Нийслэлийн ИТХ-ын дарга А.Баяртай ярилцлаа.

-Таныг Баянзүрх дүүргийн Иргэдийн төлөөлөгчдийн хурал, НАМЗХ-д байсныг мэдэх юм. Чухам яагаад улс төрд орох болов?

-Миний хувьд оюутан байхаасаа л бизнес хийж эхэлсэн. Өөрийгөө сорих, хүнд хэрэгтэй хүн байхсан гэх бодолдоо хөтлөгдөж яваад 2016 онд юм.Улсын эдийн засаг амаргүй, гадна дотны хөрөнгө оруулагчдын итгэл унтарсан үе байсан л даа. Аливаа бизнесийн ч бай, улстөрчийн ч бай орчныг гаднаас нь хараад шүүмжлэх шиг амархан ажил байхгүйг мэдэрсэн. Тиймээс залуу, эрч хүчтэй байна, өөрөө оролцъё гэж шийдсэн. Дүүргийн иргэдийн хурлын төлөөлөгч болохоор өрсөлдлөө. Сонгогдоод бүлгийн дарга боллоо. БЗД-ийн Иргэдийн хурлын даргаар ажиллаж надаас ямар санаачилга, бүтээмж гарч болох шандасаа сорьсон. 2016-2020 онд манай нам сөрөг хүчин байсан. 2020 оноос анх удаа үргэлжлүүлж эрх барих боломж олдсон. 2024 онд Нийслэлд нэр дэвшиж, журмын нөхдийнхөө дэмжлэг, санал хүсэлтээр НИТХ-ын даргын үүрэгт ажилд хүчин зүтгэж явна.

-Та эмч мэргэжилтэй юм байна лээ. Мэргэжилдээ дуртай юу?

-Дуртай байлгүй яах вэ. Би эмч гэр бүлд төрж өссөн. Ээж минь эмч. Манай гэрийнхэн бол тэр чигээрээ эмч. Эхнэр эмч. Багадаа л эмч л болно гэж хэлдэг байсан. 2002 онд АУИС-д тэнцэж ороод 2008 онд төгссөн. Тэр үеийн АСТ тэмцээнд би алгасалгүй орж түрүүлдэг, онц сурдаг оюутан байлаа. Сургуулиа төгсөхөд надад Япон улсад гар сарвууны мэс засалчаар магистрын зэрэг хамгаалах, үргэлжлүүлж резидентээр сурах урилга ирж байлаа. Тэр үед “Би одоо яг эмчээрээ ажиллах уу, хувийн бизнес хийх үү гэсэн сонголт хийх хэрэгтэй болж, нэг ахтайгаа зөвлөлдөөд бизнесийн салбар руу орохоор шийдэж, Япон явахаа больсон. Нэг хэсэг зочид буудалд менежер хийлээ. Тэгээд мэргэжлээ солиод Бизнесийн удирдлага маркетингийн чиглэлээр үргэлжлүүлээд сурч төгссөн.

-Эрх зүйчээр бас сурсан бил үү?

-МУИС-д эрх зүйчээр сурч төгссөн.

-Гурван өөр мэргэжлээр сурсан юм байна. Яагаад ийм сонголтууд хийсэн юм?

-Амьдралын шаардлага юм уу даа. Гэр бүлээрээ эмч байсан болохоор багаасаа эмч болно гээд шийдчихсэнээс болсон. 2007 оны үед байх аа, морг руу ороод их айхтар зүйл харсан.Тэр надад их тийм том цочроо өгсөн. Тэрний дараа би Гэмтлийн эмнэлгийн хүлээн авах дээр оюутан байхдаа очиж ажиллаж байсан. Нэг танилын маань дух нь цөмөрчихсөн ирэхэд оёдол тавьж байлаа.

Энэ хоёр тохиолдол сэтгэл зүйн хувьд айхтар нөлөө үзүүлсэн байх. Гэхдээ Анагаахад сурсан зургаан жил миний амьдралын их чухал үе. Нэгэнт сурч төгссөн энэ мэргэжлээ яаж амьдралд нийцүүлж ажиллах вэ гэж бодож, эрүүл мэндийн салбар луу аль болох түлхүү ажиллахыг зорьдог. НЭМГ-ын даргатай уулзаад цаашид ямар чиглэлээр яаж ажиллах талаар санал солилцох жишээтэй. Түрүүнд хэлсэн зочид буудалд ажилласан тухайд хичээлийнхээ хажуугаар нэг жил ажилласан. Эхлээд ажилтнаар ороод менежер болсон. Цаашлаад энэ чиглэлийнх нь боловсрол хэрэгтэй юм байна гээд суралцаж, илүү мэргэжлийн түвшинд ажиллахыг хүссэн. За тэгээд 10-аад жил бизнесийн салбарт ажиллалаа.

Анх төлөөлөгч болоод бүлгийн дарга болоод ажиллаж байхад надад бусдаас дутагдах нэг зүйл бол энэ эрх зүйн мэдлэг байсан. Төрийн ажил дандаа л хууль дүрэм, журамд нийцэж ажиллана. Байнга албан бичиг төлөвлөх шаардлага тулгарна. Албан бичигтээ хуулийн ямар заалтыг үндэслэх вэ гэдгээс эхлээд зайлшгүй суралцах шаардлага үүссэн. Эрх зүйч мэргэжлээр сурсан нь ийм учиртай. Сурсан бүхэн маань өнөөдөр хэрэг болж байгаа. Эмчийн мэргэжил маань зөвд зөөлөн, бурууд хатуу, нягт нямбай байхад сургасан. Эмч нар зогсоо зайгүй ажилладаг хүмүүс. Бизнесийн удирдлагаар сурсан маань ч олон зүйлд хэрэг болж байна. Судалгаан дээр тулгуурлаж ажил хийдэг боломжийг олгож өгсөн болов уу. Цаашдаа эдийн засгийн чиглэлээр сурах хүсэлтэй байгаа.

-НИТХ жилдээ цөөхөн хуралддаг. Үйл явдлын мэдээлэл багатай байдаг. Сүүлийн үед үйл явдал, хурлын мэдээлэл тасрахгүй боллоо. Сая та “Эх оронч хүүхэд” арга хэмжээнээс ирсэн гэсэн үү?

-Тийм.

-Ямар учиртай арга хэмжээ юм?

-Иргэдийн хурлын даргын чиг үүрэгт гэмт хэрэг, зөрчлөөс урьдчилан сэргийлэх ажил бий. Баянзүрх дүүрэгт хурлын дарга болж эхлээд л би гэмт хэрэг, зөрчлийн мэдээтэй танилцаж эхэлсэн. Сэтгэл эмзэглэм мэдээ олон. Тодорхой төрлийн гэмт хэрэг тогтмол өсөж, тэнд нь хүүхэд залуус түлхүү холбогдож байгааг хараад сэтгэл хөндүүр явах болсон. Хүүхэд, залуус мэдэхгүйгээсээ болж алддаг. Тиймээс “Эх оронч сурагч” гэх хөтөлбөрийг санаачилж, хэрэгжүүлээд эхэлсэн. Ирээдүй үеэ зөв төлөвшүүлэхэд хүүхдийг багаас нь бэлдэх хэрэгтэй. Үүний төлөө миний, бидний хийж байгаа ажил чиглэж байна. Хүүхдийг төлөвшүүлэхэд, өөрийгөө танихад энэ хөтөлбөр жижигхэн ажил юм шиг боловч мөн чанартаа бол 30 жилийн дараахь зөв иргэнийг бэлдэж байгаагаараа том. Хөтөлбөрт хамрагдсан хүүхдүүд ирээдүйд гэмт хэрэг зөрчилд санаатай байдлаар бол оролцохгүй гэдэгт итгэж байна.

-Та хүүхдэд чиглэсэн ажлууд их хийдэг юм билээ “Баяртай тэтгэлэг” гэж сонссон. Хүүхдүүдэд тэтгэлэг өгч гадагш сурахад нь дэм болдог гэж ойлгосон.

-Монгол Улс цаашид хөгжихөд хүний хөгжил эхэнд эрэмбэлэгдэнэ. Хүнээ хөгжүүлэхэд эрүүл мэнд, боловсрол, гэр бүлийн хүмүүжил их чухал. Хүний хөгжлийн чухал нэг зүйл боловсрол учраас би боловсрол руу түлхүү ажиллаж байгаагийн нэг нь “Баяртай тэтгэлэг”. Есдүгээр сарын дундаас эхэлж дотоодын сургуульд онц сайн сурч байгаа, нийгмийн сайн дурын ажилд идэвхтэй оролцож байгаа хүүхдүүдийн дунд дотоодын сургуулийн тэтгэлэг зарлана. Би өмнө нь аль болох гадагшаа явуулахыг л зорьсон. Юм үзэж, нүд тайлна гэж ярьдаг даа. Гадаадад цөөхөн хоног яваад ирсэн ч ертөнцийг өөрөөр харж эхэлдэг “Манай улс орон ийм түвшинд байгаа юм байна. Бид ямар түвшинд хүрэх ёстой вэ” гэдэг харьцуулалтыг хүүхдүүд маш сайн олж хардаг. Биднээс өмнө туулаад үзээд амжилтад хүрчихсэн улс орнуудаас богино хугацаанд шийдэл олж асуудлаа шийдвэрлэж, нэлээн хэдэн шат түрүүлж алхах энэ боломжийг нь би гадаадад сурснаараа олох байх гэж тооцож, энэ тэтгэлэгт хөтөлбөрийг санаачилж зохион байгуулж эхэлсэн юм.

-“Empathy education” гэж бас л хүүхдэд чиглсэн хөтөлбөр хэрэгжүүлдэг юм байна. Энэ талаар тодорхой хэлж өгөөч?

-Бас л хүүхдийн зан төлөв төлөвшилд түлхүү нөлөөлж байгаа. Амьтныг хайрлах замаар хүүхдүүдийг яаж зөв хүн болгож хүмүүжүүлэх ухааныг л зааж өгч байгаа юм. Энийгээ монгол өв соёл, мал аж ахуй дээр түшиглэж зааж байгаа. Одоогоор энэ хөтөлбөрт 4500 хүүхэд хамрагдсан. 3500 хүүхэд дахиж хамрагдах хүсэлт өгөөд байна. Ирэх есдүгээр сараас үргэлжилнэ. Амралтын өдрөөр хүүхдүүд малтай айлд бүтэн өнжөөд тэр айлдаа туслаад, давхар суралцдаг. Үнээ яаж саадаг юм гэдгийг нь хүртэл ойлгуулж өгч байгаа юм. Хүүхдүүд ишиг, хургатай тоглоод, хайрладаг. Ишгэн дээрээ баахан зурагтай наалт наачихаад, тэврээд салахгүй. Багаасаа амьтан хайрлаж өсгөсөн хүүхэд буруу зүйл хийдэггүй. Амьтан хайрлах замаар хүүхдүүдийг хүмүүжүүлж байгаа юм. Нөгөө талдаа хүүхдийг өр зөөлөн, нинжин сэтгэлтэй болгох төсөл юм. Хөдөөгийн малчдаа дэмжиж байгаа бас нэг хэлбэр. Аль аль талдаа харилцан ашигтай байхаар зохицуулалт. Европт гарсан үр дүн Монголд ялгаагүй л гарч байна. Тэгэхдээ таван хошуу малаараа дамжуулж энэ төслөө хэрэгжүүлэх юм бол илүү үр дүнтэй юм байна лээ.

-НИТХ-ын дэргэдэх Гэмт хэргээс урьдчилан сэргийлэх зөвлөл гэж байдаг. Зөвлөлийн дарга нь та биз дээ. Зөвлөлийн үйл ажиллагаа идэвхжээд байгааг үйл явдлын мэдээнээс харж байна.

-Хуулиараа Зөвлөлийг НИТХ-ын дарга удирддаг. Цагдаагийн байгууллагын удирдлага, прокурорын байгууллага, ер нь бол хууль, хүчний байгууллагын удирдлагуудаас зөвлөлд багтдаг. Гэмт хэрэг, зөрчлөөс урьдчилан сэргийлэх ажлыг яаж бодитой болгох вэ, аль сегмент рүү орох вэ гэж төлөвлөгөө гаргаж ажилладаг.

Бид гэмт хэргээ л бууруулах ёстой. Тэгэхийн тулд хүн рүүгээ чиглэсэн тодорхой төлөвлөгөө боловсруулъя гэж байгаа юм. Анх удаагаа хүний хөгжлийн бодлогын бичиг баримттай болно.

-Та хүүхдийн багийн спортыг дэмждэг. Саяхан гэхэд л бэйсболын суурь T-ball спортын УАШ тэмцээнийг амжилттай зохион байгуулсан. Энэ ямар учиртай спорт болоод та хөгжүүлэх гээд байна вэ?

-Спортод суурилж хүүхдүүдийг зөв хүмүүжилтэй болгох л санаа зорилго агуулж байгаа юм. Миний танил 82 настай япон өвгөн “Би 17-18 жил монгол хүнд тусалж, чадлаараа дэмжиж, хөрөнгө оруулсан. Монголчууд эв нэгдэлгүй, бие биенээ муулах юм. Үүнийг засах юм бол амжилт ирнэ. Надтай 18 жилийн өмнө үй зайгүй сайхан нөхөрлөж байсан хоёр монгол хүн бие биенээ үзэж чадахаа больчих юм. Үүнийгээ л больчихвол Монгол Улс хөгжих байх аа” гэж хэлсэн. Энэ үг зүрхэнд орсон. T-ball хүмүүжлийн ач холбогдолтой спорт. Жишээлбэл, бөмбөгөө цохичихоод гүйхдээ цохиураа эвтэйхэн, зөөлөн тавьдаг. Энэ спортын мөн чанар нь ялахдаа гол нь биш, үйлдэл бүр нь хүмүүжил олгодог.

-Та өөрөө багтай гэсэн?

-Өнгөрсөн жил Азийн аваргад яваад манай баг цомын эзэн болоод ирсэн. Монголд албан ёсоор хөгжөөд нэг их удаагүй ч цом авна гэдэг чинь манай хүүхдүүд сайн байгаа л гэсэн үг. Анх Баянголын төлөөлөгч Б.Сэмжидмаа Монголд хөгжүүлэх гэж эхлүүлснийг би зурагтаар хараад “Наадах чинь ер нь мэддэг спорт болоод явчихлаа шүү” гээд их сонирхсон. Японд очоод үзсэн чинь нээрээ япон хүүхдүүдийг зөв хүмүүжилтэй болгож байгаа спорт бол T-ball байсан. Бэйсбол дэлхийн хамгийн өндөр цалинтай, дээд зэрэглэлийн спорт. Энэ төрлийн спортоор хичээллэдэг хүүхдэд тэтгэлэг, дэмжлэг их олддог. Монгол хүүхдүүдэд нэг ч гэсэн шинэ боломж, шинэ замыг энэ спорт нээж өгнө. Тиймээс би багаа бүрдүүлэхдээ асрамжийн газрын хүүхдүүдээр бүрдүүлсэн.

-Таны ярианаас НИТХ гадаад харилцаандаа нэлээд анхаарч байгаа нь анзаарагдлаа. Төсөл хөтөлбөр хэрэгжүүлэх, хөрөнгө оруулалт татах чиглэлд ажил хэрэг болж байгаа жишээ дурдаач?

-Би ганцаараа л ингэж тэгж ажиллалаа гэж ойлговол маш өрөөсгөл болно. Өмнөх ИТХ, Нийслэлийн Засаг дарга нар ч өөр өөрийн санаачилсан бодлого, хөтөлбөр, ажлаа хэрэгжүүлээд л явсан. Миний тухайд улсын төсвийн хөрөнгө оруулалтыг байнга хараад сууж болохгүй. ОУБ-ын төсөл хөтөлбөрийг маш сайн татах ёстой. Тэгж хөрөнгө оруулалт татаж байж үр дүнд хүрнэ. Азийн хөгжлийн банктай нэлээд хэдэн удаагийн уулзалт зөвшилцөл хийж 2.5 сая ам.долларын хөрөнгө оруулалт татлаа. Энэ нь 500 өрхийн цахилгааны эх үүсвэрийг нарны панелаар шийдэх төсөл юм. Санамж бичиг зурах гээд бэлтгэл шатандаа явж байна. Энэ мэтчилэн гадаад харилцаагаа тэлж, гадны хөрөнгө оруулалтыг татаж, төсөл хөтөлбөрүүдийг хэрэгжүүлэхээр зорьж байна.

-Иргэдийн хурал хуулиараа улиралд нэг, журмаараа сард нэг хуралддаг. Та ИТХ даргалснаас хойш ажлын хэсгийн хурлаас эхлээд байнгын л хуралддаг болчихлоо. Ажил үнэхээр их байна уу.

-Сар бүр хуралдаад явж байна. НИТХ-д чадалтай, зорилготой, боловсролтой, хийж бүтээх сэтгэлтэй олон залуус иргэдээ төлөөлөөд орж ирсэн. Төлөөлөгчдийг боловсролын түвшнээр нь судалж үзэхэд 70-аас дээш хувь нь давхар мэргэжилтэй, магистр ба түүнээс дээш зэрэг цолтой, эрх зүйч, инженер мэргэжилтэй хүмүүс байна. Төрийн албанд ялангуяа Улаанбаатар хотын асуудалд инженерийн шийдэл, хууль эрх зүй, эдийн засагч мэргэжилтэй залуучууд чухал. Сайн баг бүрдлээ л гэж харж байгаа.

-НИТХ хотын даргатайгаа хэр ойлголцож, уялдаж ажиллаж байна вэ?

-Ямар ч асуудалгүй ойлголцоод ажилладаг. Энэ хүний хувьд үнэхээр Улаанбаатар хотын асуудлаа тодорхой болгоод, шийдлээ томоор харж чадаж байгаа анхны хотын дарга гэж хэлмээр байна. Олон залууст итгэл үзүүлээд ажиллах орон зай, талбарыг нь гаргаж өгч байгаа. Та иргэдийн хурал идэвхтэй ажиллаад байна гэж харснаа хэлсэн. Хотын дарга анх намайг ажлаа аваад байх үеэс нээлттэй ярилцсан. Өнөөдөр би 9 том ажлын хэсэг гаргачихсан ажиллаж байна. Улаанбаатар хотын асуудлуудыг шийдэх шийдэл хайгаад, эрэмбэлээд, хийж эхэлсэн. Бид хариуцлагатайгаар ажлаа тэнцүү хувааж аваад хийгээд эхэлсэн. Миний хувьд авто замын түгжрэлийг бууруулах богино болон дунд хугацааны ажлыг хариуцан ажиллаж байна.

-Түгжрэл бууруулах чиглэлд богино, дунд хугацаанд юу хийх вэ. Замын түгжрэлийг сааруулахад технологи ашиглаж эхэлж байгаа нь хэр үр дүнтэй вэ?

-Түгжрэл дээр их олон ажил бий. Хоёр машин шүргэлцэхэд л цагдаа, даатгалаа хүлээгээд зам таг гацдаг. Зам тээврийн ослын дуудлагын 70 орчим хувь нь хоёр машин шүргэлцсэн гэх дуудлага байдаг. Энэ тохиолдолд цагдаа очихгүйгээр асуудлаа шийдээд, маш хурдан замаа чөлөөлж, салдаг байх зохицуулалт зайлшгүй шаардлагатай.

Дэлхийн олон орон аль хэдийнэ энэ төрлийн ослыг технологиор шийддэг болчихсон. Дрон нислээ, ослын зураг авлаа, хэмжилт хийлээ, замаа чөлөөллөө, ингээд асуудал шийдэгдчихнэ. Замдаа явж байхад нь хохирлын хэмжээ бодогдож, буруутай этгээд нь тодорхой болно.

-Яг бодит нөхцөл дээр туршилт хийж үзсэн үү?

-Бид туршилт хийж үзсэн. Хэргийн газарт цагдаа очиход багадаа 15 минут, түгжрэл их үед 40 ба түүнээс дээш хугацаа зарцуулж очдог. Цагдаа очоод өвлийн хүйтэн, зуны халуун, усан бороотойд ч метр бариад гар аргаар хэмжиж, гараар зургаа гаргадаг. Цаг хугацаа алддаг. Харин дрон нисэхэд таван минутын дотор хэмжилт хийгээд автоматаар бүх үйлдлүүдийг алдаа мадаггүй гаргаж байна.

-Уулзвар, замуудын буруу төлөвлөлтөөс түгжрэл их үүсдэг гэдгийг мэргэжлийнхэн хэлдэг. Энэ чиглэлд юу хийх вэ?

-Харин уулзвар шинэчлэлтийн хувьд нөөц бололцоондоо тулгуурлаж төсөв хөрөнгөө тавихгүй бол хоосон ярьсан, хийсэн зүйлгүй л болж хувирна. Бид 5-10 уулзвар дээр шинэчлэл хийхээр тооцоод байна. Байршлуудыг бүгдийг нь эрэмбэлсэн. Энэ жил зураг төслөө хийнэ. Төр, хувийн хэвшлийн түншлэлээр хийх санаачилга гараад, бас судалж байна. Мөн хөнгөлөлттэй зээл, буцалтгүй тусламж хайж байна. Төсөл хөтөлбөрүүд амжилттай болвол Улаанбаатар хот 2028 он гэхэд 5-10 уулзвар шинэчилж, гэрлэн дохиогүй болох байх.

-Автомашины татвар нэмсэн нь гал дуудсан шийдвэр байсан. Иргэд бас л бухимдсан. Тиймэрхүү цочир шийдвэрүүд НИТХ-аас хэр гарах бол?

-Хотын замын 82 хувь нь засвар, шинэчлэл шаардлагатай байсан. Авто замаа шинэчилж, тордохгүй бол үүнээс ч дор нөхцөл байдал үүснэ. Өнөөдөр хар л даа. Хаа сайгүй авто замын шинэчлэлт, засварын ажил ид өрнөж байгааг бүгд харж байна. Авто замаа бид 2-3 хоногийн дотор иргэндээ төвөг учруулахгүйгээр богино хугацаанд засаж сайжруулсаар байна.

Бид хилийн дээс алхаад л хүн болгон дэгтэй болдог. Гадаадад очоод л машин түрээслэхдээ ч дүрмээ зөрчихөө болиод, дохиогоо өгч эгнээ байраа солиод, цагаан шугам давж эргэхгүй л болчихдог. Монголдоо дур зоргоороо авирлаад, өөрөө дүрэм зөрччихөөд, бусдад шаардлага тавиад бухимдаад байдаг. Үүнийгээ таслан зогсоох хэрэгтэй. Өнөөдрийн байдлаар 176 уулзвар дээр 2600 камер суурилуулсан байгаа. Өдөрт дунджаар 100 орчим мянган зөрчлийг ухаалаг системд суурилсан камераар илрүүлж байна.

-Тэр ухаалаг систем чинь алдаа заагаад дүрмээр явсан хүнд торгууль оногдуулаад байна гэсэн шүү.

-Нийслэлийн замын хөдөлгөөнийг AI буюу хиймэл оюун ухаан ашиглан бүрэн хянах ажил туршилтын шатандаа явж байна. Уг туршилтыг Замын хөдөлгөөний удирдлагын төвөөс хийж байгаа. Туршилт он дуустал үргэлжлэх бөгөөд ирэх оны нэгдүгээр сарын 1-нээс албан ёсоор хэрэгжиж эхлэх юм. Одоогоор дүрэм зөрчсөн жолооч нарын утасны дугаарт зөрчлийн мэдээлэл илгээх туршилтын ажил үргэлжилж байна. Туршилтын хугацаанд иргэдээс ирсэн санал, гомдлыг засаж, сайжруулаад явна. Ирэх оны нэгдүгээр сарын 1-нээс асуудалгүй хэрэгжинэ.

-Нийслэлийн 45 төлөөлөгчөөс 40 нь МАН-ынх. НИТХ-ын АН-ын төлөөлөгчдийн байр суурь, санал шүүмжийг хэр тусгаж, хүлээж авдаг вэ?

-Харьцаа тийм ч манай төлөөлөгчид шүүмжлэхээ шүүмжилж, дэмжихгүйгээ бас дэмжихгүй. Тэгж хайрцаглагдаад байдаггүй. Судалгаанд суурилж ажил хийх эрмэлзэлтэй, ийм төлөөлөгч нар байна. Зоригтой шүүмжилнэ, Болохгүй гэж үзвэл асуудлыг нээлттэй хэлэлцээд, дэмжихгүй тохиолдлууд байна.

-Дугуй, скүүтер, мопед гээд машин зам дээр ч холилдоод, явган хүний зам дээр ч давхилдаад байдаг. Үүний шийдэл юу байна. Иргэдийн бухимдлыг төрүүлж байгаа л сэдэв шүү дээ?

-Явган хүн явахад ч аюултай хот боллоо гэх гомдол их ирж байна. Хүүхэд, хөгшид скүүтер, мопед, сурронд дайруулж хохирч байна. Бид үүнийг цэгцэнд оруулахын тулд ААН байгууллагуудын удирдлагуудтай уулзаж, үүрэг өгсөн. Хаа сайгүй, тавьчихдагийг болиулж, тодорхой байршлуудад тавьдаг болох, тэмдэг, тэмдэглэгээ хийхийг санууллаа. Ингээгүй бол журамлах эрх зүйн орчныг нь бүрдүүлчихсэн. Техникийн бүрэн бүтэн байдал хангахгүй байгаа скүүтерүүдээ ялгаж ангилаад, актлах ажил руу орно. Хүн их зорчдог эрсдэлтэй бүсүүдэд 8-10 км цагийн хурдтай, бусад хэсэгт дэд бүтцийг нь барьж өгөөд 20 км цагийн хурдтай явуулдаг байхаар зохицуулалт хийж байгаа. Энэхүү долоо хоногоос энэ асуудал цэгцэрчих байх.

-Бид метротой болох уу. Бүтээн байгуулалтын ажил ямар шатандаа явна вэ?

-Метроны эхний шатны ажлыг ирэх есдүгээр сард эхлүүлэхээр манай залуучууд, нийслэлийнхэн хичээн ажиллаж байна. Үүний зэрэгцээ Туулын хурдны зам, Дүүжин тээврийн эхний шугамыг барьж байгуулахтай холбоотой ажил ч хуваарийн дагуу урагштай байна.

-Бодож төлөвлөснөөрөө ажиллаж чадаж байна уу?

-Ес дэх удаагийн НИТХ түүхэн том шийдвэрүүдийг гаргасан гэж ирээдүйд дурсагдвал сайхан шүү дээ. Тухайлбал, метротой боллоо, агаарын бохирдлыг бууруулсан гэж яриад суувал хэчнээн сайхан. Тиймээс бидний хийж байгаа өнөөдрийн ажлыг шүүмжилж байж болох ч ирээдүйд хүлээн зөвшөөрөх, эх оронч шийдвэрийг гаргахыг хичээнэ. Нэг далайлтаар бүхнийг шийдэх амаргүй. Гэвч бидний хувьд шантарч няцах эрх байхгүй. Надад эргэлзэх зүйл алга. Харин ч илүү юу хийх вэ л гэсэн эрмэлзэлтэй зүтгэж байна.

Эх сурвалж: Өдрийн сонин