Боловсролын салбарын 2026 оны төсвийн төсөлд олон нийтийн саналыг авах хэлэлцүүлэг болж өнгөрлөө. Энэ үеэр Монголын Багш нарын Үйлдвэрчний Эвлэлийн Холбооны тэргүүн Д.Мөнхбаатар "Ирэх жил багш нарын цалинг хэдэн хувиар нэмэх вэ" гэж асуулаа. Уг асуултыг Төсвийн Ерөнхийлөн Захирагч буюу Боловсролын сайдад тавьсан ч хэлэлцүүлгийн үеэр эзгүй байсан тул тус яамны Төрийн нарийн бичгийн дарга Х.Батжаргал хариуллаа. Тэрбээр "Боловсролын салбарт ажиллаж буй 100,000 орчим мянган багш, ажилтан бий. Үндсэн цалинг багахан хөдөлгөхөд үндсэн цалинг дагасан олон төрлийн урамшуулал, нэмэгдэл байдаг тул үндсэн цалинг 200-300 хувь нэмэгдүүлсэнтэй тэнцэхүйц төсвийн ачаалал үүсгэдэг. Таны асуултад боловсролын салбарын багш ажилтны цалинг хэдэн хувиар нэмнэ гэж шууд хэлэх боломжгүй. Учир нь Боловсролын сайд дангаараа мэддэг асуудал биш. Засгийн газар нэгдсэн бодлогоороо шийддэг. Боловсролын Яам багш нарын гарт очиж буй орлогыг нэмэгдүүлэх тал дээр ямар зохион байгуулалт хийх вэ, цалингийн бүтцийг нь хэрхэн өөрчлөх вэ гээд ажиллаж байна. Харилцан адилгүй багш нарт очиж буй нэмэгдэл, урамшуулал зарим нь давхардаж байна. Бидэнд буй судалгаагаар хичээлийн жилийн сүүлийн хагаст амралтын мөнгө зарим нь 7-8 сая, 4-5 сая төгрөг авч байхад, олонх нь буюу 50 орчим хувь нь нэмэлт урамшуулал авч чадахгүй байгаа. Иймд цалингийн бүтцийг өөрчлөхөөр Засгийн газарт саналаа хүргүүлэхээр бэлдэж байна. Мөн хувьсах зардлын бүтцийг шинэчлэхээр боловсруулж байна. Түүнээс биш механикаар хэдэн хувиар нэмнэ гэж хэлэх боломжгүй" гэв