Калифорнид өсвөр насны хүү амиа хорлосон хэрэгт ChatGPT амиа хорлох аргуудын талаар зөвлөж байсан гэж үзэж, талийгаачийн эцэг эх OpenAI болон гүйцэтгэх захирал Сэм Алтманыг аюулгүй байдлыг үл тоон ашиг орлогыг дээгүүр тавьсан хэмээн буруутган мягмар гарагт шүүхэд нэхэмжлэл гаргажээ.

16 настай Адам Рейн энэ оны дөрөвдүгээр сарын 11-нд амиа хорлосон бөгөөд тэрээр сар орчмын турш ChatGPT-тэй амиа хорлох тухай ярилцаж байсан гэж эцэг эхийнх нь шүүхэд гаргасан нэхэмжлэлд дурджээ.

Тэдний мэдээлснээр, ChatGPT Рейний амиа хорлох бодлыг зөвшөөрч, үхэлд хүргэж болзошгүй аргуудын талаар нарийвчилсан мэдээлэл өгч, эцэг эхийнх нь архины шүүгээнээс хэрхэн архи нууж авах, бүтэлгүйтсэн оролдлогын мөрийг хэрхэн далдлах талаар хүртэл зааварлаж байжээ. Мөн амиа хорлох захидал хүртэл бичиж өгье гэж санал болгосон байна.

Нэхэмжлэлд OpenAI-г хүүгийн үхэлд хариуцлага хүлээлгэх, бүтээгдэхүүний аюулгүй байдлын тухай хуулийг зөрчсөн гэж үзэх, мөн тодорхойгүй хэмжээний нөхөн төлбөр шаардаж байгаа аж.

OpenAI-ийн төлөөлөгчийн хэлснээр, компанийн зүгээс Рейний үхэлд маш харамсаж байгаа бөгөөд ChatGPT-д хэрэглэгчдийг тусламжийн утас руу холбох зэрэг хамгаалалтын арга хэмжээ байдаг гэдгийг дурдаад цаашид хамгаалалтыг байнга сайжруулж байх болно гэжээ. OpenAI нэхэмжлэлд дурдсан мэдээллийн талаар тодорхой тайлбар хийгээгүй байна.

Сүүлийн үед хиймэл оюун ухааны чатботууд хүнтэй адил харилцах чадвартай болж, зарим хэрэглэгч сэтгэл зүйн зөвлөгөө авахдаа ашиглах болсон. Гэвч мэргэжилтнүүд ийм автомат системээс сэтгэцийн эрүүл мэндийн зөвлөгөө авах нь аюултай хэмээн анхааруулж байна.

OpenAI блогтоо ирээдүйд эцэг эхийн хяналт нэвтрүүлэх, хэрэглэгчийг бодит тусламжийн эх үүсвэртэй холбох боломжийг судалж байгаа, тэр дундаа лицензтэй мэргэжилтнүүдийг ChatGPT-ээр дамжуулан холбох сүлжээ байгуулах талаар дурдсан байна.

Мөн нэхэмжлэлд OpenAI-ээс ChatGPT хэрэглэгчдийн насыг заавал баталгаажуулах, амиа хорлох аргуудын талаар хариу өгөхөөс татгалзах, сэтгэлзүйн хамаарал үүсэх эрсдэлийн талаар анхааруулга өгөхийг шаарджээ.