг мартаж чаддаг ухаантай байгаарай. Тэгж чадвал амьдрал чинь бүтэн хүүхэд чинь өнчрөхгүй, гэр дүүрэн инээд халгисан сайхан амьдарч чадна.

Хүссэн хүүхэд олдлоо

Хэвлийдээ хүүхэд тээж яваагаа мэдсэн эмэгтэйчүүдийн сэтгэлзүй өмнөх үеэсээ өөрчлөгддөг. Энэ нь бие махбодид боловсорч байгаа даавартай холбоотой юм. Нүүр царай цайрч, зөөлрөх эсвэл нөсөөжих “сэвх” хөхний хэмжээ томорч, шингэн гарах, бэлхүүсээрээ өдөр ирэх тусам бүдүүрэх, зан харьцаа өөрчлөгдөх, эелдэг зөөлөн тайван болж хөдөлгөөн эвлэг тогтуун болох, аливаа зүйлд амархан уурлах, бухимдах, баярлах, эмзэг уйламхай болох, сэтгэл санаагаар унах, айдас түгшүүртэй болох зэрэг өөрчлөлтүүд гардаг. Гэхдээ энэ өөрчлөлтүүд эмэгтэй бүрд харилцан адилгүй байна.

Та жирэмслэхийг хүсч бэлтгэлээ сайн базаасан бол энэ түгшүүр гэр бүлийн ирээдүйн сайн сайхан луу чиглэсэн баярт үйл явдал байх болно.

Хэвлий дэх ургийн амьдрал

Шинэ амьдрал тогтсон тэр мөчөөс эхэлдэг. Зүүний толгойн чинээ тэрхүү орон зайд ямар хүн бий болж байгаа мэдээлэл агуулагдсан байдаг байна. Хүний амьдралын эхний долоо хоногт олон сая эсүүд шинээр бий болж, гайхамшигтайгаар хуваарилагдсаны эцэст хүн гэсэн махбодийг бүрдүүлнэ. Үр тогтсон өндгөн эс умайн салст бүрхэвчинд шигдэн орсон байх ба гэднэ талын эсүүд нь үндэс маягаар дотогшоо орж, эхийн цусан хангамжтай холбогдоно. Харин дотор эсүүд нь 2-3 давхаргад хуваагдаж, давхраа бүрээс эрхтэнүүд үүснэ.

1-р давхаргаас тархи, мэдрэлийн тогтолцоо, арьс, нүд, чих үүсч байхад нөгөөгөөс нь уушиг, ходоод, гэдэс гэх мэт дотор эрхтэн бүрэлдэнэ. Харин 3 дахь давхаргаас зүрх, цус, булчин, яс үүсэх нь гайхалтай.

-4 дэхь 7 хоногийн дараа нурууны ясны суурь тавигдаж, зүрхний үйл ажиллагаа эхэлж, элэг болон гол эрхтэнүүдийг цусаар дүүргэнэ.

-5 дахь 7 хоногт мэдрэхүйн тогтолцоо нь хэдийнээ хөгжиж эхэлсэн байх ба түүний эсүүд нь мэдрэлийн хэмээх сувганцрыг үүсгэнэ. Энэ нь тархи, нурууны багана болон хувирна. Мэдрэлийн сувганцар нь толгой ба энэ үед зүрх улам бүр бүрэлдэн тогтож судаснууд үүснэ. Эх хүүхдийг холбосон судасны багц бол хүй юм.

Хүй

Хүй нь ураг эхийг холбож эхээс ураг руу тэжээлийн шимт бодис, 02-ыг зааж, урагаас эх рүү бодисын солилцооны эцсийн бүтээгдэхүүнийг зөөнө.

Эхэс

Эхэс нь цэлмэнгийн тусламжтайгаар умайн салиа руу нэвтэрч орох ба хоорондын завсар зайд орших эхийн цусан дотор хөвж байна. Эхэсээс хүй гарч, эх ураг хоёрыг холбон эхээс хүүхэд 02 шим тэжээл дархлааг хүртэл зөөнө. Урагаас бодисын солилцооны эцсийн бүтээгдэхүүнийг эх рүү зөөнө.

Ус

Умай дотор шингэн бий болдог. Ураг түүн дотор хөвж байна. Гадуураа урагийн 6 долоо хоногтоо 15 мм урт байх ба элэг хөгжсөн байна. Зүрх нэг минутанд 140-150 удаа цохино.

7-н долоо хоногтойдоо Мэдрэлийн эсүүд бүрэлдэж, нэг минутанд 100.000 мэдрэлийн эс шинээр үүсэж төрөх үед тэр нь тэрбум болон өссөн байдаг. Чих, нүд, нүдний цөцгий үүсэн хөгжиж эхэлнэ. Гавлын яс нь хөгжиж, ургийн биеэн дээрхи жижиг товруунуудаас хөл гар урган гарна.

8-н долоо хоногтой байхдаа 3-4 см байна. Ургийн тархи эмчимтэй хөгжих ба үнэрлэх амтлах эрхтэний мэдрэхүй хөгжиж эхэлдэг. Бүх эрхтэн үүссэн байх бай үйл ажиллагаа эхэлж хөгжинө. Жишээ нь гар хөл хөдлөх, нүүрний хөдөлгөөн эхэлдэг.

3-н сартайдаа: Элэг дэлүү ясны чөмөг нь ажиллаж цусыг төлжүүлж эхэлдэг. Тэнцвэрийн эрхтэнүүд үүсэж хөгжинө.

12 долоо хоногтойд:  Ураг хэлбэр дүрсээ бүрэн олно. Бэлэг эрхтэн сайн хөгжинө.

4 сартай болоход:  Хөмсөг сормуус ургана. Зовхи аниастай, хуруу үүснэ.

22 долоо хоногтойд:  Өшиглөх түлхэх хөдөлгөөн хийдэг.

23-30 долоо хоногтойд:  Ураг хүчтэй хөдөлнө. Гадны дуу чимээг сайн мэдэрч хариу өгнө. Шээс бага гарна. Заримдаа зогисдог. Ураг эхийн унтах үед унтана. Сэрэх үед сэрнэ. 24 долоо хоногтойд уушиг хөгжиж эхэлдэг.

31-40 долоо хоногт:  Арьсны үрчин арилж, шар үс багасна. Хүүхдийн хөгжлийн үе шатуудыг мэдсэнээр та гадны хортой нөлөөнөөс болгоомжилж хүүхдийн эрхтэн системийн гажиг үүсэхээс сэргийлж чаддаг болно. Мөн жирэмсний сүүлийн сард хүүхдээ гэмтээхгүй бүтээхгүй зөв төрөх аргад суралцана. Хүүхдийг төрөнгүүт нь зөв хөхүүлж, асрах аргад
урьдчилан суралцсан байх нь чухал юм.