Занабазар хийцийн бурхан Франц Улсад их хэмжээний мөнгөөр зарагдсан гэх мэдээллийн талаар БСШУЯ-ны сайд асан Ё.Отгонбаяр тайлбар хийжээ.

Тэрбээр сайдаар ажиллаж байсан хүний хувьд энэ талаар тайлбар хийхдээ “Ар, Өвөрмонгол нэгдмэл нэг л улс байсан шүү дээ. Тиймээс Өндөр гэгээн Занабазарын хийцийн бурхан энд тэндгүй л байдаг. Харин сая Парист зарагдсан бурханыг манай улсаас гарсан эсэхийг бид нотолж чадвал буцааж авах эрхзүйн үндэслэл үүснэ. Манай улс Занабазарын хийцийн бурханыг хэзээ ч зарж байгаагүй. Хааяа нэг үзэсгэлэнд тавих тохиолдол байсан. Энэ бурханыг гадаад руу гаргахаас нь өмнө мэдэх боломж байхгүй. Жишээлбэл, Өвөрмонголын аль нэг хийдээр, эсвэл хүний гараар дамжаад гарчихсан байж болно шүү дээ. “1954 онд хүнээс худалдаж авсан” гэсэн бичиг баримттай байна гэсэн. Гэтэл 1954 оноос өмнө Монголд ирж байсан экспедицүүд аваад явсан эсэхийг архиваас шүүж шалгахаас өгсүүлээд олон ажил ундарна л даа. Хэрвээ манай улсаас гарсан гэдгийг тогтоовол бид үнэ төлбөргүй авах эрхтэй. Энэ эрхийг ЮНЕСКО-гийн 1972 оны конвенциор баталгаажуулсан байдаг юм. Хамгийн гол нь, зарагдсан бурхан манай улсынх мөн эсэхийг тогтоох нь чухал. Хэрвээ өөр газраас Өвөрмонгол, Буриадаас гарсан байвал бид яах ч аргагүй гэсэн үг” гэжээ.