"Gem mall" худалдааны төвд өнгөрсөн баасан гарагт буюу 2025 оны зургаадугаар сарын 27-ны өдөр эхнэрээ олон удаа хутгалж амь насыг нь хөнөөсөн хэрэг гарсан.

Тодруулбал, Улаанбаатар хот, Баянгол дүүргийн 6-р хороонд байрлах "Gem mall" худалдааны төвийн нэг давхарт 45 настай эрэгтэй 36 настай эхнэрээ 38 удаа хутгалж амь насыг нь хөнөөсөн. Тухайн хэрэг өдрийн 11:00 цагийн орчимд гарсан. Харин уг дэлгүүр 10.00 цагт үйл ажиллагаа нь жигдэрдэг тул хэрэг гарч байх үед худалдан авагчид цөөн, уг худалдааны төвийн түрээслэгчид ажилдаа ирээд удаагүй байсан байна.

Албаны эх сурвалжийн мэдээлж буйгаар, эдгээр хоёр хүн худалдааны төвд лангуу ажиллуулдаг байсан аж. Нөхөр нь эхнэрээ маш их харддаг, тэд салах өргөдлөө өгөөд тусдаа амьдарч байх хугацаандаа ч байнга ирж дарамталдаг байжээ. Хэрэг гарсан өдөр нөхөр нь дахиад ирснийг харсан ойр орчмын түрээслэгчид “Урьдын адил эхнэртэйгээ салахгүй байх талаар ярьж, гуйж, ярилцаж байгаад явчих байх” гэж бодсон байна.

Гэвч удалгүй амь хохирогч орилж эхэлсэн бөгөөд хамгийн ойрхон байсан нэг эмэгтэй салгах гэж очсон ч хэрэгт холбогдогч хутга гаргаж ирсэн тул эмэгтэй зугтаж, бусдаас тусламж гуйжээ. Худалдааны төвд байсан түрээслэгчид цагдаад яаралтай мэдэгдэж, мөн үүдэнд байсан хоёр эрэгтэйг туслахыг хүссэн байна.

Хэрэг үйлдэгдсэн лангуу.

Хэрэгт холбогдогч уг хэргийг үйлдэж байхдаа ухаан мэдрэлгүй мэт байсан гэх.

Худалдааны төвийн нэгдүгээр давхарт байсан хүмүүс нийлэн эмэгтэйг хамгаалж салгахыг оролдсон боловч хэрэгт холбогдогч хөлөөс нь татаж, хүрч чадсан газартаа хутгалж байжээ. Энэ бүх явдал ердөө 2-3 минутын дотор болж өрнөсөн байна.

Гаднаас орж ирсэн, биерхүү хоёр эрэгтэй хэрэгт холбогдогчийг амь хохирогчоос салгахын тулд хүч хэрэглэж, эцэст нь түүнийг төмөр зүйлээр цохиж ухаан алдуулсан бололтой. Эх сурвалжийн хэлснээр, хэрэгтэн ухаан мэдрэлгүй мэт улайран дайрсаар байсан тул түүнийг өөрийгөө захирах чадваргүй болгож байж л зогсоож чадсан аж.

Уг хэргийн талаар өөр нэгэн эх сурвалжаас тодруулахад, тухайн үед худалдааны төв дотор хамгаалагч, гадаа зогсоолын ажилтан байсан төдийгүй өөр хэд хэдэн хүн ойр орчимд байжээ. Хэрэг маш хурдан буюу хоёрхон минутын дотор болоод өнгөрсөн гэж хэлж байгаа бөгөөд бүгд л сандарч, айж, зарим нь тусламж гуйж, зарим нь салгах гэж оролдсон. Мөн хэрэгт холбогдогч ямар нэгэн согтолтын зэрэггүй, эрүүл байжээ.

Тухайн гэр бүл бага насны хүүхэдтэй. Нөхөр нь гэр бүлийн хүчирхийлэл үйлддэг, мөн эхнэрээ их хардаж зовоодог хүн байсан. Тиймээс гэрлэлтээ цуцлуулах асуудлаар шүүхэд хандсан бөгөөд хэдэн сарын өмнө өргөдлөө өгсөн ч шүүх эвлэрлийн хугацаа өгч, тусдаа амьдарч байжээ. Хэрэг гарахаас ердөө гурван хоногийн дараа тэдний шүүх хурал товлогдсон байсан байна.

Харин хэргийн үйл явцын талаар цагдаагийн байгууллагаас тодруулахад, "Одоогоор хэрэг үйлдсэн этгээд цагдан хоригдож, байцаалт өгч байгаа. Мөн тухайн дэлгүүрийн камерын бичлэгийг шалгаж, хэрэг болсон газарт байсан хүмүүсээс мэдүүлэг авч буй. Хэргийн дүгнэлт гараагүй, шалгалтын ажил үргэлжилж байна" гэж хэлсэн юм.

Гэр бүл салалт хуулийн дагуу хэрхэн явагддаг талаар

Гэмт хэргийн шалтгаан нөхцөл тэдний салах өргөдлөөр шүүхэд хандсан, тусдаа амьдарч байсан зэрэгтэй шууд бусаар холбоотой байна. Өөрөөр хэлбэл, гэр бүл салах процесс дунд тэдний харилцаа энэ түвшинд хүртлээ муудсан байх магадлалтай талаар сэтгэл зүйчид онцлоод эхэлжээ.

Монгол Улсын Иргэний хууль болон Шүүхийн тухай хууль, Гэр бүл, нийгмийн харилцааны тухай холбогдох журам-д заасны дагуу гэр бүл салалт дараах үндсэн хууль зүйн дараалалтайгаар явагддаг.

1. Гэр бүл салах өргөдөл гаргах

Гэр бүл салгах өргөдлийг:

• Нөхөр, эхнэрийн аль нэг нь дангаараа

• Эсвэл хоёулаа хамтран шүүхэд гаргана.

Өргөдөлд:

• Гэр бүл салгах болсон шалтгаан

• Хүүхдийн асрамж, тэтгэлэг

• Хөрөнгийн хуваарилалт зэргийг тодорхой тусгасан байна.

Өргөдлийг тухайн хүний оршин суугаа газрын харьяалах Сум дундын иргэний хэргийн анхан шатны шүүхэд өгнө.

2. Шүүхээс эвлэрүүлэх хугацаа олгох

• Хуулиар, хэрвээ хоёр талын аль нэг нь салгахыг хүсэхгүй байгаа бол шүүх эвлэрүүлэх 3 сарын хугацаа олгож болно

• Эвлэрүүлэх хугацаа нь нэг удаа 3 сар хүртэл байж болно, үүнээс хэтрэхгүй

• Энэ хугацаанд хосууд салалгүй үлдэх эсвэл салах шийдвэрээ дахин баталгаажуулах боломжтой.

Хэрвээ шүүхэд нотлох баримтаар хүчирхийлэл, дарамт, гэр бүлийн бусад эрсдэл байгааг харуулбал эвлэрүүлэх хугацааг өөрчлөх, алгасах, эсвэл шууд шийдвэр гаргах боломжтой.

3. Шүүхийн шийдвэр гаргах

• Хосууд салахаар санал нэгдсэн бол шүүх хуралдаанаар гэр бүл салалтын шийдвэрийг хурдан хугацаанд гаргана.

• Хүүхэдтэй, хамтын хөрөнгөтэй бол дараах асуудлуудыг хамтад нь шийднэ: Хүүхдийн асран хамгаалагчийг тогтоох, хүүхдийн тэтгэлэг, холбоо барих нөхцөл, хамтын хөрөнгийн хуваарилалт

4. Иргэний бүртгэлд бүртгүүлэх

• Шүүхийн шийдвэр хүчин төгөлдөр болсны дараа тухайн иргэн Иргэний улсын бүртгэлийн хэлтэст (УБХ) хандаж, гэрлэлтийг дуусгавар болгосон бүртгэл хийлгэнэ.

• Гэрлэлт дуусгавар болсон тухай гэрчилгээ олгогдоно.