"Туулын хурдны зам” төслийн бүтээн байгуулалтын ажлын хүрээнд нээлттэй сонгон шалгаруулалтыг энэ сарын 27-ны өдөр нээжээ. Энэ талаар Авто зам, замын байгууламжийн төслийн захирал А.Ербол “Нийслэлийн Худалдан авах ажиллагааны газраас “Туулын хурдны зам”-ын ажил болох “НХААГ/20250101139” дугаартай тендерийг нээсэн. Одоогоор дөрвөн байгууллага санал ирүүлээд байна. Ирсэн саналуудыг ажлын хэсэг хуулийн дагуу хянан үзээд үнэлэх ажиллагааг эхлүүлж улмаар хамгийн сайн тендер ирүүлсэн оролцогчидтой гэрээ байгуулах, эрх олгох шат руу шилжинэ. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу өрсөлдөх тэгш боломжтой, ил тод, үр ашигтай, хэмнэлттэй хариуцлагатай байх зарчмыг баримтлан гүйцэтгэгчийг сонгон шалгаруулж, төслийг үр дүнтэй хэрэгжүүлэх зорилт тавин ажиллаж байна” гэлээ.

Тус хурдны зам нь нийслэлийн зүүн хэсэг Баянзүрхийн товчоо Улаанбаатар-Налайх чиглэлийн авто замаас эхэлж, хотын баруун захын аюулгүйн тойрог хүртэл нийт 32 км урт, зургаан эгнээ бүхий замтай байхаар төлөвлөж, хотын төвийг тойрон гарах хөдөлгөөнийг бий болгох аж. Төслийн хүрээнд нийт 12 байршилд гүүрэн байгууламж, долоон байршилд туннель, долоон байршилд хоёр түвшний огтлолцол бүхий гарцуудыг барихаар тусгасан бөгөөд авто замын дагуу 23 байршилд гэрлэн дохиолол, 4,686 гэрэлтүүлгийн шон, хоёр байршилд бүрэн тоноглогдсон төлбөр хураах цэгтэй байна. Налайхын авто зам, Дүнжингарав, Ажилчдын гудамж, Яармаг, Сонсголон, Эмээлт зэрэг гол чиглэлүүдтэй огтлолцох тул хотыг тойрсон урсгалыг тасралтгүй холбох боломжийг бүрдүүлэх ач холбогдолтой бөгөөд төсөл хэрэгжсэнээр авто замын түгжрэл 10-20 хувиар буурна гэж тооцоолжээ.